එදා ඇසළ පුන් පෝය දිනයකි. සිදුහත් කුමරු ඡන්න ඇමැති සමග කන්ථක අසු පිට නැඟ අනෝමා ගං තෙර දක්වා ගමන් කළේ ය. අසු පිටින් බැස ගත් සිදුහත් කුමරු කඩුව අතට ගෙන තම කෙස් වැටිය කපා දැමුවේ ය.

“ඡන්න මේ අශ්වයාත් රාජ ආභරණත් පිය රජුට භාර දෙන්න. මා පැවිදි වූ බව දන්වන්න,” යනුවෙන් කුමරු ඡන්නට ප්‍රකාශ කළේ ය.

ඉන්පසු සිදුහත් කුමරු ඝටීකාර නම් බ්‍රහ්මයා විසින් පිළිගන්වන ලද සිවුරු පිරිකර භාර ගෙන පැවිදි වෙස් ගත්තේ ය. ඒ මොහොතේ තම ස්වාමියා අතහැර යන්නට අකැමැති වූ කන්ථක අසුට ශෝකය දරා ගැනීමට බැරි විය. අසු ළය පැලී මරණයට පත් විය.

පැවිදි වූ සිදුහත් බෝසත් තවුසාණෝ අනෝමා ගඟ අසල අනුපිය නම් අඹ වනයෙහි සතියක් කල් ගත කළහ. මේ කාලයේ උන්වහන්සේ ආහාර පිණිස පිඬු සිඟා වැඩියහ. සත්‍යය සොයා යන සිදුහත් තවුසාණන්ට භග්ගව තවුසා හමු විය. ඔහුගේ ධර්මය ඉක්මනින් ඉගෙන ගත් සිදුහත් තාපසතුමා විශාලා මහනුවර ආලාරකාලාම තවුසා වෙත පැමිණියේ ය; එහි දී ආලාරකාලාම තවුසා දැන සිටි ධර්මය ද ඉක්මනින් ම ඉගෙන අවසන් කළේ ය.

ඉන්පසු උද්දකරාමපුත්ත තවුසා වෙත පැමිණි සිදුහත් තාපසතුමා, ඔහු දැන සිටි ධර්මය ද ඉක්මනින් ම ඉගෙන ගත්තේ ය.

ඔවුන්ගේ ධර්මයන් තුළ තමා සොයන සත්‍ය ධර්මය නොමැති බව සිදුහත් තවුසාණන්ට වටහා ගත හැකි විය.

පසුව සිදුහත් තාපසතුමා උරුවෙල් ජනපදයේ සේනානි නම් නියම් ගමට පැමිණියේ ය. එහි නේරංජරා නම් ගඟ අසල වන ළැහැබක් විය. එතුමා එහි නැවතී සත්‍යය සෙවීම සඳහා එකල පිළිගත් තවුස්දම් පුරන්නට පටන් ගත්තේ ය.