13 - දිව්‍ය සත්ප්‍රසාදීය භෝජනයට සූදානම
මෙතුෂ් : මට ගිය ඉරිදා දිව්‍ය පූජාවට එන්න බැරි වුණානෙ. අද ජේසු ලබා ගන්න බැරි වෙනවා.
ශෙෆාන්: මම ආවෙත් නැහැනේ. ඒත් මම ජේසු ලබනවා. ජේසු ලැබූවේ නැත්නම් දිව්‍ය පූජාවට ආ එකෙන් වැඩක් නැහැනේ.
මේ කතාව අසා සිටි දහම් පාසල් ගුරුතුමිය මෙසේ පැවසුවා ය.
ගුරුතුමිය : පුතාලා දෙන්නා මෙහාට එන්න. දිව්‍ය පූජාවට ආපු නැති එක පාපයක්. පූජාවට පෙර පියතුමා විනාඩි 10ක් හැමදාම පාපෝච්චාරණය අහනවා. ඔයාලට පුළුවන් ඒ වේලාවේ පාපෝච්චාරණය කර ගෙන සමාව ලබා
ගන්න. ඊට පස්සේ ඔය දෙන්නට ම ජේසු ලබා ගන්න පුළුවන්.
මෙතුෂ් හා ශෙෆාන් : ස්තූතියි ටීචර්.
මෙතුෂ් : අපි දෙන්නා පූජාවට පෙර පියතුමාගෙන් පාපෝච්චාරණය කර ගනිමු. මතක ද අපිට ඉගැන්නුවා පිරිසිදු සිතකින් ජේසු ලබා ගන්න ඕනේ කියලා. පව් කළා ම සිත අපිරිසිදු වෙනවා. එතකොට පව් සමාව ලබා ගන්න ඕනේ.
ශෙෆාන් : මම කිසි ම පාපයක් කරලා නෑනේ.
මෙතුෂ් : ඇයි දැන් ටීචර් කිව්වේ, දිව්‍ය පූජාවට ආපු නැති එක පාපයක් කියලා. ඉරිදා පූජාවට ආව නැති එක දස පනතේ තුන්වන පනතට විරුද්ධ ව කරන පාපයක්.
ශෙෆාන් : මට බඩගිනියි. මම ඉක්මනට කාලා එන්නම්. ඔයත් එන්න රෝල්ස් දෙකක් තියෙනවා.
මෙතුෂ් : දිව්‍ය පූජාව පටන් ගන්න පැයකට කලින් කෑම ගත්තට කමක් නැහැ. දැන් ඔයා කන්න එපා. පූජාවෙන් පස්සේ කන්න.
ශෙෆාන් : ඔයා හැමදාම දිව්‍ය පූජාවට එද්දි කාලා එන්නෙ නැද්ද? මම නම් ප්‍රථම වරට දිව්‍ය සත්ප්‍රසාදය ලබන කොට විතරයි කෑවෙ නැත්තේ.
මෙතුෂ් : මම නම් දිව්‍ය පූජාවට පැයකට පෙර තමා කෑම කන්නේ. පූජාවකට පැයක් නැත්නම් කන්නේ නෑ. එයින් කියන්නේ අපි දිව්‍ය සත්ප්‍රසාද වහන්සේ ලබන්නට කුසගිනි ව සිටිනවා කියන එකයි. ශාරීරික කුසගින්න ආත්මික කුසගින්නේ සංකේතයක්.
ශෙෆාන් : ඔයා නිසා මම අද හොඳ පාඩමක් ඉගෙන ගත්තා. අපි දෙන්නා ඉක්මනට පල්ලියට ගිහිල්ලා පාපෝච්චාරණය කර ගනිමු.
ආත්මික සූදානම
ආත්මික සූදානම යනුවෙන් අදහස් කරන්නේ පාපයෙන් තොර වීම ය. ආත්මික සූදානමේ අවශ්‍යතාව ශුද්ධ වූ පාවුලූ තුමා මෙසේ දක්වා ඇත.
මරණීය පාපයක් කර ඇත්නම් දිව්‍ය සත්ප්‍රසාද වහන්සේ ලබා ගැනීමට පෙර පාපෝච්චාරණය කර ගත යුතු ය. සුළු පාපයක් කර ඇති අය දිව්‍ය පූජාව ආරම්භයේ තම පාපවලට මනස්ථාප වී සමාව ලබා ගෙන දිව්‍ය සත්ප්‍රසාද වහන්සේ ලබා ගැනීමට සුදුස්සකු විය යුතු ය. මරණීය පාපයක් කර ඇති කෙනෙක් දිව්‍ය පූජාවට පෙර සමගි සන්ධානයේ දේව ප්‍රසාද නිධානය ලබා ගැනීමට අවස්ථාවක් නොමැති නම් තම පාපවලට දුක් මනස්ථාප වී අවස්ථාව ලද විගස සමගි සන්ධානයේ දේව ප්‍රසාද නිධානය ලබා ගැනීමට සිතා ගෙන දිව්‍ය සත්ප්‍රසාද වහන්සේ ලබා ගත හැකි ය.
ශාරීරික සූදානම
ශාරීරික සූදානම යනුවෙන් අදහස් කරන්නේ දිව්‍ය සත්ප්‍රසාද වහන්සේ ලබා ගැනීමට පෙර අවම වශයෙන් පැයක්වත් සියලූ ආහාරපානවලින් වැළකී නිරාහාරශීල ව සිටීම ය. තමන් කැමති නම් ඊට වඩා වැඩි කාලයක් වුව ද නිරාහාරශීල ව සිටිය හැකි ය. පැයක කාලය ඇතුළත ජලය හා බේත් භාවිත කිරීමට තහනමක් නැත. පැයක නිරාහාරශීලය රෝගී අයට මහලූ අයට හා මහලූ අයට උපස්ථාන කරන අයට අවශ්‍ය නොවේ.
රෝගී වීම, වයස්ගත වීම, දිව්‍ය පූජාව පැවැත්වීමට පියතුමෙකු නොමැති වීම වැනි සාධාරණ හේතු මත දිව්‍ය පූජාවෙන් පරිබාහිර ව දිව්‍ය සත්ප්‍රසාද වහන්සේ ලැබීමට අවසර ඇත. එක් දිනක දී දිව්‍ය පූජා කිහිපයකට සහභාගි වන පුද්ගලයෙකුට අවස්ථා දෙකක දී පමණක් දිව්‍ය සත්ප්‍රසාද වහන්සේ ලබා ගැනීමට අවසර ඇත. දෙවන වරට දිව්‍ය සත්ප්‍රසාද වහන්සේ ලබා ගැනීමට නම් දෙවන දිව්‍ය පූජාවේ ආරම්භයේ සිට අවසානය දක්වා ම සහභාගි වීම අනිවාර්ය ය. හදිසියේ රෝගී වී පියතුමෙකු රෝගීන්ගේ ආලේපය දානය කිරීමට පැමිණියහොත් එදින දිව්‍ය පූජාවේ දිව්‍ය සත්ප්‍රසාද වහන්සේ ලබා තිබුණ ද දිව්‍ය සත්ප්‍රසාද වහන්සේ දෙවන වරට වුව ද දිව්‍ය පූජාවකින් පරිබාහිර ව ලබා ගත හැකි ය.