මේ පාඩමට ඇතුළත් වන්නේ අරීසෙන් අහුබුදු සූරීන් පබැඳූ ගීතයකි. සී.ඩී. ෆොන්සේකා සහ ෂර්මිලා ෆොන්සේකා ගායනා කළ මේ ගීතයේ සංගීත නිර්මාණය ද සී. ඩී. ෆොන්සේකාගේ ය. පියකු හා දුවක අතර සිදු වන සංවාදයක් ගීතාත්මක ලෙස ඉදිරිපත් කෙරෙන මේ ගීතය රස විඳ එයින් කියවෙන අදහස විමසා බලන්න.

දුව:- සමන් වැලේ මල් ජයට පිපීලා
      මුළු මිදුල මැ සුවඳයි - අපේ මේ
      මුළු මිදුල මැ සුවඳයි

පියා:- හැම ගෙදර මැ මල් ජයට පිපේ නම්
       ගම්මානෙ මැ සොඳුරුයි - දුවේ මේ
       ගම්මානෙ මැ සොඳුරුයි

දුව:- ගමින් ගමට මල් කැකුළු පිපෙන විට
      මගෙ රට හරි සුවඳයි - පියාණෙනි
      මගෙ රට හරි සුවඳයි

පියා:- රටින් රටට සුව සුවඳ දුවන විට
        මුළු ලෝකෙ මැ සුවඳයි - දුවේ මේ
        මුළු ලෝකෙ මැ සුවඳයි

දුව:- සමන් මලක් වී පිපෙන්න ආසයි
      මගෙ මේ ගේ මිදුලේ - පියාණෙනි
      මගෙ මේ ගේ මිදුලේ

පියා:- සමන් වැලක් වී පිපෙන් දුවේ
        ජීවිත මල් ගොමුවේ
        පර වී හැළුණත් මිනිස් මලේ
        පවතී සුවඳ ලොවේ