වේදිකාවක් මත නළුනිළියන් පිරිසක් රංගනයෙන් ඉදිරිපත් කරන්නා වූ කතාවක් නැරඹීම, අපට සතුටු විය හැකි අද්දැකීමකි. නළුනිළියෝ කතාවේ එක් එක් චරිත ලෙස විවිධ ඇඳුම් ඇඳ මුහුණු ඊට ගැළපෙන සේ වර්ණ ගන්වා ගෙන රඟපාති. ඔවුන්ගේ දෙබස් ඇතැම් විට ගායනා ස්වරූපයෙන් ද ඇතැම් විට කතා කරන ආකාරයෙන් ද ඉදිරිපත් කෙරේ. නාට්‍යවල දී වේදිකාව මත විවිධ උපකරණ සහ සැරසිලි යොදා ගෙන කතාවට සම්බන්ධ පරිසරය මවා පෙන්වීම ද දැකිය හැකි ය. සංගීතයෙන් රසවත් වූ කල වේදිකා නාට්‍යය අප ඇස් හමුවේ මවන්නේ සුන්දර ලෝකයකි. මේ පාඩමට ඇතුළත් වන්නේ සෝමලතා සුබසිංහ මහත්මිය නිර්මාණය කළ පුංචි අපට දැන් තේරෙයි නාට්‍යයේ පිටපතයි. කුකුළු හාමි සහ මී හාමිලාගේ චරිත ඇසුරෙන් එතුමිය අපට කියා දෙන්නේ මොනවා දැයි බලමු.

(මල් පාත්තිය මෙන් රඟපාන ගායක පිරිස අභිනය සහිතව වේදිකාව ඉදිරියට ගමන් කරමින්)

පුංචි කතාවක් කියන්න
පුංචි අපට සවන් දෙන්න
පුංචි පුංචි වැරදි ඇතත්
පුංචි අපට සමාවෙන්න.

(ගායක පිරිස පසුපසට ගමන් කරමින්)

පුංචි අපේ කතන්දරේ
කුකුළු හාමි කෙනෙක් වෙතයි
මී හාමිලා හතර දෙනයි
වත්තේ මල් ගස් මෙ අපය

(කුකුළු හාමි එළියට එයි. මී හාමිලා හතර දෙනා දිව එති. ගායක පිරිස මල් පාත්තිය මෙන් සිට ගනිති.)

කුකුළු හාමිගේ
ගෙදර කොතන දෝ?
කුකුළු හාමිගේ
ගෙදර මෙතැන වේ
වෙලාව කියනා
මූණ කොතැන දෝ?

වෙලාව කියනා
මූණ මෙතැන වේ.
මල් පාත්තිය කොතැන තිබුණි?
මල් පාත්තිය මෙතැන තිබුණි
කතන්දරේ කොහොම වුණේ?
කතන්දරේ මෙහෙම වුණේ.

(කුකුළු හාමි වේදිකාව පසුපසින් ඉදිරියට එයි. තම රාජකාරි කටයුතු ගෙදර දොරේ කටයුතු කෙරෙහි යුහුසුලූ වන බව අභිරූපණය කරයි)

ඈත එපිට ගම්මානෙක
උදෙන් නැගිට
බස බස ගා තටු විහිදා
කුක්කු කූ කුක් කියලා
ඉර පායන ආරංචිය
නො වරදවා ගමට කියන
නියම වෙලාවට හඬලන කුකුළෙක් හිටියා.

ඉර පායන ආරංචිය
මුදුනට එන ආරංචිය
ඉර බැස යන ආරංචිය
මුළු ගමට ම කියා සිටින
රාජකාරි භාරකාර
කුකුළු හාමි හරි දස්සයි.

කම්මැළිකම අහලත් නැති
වැඩට පළට හොඳට කැමති
සැම කෙනෙකුට හොඳ හිත ඇති
කුකුළු හාමි

තමන්ට ඇති රාජකාරි
ඉටු කරන්නේ හොඳ සතුටින්.

(මී හාමිලා හතර දෙනා එහෙ මෙහෙ දුවති.)

