අල්ලාහ් විසින් එවන ලද නබිවරුන්ගෙන් නබි සල්ලල්ලාහු අලෛහි වසල්ලම් තුමාණෝ අවසාන නබිවරයා වන්නෝ ය. නබි සල්ලල්ලාහු අලෛහි වසල්ලම් තුමා මක්කමෙහි ඉපදුණේය. එකල ජනයා ජාහිලියියා නම් අඥානවත්කමෙහි ගිලී සිටියහ.

මිනිසුන්ගේ නූගත්කම දුටු නබි සල්ලල්ලාහු අලෛහි වසල්ලම් තුමා බොහෝ කනගාටු විය. මක්කාවේ පිහිටි හිරා ගුහාවට ගොස් තනි ව ම සිට තම සමාජයේ තත්ත්වය පිළිබඳ ව දුක් විය. එම අවස්ථාවේ ඊට විසඳුම ලෙස අල්ලාහ් අවසාන ආගම වන අල් කුර්ආනය පහළ කළේ ය.

අල් කුර්ආනයේ වදන් එකල සමාජයේ ජනයාගේ සිත් තුළ තදින් කාවදින්නට විය. එය ජනයාට යහපත් පුද්ගලයන් ලෙස ජීවත් වීමට මග පෙන්වා දුන්නේය. අල් කුර්ආනය කාලය ගත වීමත් සමග විනාශ නොවන ආගමකි.

එම යුගයේ නබි සල්ලල්ලාහු අලෛහි වසල්ලම් තුමාණන්ගේ අනුගාමිකයන් සහාබාවරුන් ලෙස අමතනු ලැබිණි. අවසාන ආගම වන අල් කුර්ආනය සහාබාවරුන්ට පමණක් නොව, අද දවසේ ජීවත් වන අපටත්, ඉදිරියේ දී අපෙන් පසු ව බිහි වීමට ඇති සමාජයටත් මඟ පෙන්වීමක් ලෙසින් පවතී

මෙය අල් කුර්ආනයේ,

අලිෆ් ලාම් මීම් මෙය (අල්ලාහ්ගේ) ශුද්ධ දේව ග්‍රන්ථයයි. මෙහි කිසි දු සැකයක් නොමැත. (මෙය) භක්තිකයන්ට යහමග පෙන්වන්නකි" යැයි පවසයි. (2: 1,2)

ඉහත සඳහන් අල්ලාහ්ගේ වදන් ජිබ්රීල් අලෛහිස් සලාම් තුමා මඟින් නබි සල්ලල්ලාහු අලෛහි වසල්ලම් තුමාණන් වෙත පහළකරන ලදි. නබි සල්ලල්ලාහු අලෛහි වසල්ලම් තුමාණෝ අල්ලාහ්ගේ මඟ පෙනවීම්වලට අනුව තම ජීවිතය හැඩ ගස්වාගත්තෝ ය. එතුමාගේ වචන, ක්‍රියා හා අනුමත කිරීම් සියල්ල "අස්සුන්නා නැතහොත් අල්හදීස්" ලෙස හැඳින්වේ.

අල්ලාහ්ගේ වදන් වන අල් කුර්ආනය හා නබි සල්ලල්ලාහු අලෛහි වසල්ලම් තුමාණන්ගේ මග පෙන්වීම් වන අස්සුන්නාව අනුගමනය කිරීම අනිවාර්ය වන්නේ ය

එබැවින් අප ද අවසන් ආගම වන අල් කුර්ආනයේ උපදෙස් හා අවසාන දූතයාණන් වන නබි සල්ලල්ලාහු අලෛහි වසල්ලම් තුමාගේ මඟ පෙන්වීම් පිළිපැද දෙලොවෙහි ම ජය ලැබීමට අදිටන් කර ගනිමු.