24 - අටසිල් සමාදන් වෙමු
අද අපේ පාසලේ සිල් සමාදන් වෙන දවස. වෙනදාට කලින් අම්මාත් තාත්තාත් අප අවදි කළා. එදා අපට දැනුණේ හරි ම සතුටක්.
හොඳින් මුහුණ සෝදා ගෙන නංගීත්, මමත් පිරිසිදු වුණා. ගෙදර මිදුලේ වතුසුද්ද ගහෙන් මල් නෙළා ගත්තා. මල් ධෝවනය කර වට්ටිය පිළියෙල කර ගත්තා. තෙල්, පහන්, හඳුන්කූරු කලින් ම පිළියෙල කරලයි තිබුණේ.
සිල් ඇඳුම් ඇඳ ගත්තා. අම්මාට තාත්තාට වැඳ පාසලට යන්න පිටත් වුණා. බෞද්ධ කොඩිවලින් සැරසූ පාසල හරි ම ලස්සනයි. අද අපේ පාසල පෝය දවසේ පන්සල වගෙයි.
සිල් ඇඳුම් ඇඳගත්තු ළමයින් කොඩි අතරින් එන විට හරි ම ලස්සනයි. ළමයි බුදුමැඳුර අවට පිරිසිදු කළා. බුදුගුණ කියමින් පූජා ද්‍රව්‍ය අතගස්වා බුදුමැඳුරේ තැන්පත් කළා. ගුරුතුමී අනුව යමින් අපි වාක්‍ය කියා සිල් ඉල්ලූවා. අපේ හාමුදුරුවෝ අප අටසිල් සමාදන් කරවූවා.
- පාණාතිපාතා වේරමණී සික්ඛාපදං සමාදියාමි.
- අදින්නාදානා වේරමණී සික්ඛාපදං සමාදියාමි.
- අබ්‍රහ්මචරියා වේරමණී සික්ඛාපදං සමාදියාමි.
- මුසාවාදා වේරමණී සික්ඛාපදං සමාදියාමි.
- සුරාමේරය මජ්ඣපමාදට්ඨානා වේරමණී සික්ඛාපදං සමාදියාමි.
- විකාල භෝජනා වේරමණී සික්ඛාපදං සමාදියාමි.
- නච්ච ගීත වාදිත විසූක දස්සන මාලා ගන්ධ විලේපන ධාරණ මණ්ඩන විභූසනට්ඨානා වේරමණී සික්ඛාපදං සමාදියාමි.
- උච්චාසයන මහාසයනා වේරමණී සික්ඛාපදං සමාදියාමි.
සිල් සමාදන් වූ අපි බණ ඇහුවා, භාවනා කළා, බුද්ධ වන්දනාවේ යෙදුණා. දවස ම සිල්වත් ව ගත කළා.
ඒ නිසා දවස ම ප්‍රයෝජනවත්ව ගත වුණා. සිල් පවාරණය කළ අප ගුරුතුමන්ට, ගුරුතුමියන්ට වැඳ ගෙදර ගියේ නැවතත් පෝය දිනයක විහාරස්ථානයේ දී සිල් සමාදන් වෙන්න හිතාගෙනයි.