පොදුවේ කලිමා සියල්ල ඉස්ලාමයේ මූලික පදනම ඉතා කෙටියෙන් හා සරල වාක්‍ය කිහිපයකින් ලබා දෙන්නේ ය. එම කලිමා සියල්ල නබි සල්ලල්ලාහු අලෛහි වසල්ලම්තුමාණන්ගේ හදීස් මගින් ලබා ගත් ඒවා ය. ඒවා අපට කට පාඩම් කිරීමට හා දික්ර් කිරීමට පහසු ලෙස ඇත.

අපි මුල් ශ්‍රේණිවල දී ද කලිමා ඉගෙන ගත්තෙමු. දැන් අපි පස් වන කලිමාව වන කලිමා රද්දුල් කුෆ්ර් ඉගෙන ගනිමු.

යා අල්ලාහ් නියත වශයෙන් ම මම දැනුවත් ව ඔබට කිසියම් දෙයක් ආදේශ කිරීමෙන් මිදී සිටීමට ඔබේ රැකවරණය පතමි. තව ද මා නොදැනුවත් ව කළ දෙයින් ද ඔබගෙන් පව් සමාව අයදිමි. නියත වශයෙන් ම සැඟවුණු දෑ හොඳින් දන්නේ නුඹ ම ය. මම පාපයෙන් මිදුණෙමි. ඉස්ලාම් දහම හැර අන් දේවලින් බැහැර වූයෙමි. තව ද මම ඉස්ලාම් දහම වැලඳ ගතිමි. විශ්වාසය තැබුවෙමි. තව ද අල්ලාහ් හැර නැමඳීමට සුදුසු අන් කිසිවකු නැතැයි ද මුහම්මද් සල්ලල්ලාහු අලෛහි වසල්ලම්තුමා අල්ලාහ්ගේ දූතයා යැයි ද පවසමි.

අපි මෙම කලිමාව පැවසීමෙන් පහත කරුණු තහවුරු කරන්නෙමු.

• සම්පූර්ණයෙන් ම ෂිර්කයෙන් බැහැර වීම
• සැඟවුණු දේ පවා අල්ලාහ් හොඳින් දැන සිටින බව තහවුරු කිරීම
• ඉස්ලාමය තුළට සම්පූර්ණයෙන් ඇතුළු වීම
  
• එක ම දෙවියා අල්ලාහ් පමණක් බව තහවුරු කිරීම
• මුහම්මද් නබි සල්ලල්ලාහු අලෛහි වසල්ලම්තුමා අල්ලාහ්ගේ දූතයා බව පිළිගැනීම.

ශිෂ්‍යයිනි, ෂෙයිතාන් අපගේ සිත් තුළ විශ්වාස කළ යුතු කරුණු පිළිබඳ සැක ඇති කරමින් ම සිටින්නේ ය. එලෙස ම පව් කරන මෙන් අප පොලඹවමින් ම සිටින්නේ ය. මෙවැනි අවස්ථාවල දී අපගේ ඊමානය රැක ගැනීමට ද එය අලූත් කර ගැනීමට ද කලිමා උපකාරී වන්නේ ය.

• මෙම කලිමාව අරුත සමග කට පාඩම් කරමු
• එය දිනපතා පාරායනය කරමු.