මී හාමිලා හතර දෙනයි
ඉන්ඩ තැනක් උන්ට නැතෙයි
කන්ඩ දෙයක් උන්ට නැතෙයි
බොන්ඩ දෙයක් උන්ට නැතෙයි.

1 වැනි මීයා : කිසිම දෙයක් ලැබුණේ නෑ
                කුස්සි ගානෙ ඇවිද්ද මං
                දැන් ඉස්සර වගේ ගෙවල
                වැඩිපුර කෑමත් නෑනේ.

2 වැනි මීයා : මටත් නෑනේ
                මොකුත් ලැබුණේ
                ගහක කොළක
                පලතුරු නෑ
                දලූ කොළ නෑ
                මිනිස්සු සූරාගෙන කාලා.

3 වැනි මීයා : මිදුලක විසිකරපු දෙයක්
                කසළ ගොඩක
                දාපු දෙයක්
                අපි වාගේ අයට කන්න
                නෑ දැන් ඉතුරුවක් වෙන්නේ.

සියල්ලෝ ම : හෝ හෝ ගාලා වැස්සක්
                 අඬු පුප්පා එන ඉස්සෙක්
                 දැන් දැන් මේ ළඟ එනවා
                 ගෙයක් සොයන්නට වෙනවා.

4 වැනි මීයා : ගෙයක් හදා ගත්තත් දැන්
                 ඇඳ ඇතිරිලි
                 කොට්ට මෙට්ට
                 හදා ගන්න ලේසි නෑනෙ
                 ඉස්සර වාගේ නෙව දැන්
                 මිනිස්සු හරි පිරිමැස්මයි
                 කඩමල්ලක් කඩදහියක්
                 ගෙදර දොරක
                 අපතෙ නො යයි.
                 දැකල නැද්ද පුංචි පිරිමි ගැහැනු ළමයි?
                 පාර තොටක කඩදහියක්
                 ඉතුරු නො කර එකතු කරත්!

1 වැනි මීයා : සංස්ථාවක් කියලා තැනක
                ලියන, කියන, අඳින, ඔතන
                කඩදහි හදලා දෙනවලූ
                අහක දාන කඩදාසිත්
                එතනට මිලයට ගනීලූ.

2 වැනි මීයා : ඉතිං මොකද දැං කරන්නේ?

1 වැනි මීයා : අහල නැද්ද එහා ගමේ
                 කුකුළු හාමිගෙ විස්තර
                 අසරණ අපි වගේ අයට
                 උදවු දෙන්න හරි කැමතිලූ.

සියල්ලෝ ම : එහෙනං අපි එහාට යමු
                 ගිහිං කුකුළු හාමි සොයමු
                 යමක් කමක් කරලා දීලා
                 ඉන්ට කන්ට
                 සොයා ගනිමු

(පිරිස ගායනා කරති. මීයෝ අභිරූපණය කරති.)

නියර දිගේ
දුවගෙන ගොස්
ඒ දණ්ඩෙන්
එගොඩ වෙලා
කඳු නැගලා කඩුලූ පැනලා
මී හාමිලා හතර දෙනා
කුකුළු හාමි සොයා යතෙයි.

2 වැනි මීයා : අන්න අතන පේන
                 ගෙදර වෙන්ටැ
                කුකුළු හාමි ඉන්නේ.

(සියල්ලෝ ම කුකුළු හාමිගේ ගේ දෙස එබී බලා)

දොර නම් වසා ඇත
ගෙයින් පිට ගොස් වත් ද?

1 වැනි මීයා : මිදුලෙ තියෙන මල් පාත්තියේ
                හරි ලස්සන මල් පිපිලා
                ඒ අය හරි සිරියාවයි
                තොරතුරු දැන ගත හැකි වෙයි.

(මීයෝ මල් පාත්තිය වෙතට ගොස්)

ලස්සන මල් කුමරුනේ
ලස්සන මල් කුමරියනේ
උදවු සොයා අපි එන්නේ
කුකුළු හාමි
කොයි ඉන්නේ?

මල් පාත්තිය : එන්න, එන්න
                 මෙහේ එන්න
                 කුකුළු හාමි
                මෙහෙයි ඉන්නේ.

