සීයා පොහොය දිනයට බෝසත් චරිතය පිළිබඳ කතා කියා දෙනවා. මෙවර පසළොස්වක පොහොය දවසේ දුමිඳුට කියා දුන්නේ සිදුහත් කුමරු ශිල්ප ඉගෙන ගත් ආකාරයයි.

දුමිඳු : සීයේ, සිදුහත් කුමාරයා ශිල්ප ඉගෙන ගත්තේ මොන පාසලේ ද?

සීයා : පාසලකට ගියේ නෑ පුතේ, කුමාරයා ශිල්ප ඉගෙන ගත්තේ රජමාලිගාවේ දී.

දුමිඳු : එතකොට සීයේ සිදුහත් කුමරුට ශිල්ප ඉගැන්වූ ගුරුතුමා කවුද?

සීයා : පුතේ, සර්වමිත්‍ර පඬිතුමා තමයි සිදුහත් කුමරුට ශිල්ප ඉගැන්නුවේ. සර්වමිත්‍ර පඬිතුමා එකල සිටි වැඩිහිටි, දක්ෂ, උගත් පඬිවරයෙක්. එතුමාට විශ්වාමිත්‍ර කියලත් කියනවා. සුද්ධෝදන මහ රජතුමා, ඇදුරුතුමා රජ  මාලිගාවට කැඳවා මෙහෙම කිවුවා. "ඇදුරුතුමනි, අද සිට ඔබයි මගේ පුතාගේ ගුරුතුමා. පුතාට සක්විති රජකුට අවශ්‍ය ශිල්ප උගන්වන්න." ගුරුතුමා බොහෝම සතුටින් කුමරුට ශිල්ප උගන්වන්න භාර ගත්තා.

දුමිඳු : ඉතින් සීයේ, සිද්ධාර්ථ කුමාරයා ඉගෙන ගත්තේ මොනවා ද?

සීයා : රජ කුමරකුට අවශ්‍ය සියලූ දේ ඉගෙන ගත්තා. කඩු ශිල්ප, දුනු ශිල්ප, අකුරු ලිවීම, කියවීම, රාජ්‍ය පාලන නීති රීති ආදි සියල්ල ම ගුරුතුමා හොඳින් ඉගැන්නුවා. කුමාරයා ඒ සියල්ල හොඳින් ඉගෙන ගත්තා. ඒ  වගේ ම කුමාරයා ගුරු බසට හොඳින් කීකරු වුණා.

දුමිඳු : සිදුහත් කුමරු හරි ම දක්ෂයි නේද සීයේ?

සීයා : ඔව් පුතේ, කුමාරයා හරි ම දක්ෂයි. කියා දෙන හැම දෙයක් ම එකවර ඉගෙන ගත්තා. ගුරුතුමා සිදුහත් කුමරු ගැන සතුටු වුණා. රජතුමා සමීපයට ගිය ගුරුතුමා මෙසේ කිවුවා. "රජතුමනි, මම දන්නා සියලූ ශිල්ප කුමාරයා හොඳින් ඉගෙන ගත්තා."

කුමරුගේ දක්ෂතා අහලා රජතුමා පුදුම වුණා, ආඩම්බර වුණා. රජතුමාට හරි ම සතුටුයි. ගුරුතුමාට තෑගි බෝග දුන්නා. තමා උගත් ශිල්පය ගැන කුමාරයා සතුටු වුණා.