දක්ෂ කතුවරයෙකු තමන්ගේ අරමුණු නැතිනම් පරමාර්ථ ඉටු කරගැනීම සඳහා අවැසි දත්ත හා සිද්ධි තාර්කික ලෙස ගොනු කරයි. සාමාන්‍යයෙන් එවැනි කෘතියක් සාර්ථක නිර්මාණයක් ලෙස පිළිගනු ලබයි. දක්ෂ කතුවරයෙකු ලෙස ශුද්ධ වූ ලුක් තුමා ද තම පරමාර්ථය ඉටු කර ගැනීම සඳහා ශුභාරංචිය රචනා කිරීමේ දී කටයුතු කර ඇත.

සියලූ ජාතීන්ගේ ගැලවීම ගැන කතා කරන එතුමා එම අදහස ඉටු කර ගැනීම සඳහා තෝරා ගත් කරුණු ඉතා දක්ෂ හා නිර්මාණශීලි ලෙස ඉදිරිපත් කර ඇති බව ශූභාරංචිය දෙස බැලීමේ දී පැහැදිලි වේ.

ජේසුස් වහන්සේ ලබා දුන් ගැලවීම තෝරා ගත් ජනතාව වූ ජුදා ජාතියට පමණක් නොව මුළු මිනිස් වර්ගයාට ම බව ඒත්තු ගැන්වීමට ජේසුස් වහන්සේගේ ජීවිතයෙන් ඉගැන්වීම්වලින් හා සිදුවීම්වලින් තොරතුරු ලුක් තුමා තෝරා ගෙන ඇත. ඒ අනුව ලුක් තුමාගේ ශුභාරංචියෙන් ජේසුස් වහන්සේ ජූදා ජනතාවගේ පමණක් නොව මුළු මිනිස් සංහතියේ ම ගැලවුම්කරුවාණන් බව පෙන්වා දීම පරමාර්ථය කර ගනියි. මෙම අදහස මුදුන්පත් කර ගැනීම සඳහා ලුක් තුමා විවිධ කරුණු උපයෝගී කොට ගෙන ඇති ආකාරය පහත දැක්වේ.

1. මතෙව් තුමා ජේසුස් වහන්සේගේ වංශාවලිය ආදි පිතෘ ආබ්‍රහම් තුමාගෙන් ආරම්භ කරයි. එතුමා ජුදා ජාතියේ ආරම්භකයා ය. "ආබ්‍රහම්ගේ ද දාවිත්ගේ ද පුත්‍ර වූ ජේසුස් ක්‍රිස්තුන් වහන්සේගේ වංශාවලිය මෙසේ ය" (මතෙව් 1:1). එහෙත් ලුක් තුමාගේ ශුභාරංචියේ ජේසුස් වහන්සේගේ වංශාවලිය ආරම්භ කරන්නේ මනුෂ්‍ය ජාතියේ ආරම්භකයා වූ ආදම්ගෙනි "ඔහු ආදම්ගේ පුත්‍රයා ය. ඔහු දෙවියන් වහන්සේගේ පුත්‍රයා ය" (ලුක් 3:23-38). මෙසේ ජේසුස් වහන්සේ ජුදා ජාතිකයන්ගේ පමණක් නොව මුළු මිනිස් සංහතියේ ම ගැලවුම්කරුවාණන් බව කීම ලුක් තුමාගේ අරමුණයි.

2. ජේසුස් ක්‍රිස්තුන් වහන්සේගේ උපතේ දී දේව දූතයන් ගායනා කරන්නේ, "මිහිපිට දේව ප්‍රසාදය ලත් ජනයා අතර සාමය වේවා!" කියා ය (ලුක් 2:14). මෙහි දී මිහිපිට දේව ප්‍රසාදය ලත් ජනයා" යැයි කීමෙන් ජේසුස් වහන්සේ සියලූ මනුෂ්‍යයන්ගේ ගැලවුම්කරුවාණන් බව ප්‍රකාශ වේ.

3. මෝසෙස් තුමාගේ නීතියට අනුව සැම ජුදා ජාතික කුළුදුල් පිරිමි දරුවෙකු ම දේව මාලිගාවෙහි කැප කළ යුතු වේ. ජුසේ තුමා හා මරිය තුමිය ද ළදරු ජේසුස් වහන්සේ කැප කිරීම සඳහා ජෙරුසලම් දේව මාලිගාවට රැගෙන ගියහ. දෙවියන් වහන්සේගේ ගැලවීම බලාපොරොත්තුවෙන් සිටි දැහැමි බැතිමත් සිමියොන් නම් වූ මිනිසෙක් ශුද්ධාත්මයාණන් වහන්සේගේ ආනුභාවයෙන් පූර්ණ වී ජේසුස් වහන්සේ සිය දැතට ගෙන මෙසේ ප්‍රශංසා කළේ ය. "සමිඳුනි, ඔබ පොරොන්දු වූ ලෙස ම දැන් ඔබ දාසය හට, ශාන්ති සිතින් යාමට ඔබ නිදහස දී ඇත. මන්ද, ගැලවීම මාගේ දෙනෙතින් දිටිමි. එය සකල ජාතින් අබිමුව කළ ගැලවීම ද විජාතීන්ට එළිය දෙන ආලෝකය ද ඔබේ සෙනග වන ඉශ්රායෙල්වරුන්ගේ මහිමය ද වේ" යනුවෙනි (ලුක් 2:29-32). මෙසේ ජේසුස් වහන්සේ මුළු මිනිස් වර්ගයාට ම ආලෝකයක් හා ගැලවීමක් වන බව තහවුරු කරයි.

4. "මාගේ අසල්වැසියා කවරෙක් දැයි" එක්තරා විනයධරයෙක් (මෝසෙස් තුමාගේ නීතිය පිළිබඳ විශාරදයෙක්) ජේසුස් වහන්සේගෙන් ප්‍රශ්න කළේ ය. එයට පිළිතුරක් වශයෙන් ජේසුස් වහන්සේ මෙම උපමාව වදාළ සේක.

සමරිතානුවරුන් ජුදා ජාතිකයින් නොව අන්‍ය ජාතිකයන් ය. යහපත් සමරිතානුවරයාගේ උපමාවේ දී ඇගයීමට ලක් කෙරෙනුයේ ජුදා ජාතිකයන් නොව, අන්‍ය ජාතික සමරිතානුවරයා ය.

ලුක් තුමාගේ ශුභාරංචිය සම්පාදනය කළ කාලය ක්‍රි.ව. 80-85 අතර බව සාමාන්‍ය පිළිගැනීමයි. ලුක් තුමා ශුභාරංචියෙන් සිය පරමාර්ථය සාක්ෂාත් කර ගත්තා සේ අප ජීවිතවල අවසාන අරමුණ දෙවිදුන් කරා ළඟා වීම බව වටහා ගෙන ජීවත් විය යුතු වෙමු. කුඩා කළ සිට ම යහපත් අරමුණු ඇති ව කටයුතු කර බුද්ධිමත් ව එම අරමුණු කරා ළඟා වීමට අදිටන් කර ගනිමු. එමගින් දෙමවුපියන්ගේ, ගුරුවරුන්ගේ හා වැඩිහිටියන්ගේ බලාපොරොත්තු ඉටු කරමු.

ජේසුස් වහන්සේගේ උපත මගින් සියලූ ජාතීන්ට ගැලවීම ලැබිණි. අපි ද අපේ පවුලට හා මීසමට පමණක් සීමා නොවී සියල්ලන්ගේ යහපත වෙනුවෙන් කටයුතු කරමු.