5 - රසූල්වරු
අල්ලාහු තආලා නබිවරුන්ට හා රසූල්වරුන්ට ආගම් හා සුහුෆ් ප්‍රදානය කළේ ය. මොවුහු ජනයාට යහමඟ පෙන්වූහ. හොඳ දේ අණ කළහ; නරක දෙයින් ඔවුන්ව වැළැක්වූහ; ආදර්ශවත් ලෙස ජීවත් වූහ. එබැවින් ජනයා ඔවුන් අනුගමනය කළෝ ය.
නබිවරුන් හා රසූල්වරුන් ද මිනිසුන් ය. ඔවුහු රැකියාවන්හි නිරත වූහ; පවුල් ජීවිත ගත කළහ. ඔවුහු මිනිසුන් අතර ඉතා ශ්‍රේෂ්ඨයෝ වෙති. අල්ලාහ් ඔවුන් තෝරා ගෙන වහී මගින් මඟපෙන්වීම් ලබා දුන්නේ ය. තව ද ඔවුන්ට ප්‍රාතිහාර්යයන් ද ලබා දුන්නේ ය. ඒවා "මුඃජිසාත්" නම් වේ.
ඔවුහු තමන්ට ලැබුණු මඟපෙන්වීම් ජනයාට ඉදිරිපත් කළෝ ය; ඒ අනුව ම ජීවත් වූහ; ජනයා ඔවුන් පිළිගෙන අනුගමනය කළහ. සමහරු ඔවුන්ගේ දේශනාවන්ට පිටුපා, ඔවුන්ට එරෙහි ව ක්‍රියා කළෝ ය; ඔවුන්ට හිංසා ද කළහ.
එවන් අවස්ථාවල දී ඔවුහු ඉවසීමෙන් සිටියහ. තව ද ඔවුහු එම ජනයා වෙනුවෙන් අල්ලාහ්ගෙන් ප්‍රාර්ථනා ද කළෝ ය.
ඔවුන් තුළ උසස් දැනුම, තීක්ෂණ බුද්ධිය, ඥානය, විනය, ආදර්ශවත් බව යනාදිය දක්නට ලැබිණි.
නබිවරුන් හා රසූල්වරුන් විශ්වාස කරමු. නබි සල්ලල්ලාහු අලෛහි වසල්ලම් තුමාණන් පිළිගෙන එතුමන් අනුගමනය කරමු.