22 - ඉමාම් ගස්සාලි රහ්මතුල්ලාහි අලයිහි තුමා
ඉමාම් ගස්සාලි රහ්මතුල්ලාහි අලයිහි තුමා ලෝක ප්‍රසිද්ධ උගතෙක්. එතුමා ඉපදුණේ පර්සියාවේ. එතුමා ඉගෙන ගන්න බග්දාද් නගරයට ගියා.
දවසක් දා එතුමා බග්දාද් නගරයේ සිට ආපසු එන අතරමග දී සොරුන් කණ්ඩායමක් මුණ ගැසුණා. ඔවුන් එතුමා සතු දේවල් පැහැර ගත්තා.
ඉමාම් ගස්සාලි රහ්මතුල්ලාහි අලයිහි තුමා හුඟක් දුක් වුණා. එතුමා තමාගේ පොත්පත් ආපසු දෙන ලෙස ඉල්ලා සිටියා.
"ඔබ උගත් දේ තියෙන්නේ පොත්පත්වල ද?" කියා සොරුන් ඇහුවා.
ඉමාම් ගස්සාලි රහ්මතුල්ලාහි අලයිහි තුමා කල්පනා කරන්න වුණා. "උගත් දේ පොත්පත්වල පමණක් නොව මතකයේ ද තබා ගන්නට ඕනෑ" කියා එතුමාට තේරුණා.
එතුමා තමා උගත් දේ මතකයේ තබාගෙන ක්‍රියා කළා.
එතුමා වගේ අපිත් ඉගෙන ගත්ත දේවල් මතකයේ තබා ගනිමු.
ඒවා අපේ එදිනෙදා ජීවිතයේ ක්‍රියාවට නංවමු.