මීයෝ : අපි ආවේ උදවු ගන්න
          ඉන්න කන්න
          සොයා ගන්න
          කුකුළු හාමි
          හරි හොඳයිලූ
          උදවු දෙන්න හරි කැමතිලූ.

මල් පාත්තිය : අපොයි කුකුළු හාමි අගෙයි
                 උදවු දෙන්න කැමති තමයි
                දඟ නොකරන හොඳ ළමයින්
                බලා ගනියි හොඳ සතුටින්.

එක් මලක් : ගෙයි ඉන්නවා කුකුළු හාමි
               ගොහින් කතා කර බලන්න.

මීයෝ සියල්ලෝ ම : කිට්ටු කරලා දොර ළඟටා
                         තට්ටු කරලා බැලූ කලටා
                        දැන ගත හැකි කුකුළු හාමි
                        ඉන්නවා ද නැද්ද කියලා.

(එකිනෙකා පසුබසිමින්)

1 වැනි මීයා : කවුදැයි කවුදැයි
                ඉස්සර වෙන්නේ?
                ඉස්සර ගොස් දොර
                තට්ටු කරන්නේ?

4 වැනි මීයා : මං නං නෑ ඕං
                ඕව කරන්නේ.

1 වැනි මීයා : වෙන නුවණක් ගැන
                සිතා බලන්නේ.

(කුකුළු හාමි එළියට එයි)

මලක් : එච්චර කරදර මොකටද?
         කුකුළු හාමි අර එන්නේ
        ගොහින් කතා කර බලන්න.

(කුකුළු හාමි වට පිට බලයි.)

මීයෝ සියල්ලෝ ම : ආයුබෝවන් කුකුළු හාමි!

කුකුළු හාමි : ආයුබෝවන් පොඩි දරුවෙනි,
               ඉතිං මොකද මේ පැත්තේ
               ඇයි ද කතාවක් නැත්තේ?

මීයෝ : කුකුළු හාමි මේ අහන්න
          නැතෙයි අපට
          කන්න බොන්න
          නැතෙයි අපට නිදා ගන්න
          අනුකම්පාවක් කරන්න
          අපට කන්න
          ඉන්න දෙන්න
          කුකුළු හාමි කියන වැඩක්
          අපගෙ ඇහැට
          පෙනෙන වැඩක්
         කර දී අප උදවු වෙන්න
         අනුකම්පාවක් කරන්න.
         අපට කන්න ඉන්න දෙන්න.

කුකුළු හාමි : හුරුබුහුටියි මේ පැටවුන්
               අහිංසකයෝ වගේ පෙනෙයි
               මගේ පාළුවටත් එක්කල
               ඉඳුම් හිටුම් දීම හොඳයි.
               සැමදා ඉස්කෝලෙ යන්ට
               පොතපත පාඩම් කරන්න
               ලියනු කියනු ඉගෙන ගන්ට
               හොඳ කීකරුවට හිඳින්ට
              කැමති ළමයි ඉන්නව නම්

කැමතියි මම ඉන්ට දෙන්න
කැමතියි මම කන්ට දෙන්න.

පිරිස: අසරණ පැටවුන්ට ඉතින්
        නැති හන්දා යන්ට තැනක්
        නැති හින්දා කන්ට දෙයක්
        කුකුළු හාමි දුක හිතිලා
        ඉඳුම් හිටුම් දුන්නා.

(පිරිස ගායනා කරන විට නළුවෝ නටති. අභිරූපණය කරති.)

අතුරු මිතුරු දඹදිවතුරු
රාජ කපුරු සෙට්ටියා//
හතර දෙනා දඟකාරයි
කතුර වගේ කට සූරයි
නිතර වගේ සෙල්ලමෙන් ම
දවස ගත කළා.
උදෙන් ම පාසැලට ගියේ
සවසට සෙල්ලම් පිටියේ
පොතපත මුල්ලක වූයේ
පොරොන්දු අමතක ව ගියේ
කුකුළු හාමි කියපු වැඩක්
උන්ගේ ඇහැට
පෙනුණු වැඩක්
කරලා උන් උදවු වුණේ
නෑ පොරොන්දු
අමතක නේ
හතර දෙනා දඟකාරයි
බෝලෙ පිත්ත අතේ තමය

නිතර වගේ සෙල්ලමෙන් ම
දවස ගත කළේ
ගෙදර දොරේ
වැඩ ඔක්කොම
කුකුළු හාමි අතේ තමයි
හතර දෙනා නම් කිසි විට
උදවු කළේ නෑ.
(කුකුළු හාමි අභිරූපණය කරයි.)

