14 - පේදුරුගේ නැන්දණිය සුවය ලබයි
පියතුමා : ජේසු පිහිටයි! දරුවනේ, සබත් පාසල් දරුවන්ගේ තලෙන්ත දැක්ම සඳහා ඉදිරිපත් කරන නාට්‍යය සඳහා සියල්ල සූදානම් කියලා මා හිතනවා. එහෙම නේද?
දෙව්නි : ජේසු පිහිටයි පියතුමා, ඔව්.... අපි සියල්ල සූදානම් කරලා ඉවරයි. අපි රඟ දක්වන්න යන්නේ ජේසුස් වහන්සේ පේදුරුගේ නැන්දණියට සුවය ලබා දුන් අවස්ථාවයි.
පියතුමා : හොඳයි දරුවනේ... එහෙනම් අපි බලමුකෝ පුංචි හපනුන්ගේ දස්කම්.
(ජේසුස් වහන්සේ ධර්ම ශාලාවේ උගන්වමින් සිටිති. පේදුරු තුමා කලබලයෙන් මෙන් ජේසුස් වහන්සේ වෙතට පැමිණ....)
පේදුරු තුමා : ජේසුස් වහන්ස, මගේ බිරිඳගේ මවට උණ හැදිලා. ගොඩාක් අසනීපයෙන් ඉන්නේ. ඇය සුව කරලා දෙන්න.
ජේසුස් වහන්සේ : හොඳයි පේදුරු, මම ඇය වෙනුවෙන් යාච්ඤා කරන්න ඔබේ නිවසට එන්නම්.
( ජේසුස් වහන්සේ ධර්මශාලාවෙන් පිටත්ව පේදුරුගේ නිවසට ඇතුළු වෙති)
පේදුරුගේ නැන්දණිය :ම්.... ම්.... මාව හොඳට ම ගැහෙනවා. අනේ මට හොඳට ම උණ! අනේ ජේසුස් වහන්සේ නේද මේ ඇවිත් ඉන්නේ?
(ජේසුස් වහන්සේ පේදුරුගේ නැන්දණිය දෙස බලා... ඇයට අත තබා යාච්ඤා කරයි. ඇය සුවය ලබයි.)
(එවේලෙහි ම සුවය ලැබූ ඇය කතා කරමින්)
පේදුරුගේ නැන්දණිය : අනේ... මගේ උණ රෝගය දැන් හොඳට ම හොඳයි. මට පුදුම සහනයක් තියෙන් නේ. (ජේසුස් වහන්සේ දෙස බලමින්) මාව සුව කළ නිසා ඔබ වහන්සේට ගොඩාක් ස්තූතියි. ඉන්න... මම ඔබ වහන්සේට කෑමට මොනව හරි පිළියෙල කරගෙන එන්නම්.
පේදුරු :ජේසුස් වහන්ස, ඔබ වහන්සේට ගොඩක් ස්තූතියි.
(රංගනයට සහභාගි වූ සියල්ලෝ ම වේදිකාව ඉදිරියට පැමිණ ආචාර කරති)
පියතුමා : (පියතුමා අත්පොළසන් දෙමින් ) බොහොම අගෙයි දරුවනේ... ඔයගොල්ලො හැමෝ ම හොඳින් පුහුණු වෙලා රංගනය ලස්සනට ඉදිරිපත් කළා.
කවීෂ : බොහොම ස්තූතියි පියතුමනි.
පියතුමා : දරුවනේ, මට ඔයාලගෙ රංගනය දැක්කම එදා ජේසුස් වහන්සේ සුවය දුන් අවස්ථාව මැවී පෙනුණා. උන්වහන්සේ බොහෝ රෝගීන් සුව කළ බව ශුද්ධ බයිබලයේ සඳහන් වෙනවා. උන් වහන්සේට සුව කිරීමේ බලය තියෙනවා. පේදුරු තුමා, තමන්ගේ නැන්දණිය සුව කරලා දෙන්න කියා ජේසුස් වහන්සේගෙන් ඉල්ලූවා. ඔහුගේ ඒ ඉල්ලීම නිසයි ඇයට සුවය ලැබුණේ. ඉතිං අපිත් උන්වහන්සේගේ සුවය ඉල්ලුවොත් උන් වහන්සේ අපිටත් සුවය ලබාදෙනවා
ඒ විතරක් නෙවෙයි පේදුරුගේ නැන්දණිය සුවය ලැබූ පසු ජේසුස් වහන්සේට ක්ෂණිකව‚ උපස්ථාන කරනවා. අපිත් ඒ වගේ අපේ ජීවිතයට උන් වහන්සේ කර ඇති දේවල් ගැන ස්තූති කළ යුතුයි. උන් වහන්සේ අපට ලබා දෙන ශක්තියෙන්, අපට පැවරී ඇති වැඩ ඉටු කළ යුතුයි. ඔබ සැමට ජේසු පිහිටයි.
ළමයි : බොහොම ස්තූතියි පියතුමනි.... ජේසු පිහිටයි.
පුංචි මමත් දෙවිඳුන්ගෙන් නිරතුරු සුවය ලබමි.
කටපාඩම් පදය
"නැඟිට යන්න. ඔබේ ඇදහිල්ල ඔබ සුව කළේ ය"
ශු. ලුක් 17:19