6 - මෙසියානික අනාවැකි
අපේ ආදි මවුපියන් වූයේ ආදම් සහ ඒව ය. ඔවුහු දෙවියන් වහන්සේට අකීකරු වූහ. එම නිසා ඔවුන් ඒදන් උයනෙන් නෙරපනු ලැබිණි. තම වරදෙන් හා තම කැමැත්තෙන් පාපයට වැටුණු මිනිසාට දෙවියන් වහන්සේ ප්‍රේම කළ සේක. අහිමි වූ සදාතන ජීවිතය නැවත උදා කර දෙන පිණිස ගැලවුම්කරුවෙකු එවීමට පොරොන්දු වූ සේක.
ආබ්‍රහම් තුමාගේ කැඳවීම
ලෝක ගැලවුම්කරුවාණන් වූ ජේසුස් වහන්සේ මෙලොවට එවීම සඳහා ගැලවීමේ ඉතිහාසය සුදානම් කිරීමට දෙවියන් වහන්සේ ආබ්‍රහම් තුමා කැඳවූ සේක.
මෙම කැඳවීමට පිළිතුරු දුන් ආබ්‍රහම් තුමා, දෙවියන් වහන්සේ කී ලෙස පොරොන්දු දේශය බලා පිටත් විය. මෙය එතුමාගේ දැඩි විශ්වාසයට සාක්ෂියකි.
මෙසියස් වහන්සේ පිළිබඳ දිවැස් වැකි
දෙවියන් වහන්සේ මෙලෙස ආබ්‍රහම් තුමා කැඳවනු ලැබූවේ ලෝක ගැලවුම්කරුවාණන් වූ ජේසුස් වහන්සේ මෙලොවට එවීමට ජාතියක් බිහි කිරීමට ය. එම ජාතිය වූයේ ජුදා ජාතියයි. එම ජාතියේ ශ්‍රේෂ්ඨ රජතුමෙක් වූයේ දාවිත් රජතුමා ය. දාවිත් රජතුමාගෙන් ලෝක ගැලවුම්කරුවාණන් පැමිණෙන බව නාතාන් දිවැසිවරයා දාවිත් රජතුමාට දන්වනු ලැබුවේ පහත වචනවලිනි.
ක්‍රිස්තුන් වහන්සේ අපගේ රජාණෝ ය. උන්වහන්සේගේ රාජ්‍යය සදහට ම පවතින්නේ ය.
ජේසුස් වහන්සේ කන්‍යාවකගෙන් ඉපදීමට නියමිත බව පහත දිවැස් වැකිය පෙන්වා දෙයි.
එම කන්‍යාව වූයේ මරියෝත්තමාවන් ය. එතුමියගේ පුත්‍රයාට ලැබෙන නාමය එම්මානුවෙල් ය. එහි අර්ථය "දෙවියන් වහන්සේ අප සමග ය" යන්නයි. ජේසුස් වහන්සේ දෙවියන් වහන්සේගේ පුත්‍රයාණන් වන නිසා උන්වහන්සේගේ උපත තුළින් දෙවියන් වහන්සේ අප සමග විසීමට පැමිණි සේක.
මෙම බයිබල් පාඨය අනුව ජේසුස් වහන්සේ හෙවත් මෙසියස් වහන්සේ උපත ලබන්නේ බෙත්ලෙහෙමේ ය. උන්වහන්සේ සාමයේ කුමාරයාණෝ ය. නැති වී ගිය දේව සබඳතාව ගොඩනගමින් උන්වහන්සේ අපට සාමය උදා කරන සේක.
දෙවියන් වහන්සේගේ ගැලවීමේ සැලැස්ම පූර්ණත්වයට පත් කිරීම සඳහා කැඳවනු ලැබූවෝ දේව හඩට සවන් දී කීකරු වූහ. අප ද එම දේව සැලැස්මට අනුගත විය යුතු ය. දෙවියන් වහන්සේ අප ද විවිධ තත්ත්වයන් තුළ විවිධ සේවාවන් සඳහා කැඳවන සේක. දෙවියන් වහන්සේගේ ගැලවීමේ සැලැස්ම අප විශ්වාසයෙන් යුතු ව පිළිගත යුතු ය. දේව වචනයෙන් අපට ද දේව සැලැස්ම අනාවරණය වේ. සියල්ලෝ ම දෙවියන් වහන්සේගේ ගැලවීමේ සැලැස්මේ හිමිකාරත්වය ලබති.