කුකුළු හාමි
උදෙන් නැගිට
මුළු ගමට ම
වෙලාව දී
ඩාං ඩාං ඩාං ඩාං ඩාං ඩාං ඩාං ඩා.
ගෙදර දොරේ
කටයුතු ගැන
කම්මැළි නෑ
කඩිසර වෙයි//
කෑම පිහලා කුකුළු හාමි
ගේ අතු ගා කුකුළු හාමි
ඉදල අරන් කුකුළු හාමි
මිදුලට බැස්සේ දවසක්//

මල් පාත්තිය : කුකුළු හාමි
                කොක්! කොක්! කොක්!
                පිදුරු මඩුව
                අතුගාන්නේ.

කුකුළු හාමි: මොකක් බොලේ
              චක්! චක්! චක්!
              බිම වැටිලා තියෙන්නේ
              වී කරලක්!
              හොඳට පැහුණු
              රන්වන් වූ වී
              කරලක්!
              වී ටික කොටලා ගත්තොත්
              පිටි කොටලා කැවුම් සදා
              පුංචි උන්ට
             කන්න ඇහැකි.
             (මීයන්ට අඬ ගසා)
             මෙහෙ වරෙල්ලා දරුවනේ
             මේ වී කරලත් ගෙනේ
             මෝලට ගොස් කඩිනමේ
             කොටා ගෙනෙල්ලා.

1 වැනි මීයා: ගෙදර වැඩක් අල්ලල නෑ
                ගණන් හදා ගෙන
                නොගියොත්
                දෙවි පිහිටයි මට!

2 වැනි මීයා: ලංකාවේ සිතියමකුයි
                ගංගාවල් වරායවල්
                ඇඳ ගෙන යන්නට
                ඇත මට.

3 වැනි මීයා: මගේ ඔළුව
               කැක්කුම වගේ
               බඩත් ටිකක් රිදෙනවා!

4 වැනි මීයා : කෝ මාගේ වයලීනය
                 පුරුදු වෙලා
                නොගියෝතින්........!

කුකුළු හාමි : හා හා මට තේරෙනවා
               කාටත් හරියට වැඩ බව
               හොඳයි කාට වත් බැරි නම්
               මම් ම කොටා ගෙන එන්නං.

පිරිස : කම්මැළි නෑ
        කුකුළු හාමි
        වී කරලත් මල්ලක දා
        වී කොටලා එන්ට යතෙයි
        මී පැටවුන් දඟකාරයි
        හිත සැම විට සෙල්ලමටයි
        කුකුළු හාමි ගෙදරින් පිට
        ගියොත් සෙල්ලමේ ම තමයි.

මී හාමිලා : කුකුළු හාමි එන්ට
             කලියෙන් අපි
             බෝල අතක්වත්
             සෙල්ලම් කරමු ද?
             හරි හරි
             මෙන්න බෝලෙ
             මෙන්න පිත්ත
             මමයි බෝල්
             මමයි බැටිං
             හරි හරි.

පිරිස : හතර දෙනා දඟකාරයි
        කතුර වගේ කට සූරයි
        පාඩම් වැඩ කොහොම වුණත්
        සෙල්ලම දැන් හරි සාරයි.

මී හාමිලා : කුකුළු හාමි අර එන්නේ
             වී ටික කොටලා එන්නේ
             හංගපල්ලා බෝලෙ පිත්ත
             හංගපල්ලා බෝලෙ පිත්ත.

1 වැනි මීයා : පාඩම් පොත අරගන්නේ.

2 වැනි මීයා : සිතියම් පොත මම ගන්නේ.

3 වැනි මීයා : බඩ අල්ලං මම ඉන්නේ.

