රූපවාහිනිය, ගුවන්විදුලිය, පුවත්පත් සහ අන්තර්ජාලය ජන මාධ්‍ය ලෙස හැඳින්වෙයි. ඒ අතරින් ගුවන්විදුලිය ශ්‍රව්‍ය මාධ්‍යයකි. එනම්; ඇසීම හෙවත් ශ්‍රවණය සඳහා සකස් වී ඇති මාධ්‍යයකි. එබැවින් ගුවන්විදුලියේ දී අන් සියල්ල අභිභවා මූලික වන්නේ හඬ යි. එක් වරක දී ශ්‍රාවකයාට ග්‍රහණය කර ගැනීමට හැකි වන පරිදි එම හඬ හෙවත් ශබ්දය පැහැදිලි හා නිරවුල් විය යුතු ය. ඒ හේතුව නිසා ම ගුවන්විදුලි නිවේදකයා නිවැරදි ශබ්ද උච්චාරණයෙන්, ශබ්ද උච්චාවචනයෙන් සහ සුදුසු විරාමය සහිතව අදාළ වැඩසටහන ඉදිරිපත් කිරීම අවශ්‍ය ය.

ගුවන්විදුලි වැඩසටහන් අතරින් ප්‍රවෘත්ති සඳහා හිමි වන්නේ වැදගත් ස්ථානයකි. ප්‍රවෘත්ති ප්‍රකාශයක දී මුලින් ම ඉදිරිපත් කෙරෙන්නේ සිරස්තල යි. අනතුරුව දේශීය හා විදේශීය ප්‍රවෘත්තිත්, ක්‍රීඩා ප්‍රවෘත්තිත් කාලගුණ වාර්තාවත් විකාශය වෙයි. මෙම පාඩමේ අන්තර්ගත වන්නේ ශ්‍රී ලංකා ගුවන්විදුලි සංස්ථාවෙන් විකාශය වූ විවිධ ප්‍රවෘත්ති තුනකි. ඒ ප්‍රවෘත්තිවල ඇති විවිධත්වය මෙන් ම ප්‍රවෘත්ති ප්‍රකාශ වශයෙන් ඒවා අතර තිබෙන සමානතා ද ඔබට අවබෝධ කර ගත හැකි ය.

කථන මාධ්‍යයෙන් ඉදිරිපත් කරන නමුත් ප්‍රවෘත්තිය ලියා ඇත්තේ ලේඛන ව්‍යවහාරයට අනුව වීම සැලකිය යුතු ය.

2016.02.16 ප.ව 12.45 ප්‍රවෘත්ති ප්‍රකාශය
සංස්කරණය: හේමන්ත හෙට්ටිගේ
ප්‍රකාශය: සුජීව හරිශ්චන්ද්‍ර

ජපන් මිත්‍රත්වයේ සංකේතය නිපොන් මාරු නෞකාව අද දිවයිනට...

ජපන් මිත්‍රත්වයේ සංකේතය නිපොන් මාරු තරුණ නෞකාවෙන් දිවයිනට පැමිණ සිටින තරුණ පිරිස අද කැස්බෑව ප්‍රදේශයට පැමිණ සිටිති. එහි නිවාස 125ක අද දවස පුරා රැඳී සිටිමින් ඔවුන් දේශීය ආහාර පාන භුක්ති විඳින අතර දේශීය සංස්කෘතික අත්දැකීම් ලබා ගනු ඇත. අද පස්වරුවේ ඔවුන් මඩපාත ශෛලාරාම විහාරස්ථානය, මාකඳුර සංකල්ප විහාරස්ථානය හා බෝකුන්දර පරම නිකේතනාරාම විහාරස්ථානය යන විහාරස්ථානවල පැවැත්වෙන ශ්‍රමදාන හා සංස්කෘතික වැඩසටහන්වලට එක් වීමට නියමිත ය. පසුගිය ඉරිදා කොළඹ වරායට ළඟා වූ එම නෞකාවෙන් රටවල් දොළහක් නියෝජනය කරමින් තරුණ තරුණියෝ දෙසිය හතළිස් තුන් දෙනෙක් මෙරටට පැමිණියහ. ඒ අතර ශ්‍රී ලංකාව නියෝජනය කරන සංඛ්‍යාව දොළහකි. නිපොන් මාරු නෞකාව හෙට දිවයිනෙන් පිටත්ව යෑමට නියමිත ය.

