3 - ජෝසෙප්
උත්පත්ති 41 : 33 - 49
ආදරණීය දරුවනි,
මම ජෝසෙප්. මගේ පියා ජාකොබ්. ඔහු මට බොහෝ සේ ආදරය කළා. එහෙත් මාගේ සහෝදරයන් මට ඊර්ෂ්‍යා කළ නිසා ඔවුන් මා මිසර දේශයට විකුණුවා. දෙවියන් වහන්සේ ආගන්තුක දේශයක දී මට රැකවරණය ලබා දුන්නා. මා කියන්නට සුදානම් වන්නේ එහි දී ලැබූ මගේ ජීවිතයේ පුදුම සහගත අත්දැකීම් පිළිබඳවයි.
එවකට මිසරය පාලනය කළ පාරාවෝ රජු සිහින දෙකක් දැක තිබුණා. එක් සිහිනයක් තමයි කෙසඟ එළදෙනුන් හත් දෙනකු විසින් තරබාරු එළදෙනුන් හත් දෙනකු කා දමනු ලැබීම. අනෙක් සිහිනය නම් නිසරු ගොයම් කරල් හතක් විසින් රන්වන් පැසුණු ගොයම් කරල් හතක් ගිල දමනු ලැබීම. මෙම සිහින දෙක පාරාවෝ රජුට තේරුම් කර දීමට කිසිවකු සමත් වුයේ නෑ. ඒ නිසා මෙම සිහින තේරීමේ අවස්ථාව පාරාවෝ රජු මට ලබා දුන්නි. එම සිහිනවල තේරුම නම් මිසරයට මුලින් සශ්‍රීක අවුරුදු හතක් පැමිණෙන අතර ඉන් පසුව අවුරුදු හතක් පුරා එහි සාගතයක් ඇති වන බවයි.
සිහින තෝරා දීමෙන් පසු මම කදිම අදහසක් පාරාවෝ රජතුමාට ඉදිරිපත් කළා. එනම් දක්ෂ පුද්ගලයෙකු සොයා මිසර දේශයේ පාලනය ඔහුට පැවරිය යුතු බවත් තවත් නිලධාරීන් පත් කොට සශ්‍රීක අවුරුදු හත තුළ සියලූ ආහාර වර්ග එකතු කර ගබඩා කළ යුතු බවත් මා පැවසුවා. එම ආහාර ආරක්ෂාකාරිව තබා ගැනීමෙන් සාගතය පවතින අවුරුදු හත තුළ රට විනාශ නොවී බේරා ගත හැකි බවත් මා කියා සිටියා. පාරාවෝ රජු මගේ යෝජනාවට එකඟ වුණා.
දෙවියන් වහන්සේ මට මේ සියලූ කාරණා තේරුම් කර දීමට මඟ පෙන්වුවා. මා ඉදිරිපත් කළ යෝජනා පිළිබඳ සතුටට පත් වු පාරාවෝ රජු මුළු මිසර දේශයේ ම දේශාධිති බවට මා පත් කළා.
ඇත්තට ම මට මෙය පුදුම සහගත අත්දැකීමක්. දෙවියන් වහන්සේ මගේ ජීවිතය නොසිතු ලෙස උසස් කළා. මිසරයට මා පැමිණියේ වහලකු ලෙස. එහි දී බොහෝ ප්‍රශ්ණවලට හා ගැටලූවලට මුහුණ දීමට සිදුවුණත් දෙවියන් වහන්සේ ඒ සැම අවස්ථාවකදී ම මා හට රැකවරණය ලබා දුන්නා.
සශ්‍රීකව අවුරුදු හත තුළ සියලූ ආහාර වර්ග රැස්කොට ගබඩා කරනු ලැබුවා. මුහුදේ වැලි මෙන් විශාල ප්‍රමාණයක් ධාන්‍ය රැස් කිරීමට අපට හැකි වුණා. ධාන්‍ය මැනීමට බැරි තරම් අධික වූ නිසා ඒවා මැනීම පවා නතර කළා. සැබැවින් ම මෙතරම් ආශීර්වාදයක් අපට ලබා දුන්නේ දෙවි පියාණන් වහන්සේ යි. සාගත අවුරුදු හත තුළ පවා අපට කිසිදු හිඟයක් වුණේ නෑ. දෙවි පියාණන් වහන්සේ ට මම බොහෝ ස්තුතිවන්ත වෙනවා. උන්වහන්සේ මගෙ ජීවිතයට පමණක් නොව මිසර දේශයේ ම ජනතාවටත් රැකවරණය ලබා දුන්නා.
දරුවනි, දෙවි පියාණන් වහන්සේ මගේ ජීවිතය දිනෙන් දින උසස් කළා, රැකවරණය ලබා දුන්නා. මගේ ම සහොදරයන් ආගන්තුක දේශයකට මා විකුණුවත් උන්වහනිසේගේ අනර්ඝ සැලසුම තුළ මා උසස් තත්වයකට පත් කළා. දෙවි පියාණන් වහන්සේ සැම විට ම මා සමග සිටියා. දෙවි පියාණන් ඔබටත් නිරතුරු රැකවරණය ලබා දෙනවා; ඔබ සැමට ජේසු පිහිටයි.
මීට,
ජෝසෙප්
ජෝසෙප් මෙන් අපිත් නිරතුරු දෙවි පියාණන් වහන්සේගෙන්
රැකවරණය ලබමු!