2 - දේව මැවිල්ලේ අගනා වස්තු
උත්පත්ති 2 : 10-15
දෙවියන් වහන්සේ විසින් මවන ලද ඒදන් උයනට ජලය සැපයීමට ගංගාවක් ගලා ගියේ ය. එම ගංගාව උයනින් පිටත දී අතු ගංගා හතරකට බෙදිණි. ඒවා පිෂොන්, ගීහොන් , ටයිග්‍රීස් සහ යුප්‍රටීස් ලෙස නම් කර තිබිණි.
මේ ගංගා අතරින් පිෂෝන් ගංගාව හවිලා නැමැති ප්‍රදේශය වටා ගලා ගියේ ය. එම ප්‍රදේශයේ පොළොව යට රත්රන් තිබිණි. ඒවා ඉතා ඉහළ වටිනාකමින් යුත් අමිශ්‍ර රත්රන් විය.
රත්රන් පමණක් නොව ගන්ධරස ද වටිනා මැණික් වර්ග ද මේ ගංගා ආශ්‍රිත පොළොව යට තැන්පත්ව තිබිණි. ගන්ධරස, නොයෙක් සුවඳ විලෙවුන් සෑදීමට යොදා ගැනේ.
රත්රන්වලින් සහ මැණික්වලින් අලංකාර ආභරණ තනා පැලඳීමට බොහෝ දෙනා ප්‍රිය කරති. මැණික්, පොළොවෙන් ලබා ගන්නා ඉතා ඉහළ වටිනාකමකින් යුත් සම්පතකි. ආභරණ තැනීමේ දී නොයෙක් වර්ගයේ මැණික් යොදා ගැනේ. ශ්‍රී ලංකා පොළෝ තලයේ ද ඉතා වටිනා මැණික් තිබෙන බව ප්‍රසිද්ධ ය.
දෙවියන් වහන්සේ ඒදන් උයනේ මනුෂ්‍යයා පදිංචි කරවීමේ දී ඔහුට උවමනා සියලූ දේ සැපයූ සේක. එහි දී මනුෂ්‍යයාට අවශ්‍ය ආහාර පාන, පලතුරු, ඇළ - දොළ, ගංගා මෙන් ම රත්රන්, ගන්ධරස හා මැණික් වැනි අගනා සම්පත් ද සපයා දුන් ආකාරය විස්මයජනක ය.
අපට ඇළ - දොළ, ගංගා සහ අගනා සම්පත් සපයා දුන්
දෙවි පියාණන් වහන්සේට ස්තූති ප්‍රශංසා වේවා!
යාච්ඤාව
දෙවි පියාණන් වහන්ස, ඔබ වහන්සේ අපට අගනා වස්තු
රැසක් සපයා දුන්නාට ස්තූතියි.
ආමෙන්.