4 වැනි මීයා : වයලීනය කොහෙද අනේ?

පිරිස : දඟ කළ බව පුංචි එවුන්
        ඈත තියා දුටුව නමුත්
        කුකුළු හාමි කරුණාවයි
        බැනුම් බසක්
        ඔහේ නැතෙයි.

කුකුල් හාමි : මෙන්න හාල් මං ගෙනාව
                කැවුම් කන්න
                ආස කෙනෙක්
                එන්න ඇවිත්
                පිටි කොටන්න

මී හාමිලා : 1.  මං කවි පාඩම් කරනවා!
              2.  සිතියම් ඇඳ ඉවර නැතේ!
                   මට තව වැඩ ගොඩක් ඇතේ!

              3. මගේ ඔළුව කැක්කුම වගේ! බඩත් තවම රිදෙනවා!
              4. සා.... රි.... ගා.... ම!

කුකුළු හාමි : ඔව් ඔව් මට තේරෙනවා
               කාටත් හරියට වැඩ බව
               ඉතින් කාටවත් බැරි නං
               ඒකත් මං කොටන්නංකෝ.

පිරිස : ඩෝං ඩෝං
         පිටි කොටපං//
         සුරුං සුරුං පිටි හලපං//
         පිටි කොටලා පිටි හලලා
         කුකුළු හාමි හඬලනවා//

කුකුළු හාමි : පිටි කොටලා පිටි හලලා
                සුදට සුදේ බලපල්ලා
               කැවුම් කන්න ආස කෙනෙක්
               කැවුම් උයා කාපල්ලා.

1 වැනි මීයා : අපේ අප්පෝ තෙල් තාච්චිය
                 පෙරළුණොතිං මම ඉවරයි!

2 වැනි මීයා : ගින්දර අල්ලන්න එපා
                 අපේ අම්මා මට කිව්වා!

3 වැනි මීයා : කැවුම් කන්න පණු ගායට
                 පුංචි උන්ට හොඳ නැහැල්ලූ!

4 වැනි මීයා : මම නැහැ පැණි රහට කැමති!

කුකුළු හාමි : හොඳයි කාට වත් බැරි නං
                කැවුම් ටිකත් උයන්නංකෝ.

පිරිස : පිටිත් කොටා ගෙන
        පැණිත් සොයා ගෙන
        තෙලූත් සොයා ගෙන
        දරත් සොයා ගෙන
        ළිප හදලා තාච්චියේ
        කැවුම් ඉදෙන්නේ
        චෝස් චෝස් චිරි චිරි චිරි
        කැවුම් ඉදෙන්නේ
        තරිකිට කැවුම් ඉදෙන්නේ.

1 වැනි මීයා : හරි සුවඳයි!

2 වැනි මීයා : අම්මප ඔව්!

3 වැනි මීයා : පිඟන් ගෙනෙල්ලා
                 පිඟන් ගෙනෙල්ලා
                 කැවුම් කන්ට අපි
                 යන්ට වරෙල්ලා//

සියල්ලෝ ම : තක්කිට තරිකිට තරිකිට
                 කැවුම් ඉදී ඇතෙයි.
                 පිඟාන පිරිලා
                 කැවුමෙන් මේසය උඩ වෙයි.

                 අම්මගේ කොණ්ඩය වගේ ම
                 ඒ කොණ්ඩය වෙයි.
                 අපටත් කැවුමක් කන්නට
                 සිකුරට ලැබෙතෙයි.

පිරිස : ඉවසුම් නෑ මී පැටවුන්ට
        සුවඳ කැවුම් රස කර කන්ට
        කුකුළු හාමි එය දැන හොඳට
        සිටී ඒ වග නො දැනුණ ලෙසට‍ෙ

1 වැනි මීයා : කුකුළු හාමි කරුණාවයි
                 අප ගැන අනුකම්පාවයි
                 කැවුම් උයා මහන්සියි ද?
                 කැවුම් හොඳට පදම් වී ද?

කුකුළු හාමි : අපොයි ඒක සුළු වැඩක්නෙ
               කැවුම් පිහුම් සෙල්ලමක්නෙ
               මේ ළමයින් හට නෑනේ
               නිවාඩුවක් සෙල්ලමකට.

