2.2 - ප්‍රධාන පෘෂ්ඨවංශී කාණ්ඩ
පෘෂ්ඨවංශීන් පිළිබඳව අධ්‍යයනය කිරීම සඳහා 2.3 පැවරුමෙහි නිරතවන්න.
විවිධ නිර්ණායක පදනම් කර ගෙන පෘෂ්ඨවංශීන් වර්ගීකරණය කිරීමට දැන් ඔබට හැකි ය.
පොදු ලක්ෂණ පදනම් කරගෙන විද්‍යානුකූලව සිදු කර ඇති වර්ගීකරණයක් මගින් පෘෂ්ඨවංශීන් පහත දැක්වෙන ආකාරයට වර්ගීකරණය කර ඇත.
- පිස්කේස් (Pisces)
- ඇම්ෆිබියා (Amphibia)
- රෙප්ටීලියා (Reptilia)
- ආවේස් (Aves)
- මැමේලියා (Mammalia)
එම එක් එක් කාණ්ඩවල ලක්ෂණ මීළඟට විමසා බලමු.
පිස්කේස් (Pisces)
මත්ස්‍යයෝ පිස්කේස් කාණ්ඩයට අයත් වෙති. මොවුන් ජලයේ ජීවත් වීමට හොඳින් අනුවර්තනය වී ඇත. තිලාපියා, මඩුවා, මෝරා, බලයා, තෝරා, සාලයා සහ හාල්මැස්සා පිස්කේස් කාණ්ඩයට නිදසුන් කිහිපයකි.
පිස්කේස් කාණ්ඩය පහත සඳහන් ලක්ෂණ දරයි.
- ජලයේ පිහිනීමට අනුවර්තනය වූ අනාකූල දේහ හැඩයක් ඇත.
- දේහය කොරපොතුවලින් ආවරණය වී ඇත.
- පිහිනීම සඳහාත්, සංතුලනය සඳහාත් වරල් යොදා ගනී.
- ශ්වසනය සඳහා ජලක්ලෝම (කරමල්) ඇත.
- ඇසිපිය නොමැති ඇස් දරයි.
ඇම්ෆිබියා (Amphibia)
උභයජීවීන් අයත් වන කාණ්ඩයයි. මොවුහු ජීවන චක්‍රයේ එක් අවධියක් ජලජ පරිසරයේ ගත කරති. ගෙම්බා, මැඩියා, සලමන්දරා, පණු ගෙම්බා (Ichthyophis) ඇම්ෆිබියා කාණ්ඩයට නිදසුන් කිහිපයකි.
ඇම්ෆිබියා කාණ්ඩය පහත සඳහන් ලක්ෂණ දරයි.
- රූපාන්තරණයක් සහිත ය.
- කොරපොතු රහිත ග්‍රන්ථීමය තුනී සෙවලමය සමක් දරයි.
- බොහෝ ඇම්ෆිබියාවන්ට සංචරණය සඳහා ගාත්‍රා පිහිටයි.
- ශ්වසනය පෙනහැලි, තෙත සම හෝ මුඛය මගින් සිදු කරයි.
රෙප්ටීලියා (Reptilia)
උරගයින් අයත් වන කාණ්ඩය යි. මොවුන් ගොඩබිම (භෞමික) පරිසරයට ඉතා හොඳින් අනුවර්තනය වී ඇත. ඉබ්බා, කැස්බෑවා, නයා, පිඹුරා, පොළඟා, කටුස්සා, කබරගොයා, තලගොයා, කිඹුලා රෙප්ටීලියා කාණ්ඩයට නිදසුන් කිහිපයකි.
රෙප්ටීලියා කාණ්ඩය පහත සඳහන් ලක්ෂණ දරයි.
- කොරළ සහිත වියළි සමක් ඇත. සම ග්‍රන්ථීවලින් තොර ය.
- සංචරණය සඳහා ගාත්‍රා පිහිටයි. ඇතැමුන්ගේ ගාත්‍රා ක්ෂීණ වී ඇත. බඩ ගා යෑම සඳහා අනුවර්තනය වී ඇත.
- ශ්වසනය සඳහා පෙනහැලි ඇත.
ආවේස් (Aves)
පක්ෂීන් අයත් වන කාණ්ඩය යි. මොවුන් පියාසර කිරීම සඳහා අනුවර්තනය වී ඇත. කැහිබෙල්ලා, හංසයා, බකමූණා සහ ගිරවා ආවේස් කාණ්ඩයට නිදසුන් කිහිපයකි.
ආවේස් කාණ්ඩය පහත සඳහන් ලක්ෂණ දරයි.
- වාතයේ ගමන් කිරීම පහසු වන පරිදි අනුවර්තනය වූ අනාකූල දේහයක් ඇත.
- පිහාටුවලින් ආවරණය වූ සමක් ඇත.
- සංචරණය සඳහා ගාත්‍රා පිහිටයි. පූර්ව ගාත්‍රා පියාපත් බවට පත් වී ඇත.
- මුඛයේ දත් නොපිහිටන අතර භෝජන රටාව අනුව සැකසුණු හොටක් ඇත.
- ශ්වසනය සඳහා පෙනහැලි ඇත.
මැමේලියා (Mammalia)
ක්ෂීරපායින් අයත් වන කාණ්ඩය යි. මොවුහු කිරි දී පැටවුන් පෝෂණය කරති. මිනිසා, මීයා, උණහපුළුවා, ඔරංඔටන්, ගෝරිල්ලා, චිම්පන්සියා, වවුලා, තල්මසා, ඩොල්ෆින්, ගෝනා සහ මුවා මැමේලියා කාණ්ඩයට අයත් සතුන් සඳහා නිදසුන් කිහිපයකි.
මැමේලියා කාණ්ඩය පහත සඳහන් ලක්ෂණ දරයි.
- ස්තන ග්‍රන්ථී (කිරි නිපදවන ග්‍රන්ථී) පිහිටා ඇත.
- සමෙහි ස්වේද ග්‍රන්ථී, ස්නේහස්‍රාවි ග්‍රන්ථී හා රෝම ඇත.
- බාහිර කන් පෙති සහිත කන් ඇත.
- ශ්වසනය සඳහා පෙනහැලි ඇත.
මෙම පාඩම හැදෑරීමෙන් සතුන් අතර පුළුල් විවිධත්වයක් පවතින බව අපි හඳුනා ගතිමු. සත්ත්වෝද්‍යාන, රක්ෂිත, අභය භූමි වැනි ස්ථාන නැරඹීමෙන් ඔබට මෙම විවිධත්වය මනාව අධ්‍යයනය කිරීමට හැකි වේ. සෑම සත්ත්ව විශේෂයක් ම පරිසරයේ සමතුලිතතාව පවත්වා ගැනීම සඳහා මහඟු දායකත්වයක් දක්වයි.