ඈන් :     මේ පින්තූරයේ ඉන්නේ කවුද කියලා දන්නවා ද?

මාක් :     ම්... අසීසියේ ශුද්ධ වූ ෆ්‍රැන්සිස් මුනිතුමා.

ජසින්තා : හරියට ම හරි.

මාක් :     එතුමා පරිසරයට හුඟක් ආදරය කළ බව මම අහලා තියෙනවා.

ජසින්තා : ඔව්, එතුමා ගස් කොළන්වලටත්, සතුන්ටත්, ඉර හඳටත් කතා කළා ලූ. ඒ සැම අමතා ඇත්තේ සහෝදරියා, සහෝදරිය කියලයි.

මාක් :     ඔබේ සුවඳ ටිකක් මටත් දෙන්න සල් මලේ
            එවිට මටත් ඉන්න හැකියි බමරු එන රැළේ
            අරුණ ඉරට හාදු දිදී සිනහ වෙන වෙලේ
            කැන්ද ගහක් උඩට නැංග මගේ මල් වැලේ

ඈන් :    ආ... ඔය සින්දුව... මල් කතා කියන ගීතයේ කොටසක් නේද?

මාක් :   ඔව්. මේක ලියලා තියෙන්නේ ගරු මර්සලීන් ජයකොඩි පියතුමා. එතුමා අපේ රටේ සංගීතයට ලොකු  සේවයක් කළ පියතුමෙක්. එතුමාගේ බොහොමයක්   ගීතවල පරිසරය අගය කරලා තියෙනවා.

ඈන් :  ගරු මර්සලින් ජයකොඩි පියතුමාත් ශුද්ධ වූ ෆ්‍රැන්සිස් මුනිතුමාත් වගේ අපිත් පුංචි කාලයේ සිට පරිසරය අගය කරන්නට හා පරිසරයට ආදරය කරන්නට පුරුදු   වෙන්න ඕනෑ. එහෙම නේද?

ජසින්තා : පරිසරය කිවුවා ම මට මතක් වුණේ, ඊයේ පාසල් වත්තේ කුණු බාල්දි ළඟ කුණු ගොඩ ගැහිලා තිබුණා.

ඈන් : ඔව්, මමත් දැක්කා.

ජසින්තා : පාසල අවසන් වූ පසු අපි එකතු වෙලා සේරම අස් කළා. අපේ ගුරුතුමියත් අපට උදවු කළා. පරිසරය පිරිසිදුව තබා ගන්න හැම දෙනෙක් ම උනන්දු වෙන්න ඕනෑ.

ඈන් : ඔව්, දෙවියන් වහන්සේ තමන් මැවූ ලෝකය මිනිසාට බාර දුන්නා. ඒ නිසා එය ආරක්ෂා කර ගැනීම අපේ යුතු කමක්. ශුද්ධ බයිබලයෙත් ඒ ගැන සඳහන් වෙනවා.

ලෝකය ආරම්භයේ දී දෙවියන් වහන්සේ විසින් මිනිසාට පවරන ලද වගකීම් ඉටු කිරීමට පුංචි අපිත් දායක වෙමු.