ටිලිං ටිලිං ටිලිං........
විවේක කාලය නිමා වුණා. ළමයි හැමෝම පන්තියට ආවා. ගුරුතුමිය පන්තිය ඉදිරියේ සිට ගත්තා. ළමයි නිශ්ශබ්ද වුණා.

දියේ ඉන්න මාළුවෝ
පුංචි අපේ යාළුවෝ
උඩ පැනිල්ල යට ගිලිල්ල
හැම තිස්සෙම ඇති නැටිල්ල

ගුරුතුමිය ලස්සනට ගායනා කළා. ළමයි අත්පුඩි ගසමින් ගුරුතුමිය සමග ගායනා කළා.

"අපිත් මාළුවෙක් හදමු." ගුරුතුමිය කිවුවා.

හැම දෙනාට ම හරි හතරැස් කඩදාසි කොළය බැගින් ලැබුණා.

කොළය මේසය උඩින් තියන්න.   

රූපයේ පෙනෙන ආකාරයට මුලූ දෙක එක මත එක තබා ත්‍රිකෝණයක් වන සේ නවන්න.           

ත්‍රිකෝණය මත රූපයේ දක්වා ඇති ආකාරයට හැඩය ඇඳ ගන්න.          

ඇඳගත් හැඩය දිගේ කතුරෙන් කපා ගන්න.               

කඩදාසිය දිග අරින්න.         

පෙනෙන පරිදි කතිර දමා ඇති රේඛාව දිගේ එක පැත්තකින් පමණක් කපන්න.                

කැපූ කොටස් දෙක දෙපැත්තට මාරු කරන්න.              

දැන් අලවා ගන්න.        

මාළුවාගේ ඇස්, කට, වරල් ඇඳ පාට කර ගන්න.                  

ගුරුතුමිය බිත්තියේ නිල් පාට ලොකු පුවරුවක් එල්ලූවා. ළමයි පේළියට ගොස් ඔවුන් හැදූ මාළු, නිල් පාට පුවරුවේ ඇලෙවුවා. පාට පාට මාළු පිරුණු පුංචි පොකුණක් වගෙයි.

දියේ ඉන්න මාළුවෝ
පුංචි අපේ යාළුවෝ
උඩ පැනිල්ල යට ගිලිල්ල
හැම තිස්සෙම ඇති නැටිල්ල

ළමයි ගුරුතුමිය සමග නැවතත් ගායනා කළා.