මීයෝ : ඒක හැබැයි කුකුළු හාමි
පොතේ පතේ වැඩ
බොහොමයි
ගුරුතුමා ද බොහෝම වසයි
ගෙදර වැඩත් නිතර තිබෙයි.

කුකුළු හාමි : ඔව් ඔව් මම නො දන්නවද?
                ඔව් ඔව් මම නො දුටුවාද?
                හොඳ කීකරු මේ ළමයින්

                පාඩම් කළ හැටිය හොඳින්
                පොතේ පතේ වැඩ කරලා
                සංගීතය හුරු වීලා
                ඉස්කෝලෙට පේ වීලා
                මහන්සි ඇති නේද ළමයි?

මීයෝ : අපොයි අපට හරියට වැඩ
          ගෙදර දී කර ගෙන යන්නට
          ගුරුතුමාට පෙන්නන්නට
          ඉස්කෝලෙට ගියා ම හෙට.

කුකුළු හාමි : මේ කැවුම් හරි රසයි...

මීයෝ : ඔව්!

කුකුළු හාමි : ඒ වගේ ම හරි හැඩයි...

මීයෝ : ඔව්!! ඔව්!!

කුකුළු හාමි : හරි ම හරි සුවඳයි...

මීයෝ : ඔව්!!! ඔව්!!! ඔව්!!!

කුකුළු හාමි : කටටත් කෙළ උනනවා...

මීයෝ : ඔව්!!! ඔව්!!! ඔව්!!! ඔව්!!!

කුකුළු හාමි : කවුදැයි කවුදැයි කරල ගෙනාවේ?

මීයෝ : කුකුළු හාමි නොවැ කරල ගෙනාවේ.
          රන්වන් ඒ වී කරල ගෙනාවේ.

කුකුළු හාමි : කවුදැයි වී ටික කොටලා ගෙනාවේ?

මීයෝ : (ඉතා උද්‍යෝගිමත්ව)
          කුකුළු හාමි නොවැ
          කොටලා ගෙනාවේ.
          මෝලට ගොස් වී
          කොටලා ගෙනාවේ.

කුකුළු හාමි : කවුදැයි ඉන් පිටි කොටලා ගත්තේ?

මීයෝ : කුකුළු හාමි නොවැ
          කොටලා ගත්තේ.
          කොටාපු පිටි ටික හලලා ගත්තේ.

කුකුළු හාමි : කවුද කැවුම් ටික උයලා ගත්තේ?

(පසු බසිමින්)

මීයෝ : කුකුළු හාමි මයි උයලා ගත්තේ.

කුකුළු හාමි : කවුද කැවුම් ටික කන්නට ඕනෑ.

මීයෝ : (පරාජිත ව) කුකුළු හාමි මයි කන්නට ඕනෑ.

පිරිස : වී කොටන්න බෑ.
        පිටි කොටන්න බෑ.

       (මීයෝ ආපසු හැරී යති.)

       කිසිම වැඩක් බෑ.
       ඉතින් කැවුම් කන්ට බෑ.

කුකුළු හාමි : හා හා දරුවනේ
               යන්ට එපා දරුවනේ
               අදට කැවුම් කාපල්ලා
               නමුත් මේක අහපල්ලා
               මේ ලෝකේ කවුරු නමුත්
               වැඩපළ නො කරනවා නම්
               නිකම් ඔහේ පුටු පිට ඉඳ
               කන්ට හොඳත් නෑ.

සියල්ලෝ ම : පුංචි අපට දැන් තේරෙයි//
                 පුංචි පුංචි ඔළු එකතුව
                 පුංචි පුංචි අත් එකතුව
                 පුංචි අපට ලොකු දේවල්
                 කරන්ට බැරි නෑ//
                මේ ලෝකේ කවුරු නමුත්
                වැඩපළ නො කරනවා නම්
                නිකම් ඔහේ පුටු පිට ඉඳ
                කන්ට හොඳත් නෑ.
                පුංචි අපට දැන් තේරෙයි!
                පුංචි අපට දැන් තේරෙයි!!