2016.02.28 ප.ව. 12.45 ප්‍රවෘත්ති ප්‍රකාශය
සංස්කරණය: මොහාන් පෙරේරා
ප්‍රකාශය: චිත්‍රා කුමාරි පත්තප්පෙරුම

ලෝකයේ මී මැස්සන් හා පරාග පෝෂණයේ යෙදෙන සතුන්
                වඳ වී යෑමේ අවදානමක්...

ලෝකයේ මී මැස්සන් හා පරාග පෝෂණයේ යෙදෙන සතුන් වඳවී යෑමේ තර්ජනයක් පවතින බව එක්සත් ජාතීන්ගේ සංවිධානයේ අලූත් ම වාර්තාවක් සඳහන් කරයි. මේ නිසා භෝග වගාව සහ ස්වාභාවික පරිසරයෙන් ආහාර නිෂ්පාදන කර ගැනීමට නො හැකි තත්ත්වයක් අනාගතයේ දී උදා විය හැකි බව එම වාර්තාව පෙන්වා දෙයි. එහි සඳහන් පරිදි මේ වන විට සමනල හා මී මැසි විශේෂ ගණනාවක් වඳ වී යාමට ලක්ව තිබේ. යුරෝපයේ මල් පැණී බොන කුඩා කුරුලූ විශේෂ, කුරුමිණි විශේෂ සහ වවුල් වර්ග කිහිපයක් ද විශාල ලෙස වඳ වී ගොස් තිබේ. කෘමිනාශක භාවිතය වැඩි වීම, මිනිස් ක්‍රියාකාරකම් නිසා මිහිතලය දිනෙන් දින උණුසුම් වීම මෙම තත්ත්වයට හේතුව බව සැලකේ. පෘථීවියේ ජෛව විවිධත්වය සොයා බැලීම සඳහා විද්‍යාඥයන් විසින් කරන ලද පර්යේෂණ මත මේ වාර්තාව නිකුත් කර තිබේ.

2016.02.16 ප.ව. 6.00 ප්‍රවෘත්ති ප්‍රකාශය
සංස්කරණය: මොහාන් පෙරේරා
ප්‍රකාශය: හෙන්රි සෙනෙවිරත්න

දකුණු ආසියානු ක්‍රීඩා උලෙළේ රන් පදක්කම් දිනූ හිමාෂ ඒෂාන්ට
            උපන් ගමෙන් හා පාසලෙන් උපහාර...

දකුණු ආසියාතික මලල ක්‍රීඩා උලෙළෙහි දී දකුණු ආසියාවේ වේගවත් ම මිනිසා වෙමින්, මීටර් 100 ඉසව්වෙන් රන් පදක්කම දිනූ ඩබ්. කේ. හිමාෂ ඒෂාන් පිළිගැනීමේ උත්සවයක් අද පස්වරුවේ ඔහුගේ උපන්ගම වන කළුතර දොඩන්ගොඩ තුඩුගල දී පැවැත්වුණි. අද දහවල් දොඩන්ගොඩ කොස්වත්ත විද්‍යාලය අසල සිට රිය පෙරහැරකින් ඔහු අකුරු කරවූ මිරිස්වත්ත ජාතික පාසලට කැඳවා ගෙන එනු ලැබී ය. එහි දී විදුහල්පතිතුමිය ඇතුළු ආචාර්ය මණ්ඩලය, ශිෂ්‍ය ශිෂ්‍යාවන් විසින් ඔහුව පිළිගනු ලැබිණි. දොඩන්ගොඩ නගරයේ පැවති පිළිගැනීමේ උත්සවය දොඩන්ගොඩ ප්‍රාදේශීය ලේකම් තිලංකා වෙත්තසිංහ මහත්මියගේ ප්‍රධානත්වයෙන් පැවැත්වුණි. එහි දී හිමාෂ ඒෂාන්ට සමරු තිළිණයක් ද පිරිනැමුණි.

විරාම ලකුණ

කථනයේ දී හඬ නිසි පරිදි උස් පහත් කිරීමෙන්, අංග චලනයෙන් සහ මුහුණේ ඉරියවු මගින් අදහස් වඩා පැහැදිලිව හා අර්ථවත් ලෙස ඉදිරිපත් කළ හැකි ය. ලේඛනයේ දී මේ සඳහා ආධාර වන්නේ විරාම ලකුණු යි.

තිත් පෙළ, වරහන් හා කාක පාදය යන විරාම ලකුණු යෙදිය යුතු අවස්ථා මෙහි දී හඳුන්වා දෙනු ලැබේ.

තිත් පෙළ

තිත් තුන (...)

යම්කිසි උද්ධෘත පාඨයක මුලින් හෝ මැදින් හෝ අගින් හෝ කොටසක් අත් හරින ලද බව හැඟවීමට තිත් තුන යෙදේ.

උදාහරණ: ... කඩවර දෙවි කෙනකු වී වැව් ආරක්ෂා කරන බව ජනතාවගේ විශ්වාසය යි.
             එක් එක් දෙවියන්ගේ උපත... පිළිබඳ ගැයෙන කාව්‍යාවලි විශේෂය කෝල්මුර කවි නමින් හැඳින්වේ.
             ගොවියා සුබ දිනයක තෝරා ගත් කැලයට පිවිස...

වරහන්

විකල්ප ව්‍යවහාරය දැක්වීම සඳහා වරහන් යොදා ගැනේ.

සරල වරහන් ( )

• යම් ප්‍රකාශයක් වැඩිදුරටත් පැහැදිලි කිරීමේ දී සරල වරහන් භාවිත වෙයි.

                   උදාහරණ: ඉන් පසු හේන් ගොවියා කැලේ බණ්ඩාර දෙවියන් සිහි කොට තුන් යලක් (තුන් වතාවක්) පඳුර වටා පැදකුණු කරයි.

• අක්ෂර, අංක ආදිය ආශ්‍රයෙන් අනුපිළිවෙළ හෝ කොටස් දැක්වීමේ දී ද සරල වරහන් යෙදේ.

                   උදාහරණ: සාහිත්‍ය නිර්මාණයක රසය ප්‍රධාන වශයෙන් දෙයාකාර ය.
                          (අ) අර්ථ රසය
                          (ආ) ශබ්ද රසය

• කිසියම් කාල සීමාවක් දැක්වීමේ දී සරල වරහන් යෙදේ

                  උදාහරණ: රබීන්ද්‍රනාත් තාගෝර් (1861 - 1941) නොබෙල් ත්‍යාගය දිනා ගත් ප්‍රථම ආසියාතිකයා ය.

සඟළ වරහන් {}

වරහන් තුළ දැක්විය යුතු ප්‍රකාශනයක ම සරල වරහන යෙදෙන පාඨයක් ඇත් නම් මුළු ප්‍රකාශනය ම සඟළ වරහන් තුළ යොදනු ලැබේ.

             උදාහරණ: {පසුව පන්තිය කණ්ඩායම් හතරකට බෙදී නිර්මාණය කර ගන්නා ලද කතාව පාදක කර ගෙන නාට්‍ය පිටපත් හතරක් රචනා කරන්න. (විනාඩි 15ක් සඳහා)}

කාක පාදය (^)

පාඨයකින් මග හැරුණු අකුරක්, පදයක්, පද සමූහයක් නැවත ලියා දැක්වීමට කාක පාදය භාවිත වෙයි. මෙය අතින් ලියන ලද ලේඛනවලට පමණක් සීමා වෙයි.

                                කළු
උදාහරණ: මහවැලි, කැලණි,^ වලවේ යනු මධ්‍යම කඳුකරයෙන් ආරම්භ වන ප්‍රධාන ගංගා සතරකි.