නබි සල්ලල්ලාහු අලයිහි වසල්ලම් තුමාගේ පවුලේ උදවිය අහ්ලූල් බයිත් යනුවෙන් හඳුන්නු ලැබේ.

නබි සල්ලල්ලාහු අලෛහි වසල්ලම් තුමාගේ දුව වන ෆාතිමා රළියල්ලාහු අන්හා තුමිය, නබි සල්ලල්ලාහු අලෛහි වසල්ලම් තුමාගේ බෑනා හා ඥාති සහෝදරයෙකු වන අලි රළියල්ලාහු අන්හු තුමා, සුළු පියවරුන් වන හම්සා රළියල්ලාහු අන්හු තුමා, අබ්බාස් රළියල්ලාහු අන්හු තුමා, මුනුබුරන් වන හසන් හුසෙයින් රලියල්ලාහු අන්හුමා යනාදීහු අහ්ලූල් බයිත් ඝනයට අයත්වෙති. මොවුන්ගේ විශේෂත්වයත්, ඉස්ලාමය වෙනුවෙන් ඉටු කළ කාර්යභාරයත් වටහාගත යුතු ය. එසේම ඔවුන්ගේ ආදර්ශයන් පිළිපැදිය යුතු අතර ඔවුන්ට ස්නේහය කිරීමද අනිවාර්ය වේ.

ෆාතිමා රළියල්ලාහු අන්හා තුමිය

මුහම්මද් සල්ලල්ලාහු අලෛහි වසල්ලම් තුමාට හා කදීජා රළියල්ලාහු අන්හා තුමියට දාව නුබුවතයට වසර 5කට පෙර මක්කාවේ මෙතුමිය ඉපදුණා ය. හිජ්රි දෙවන වසරේ අලි රළියල්ලාහු අන්හු තුමා මෙතුමිය විවාහ කරගත්තේ ය. මෙතුමියට දාව හසන්, හුසෙයින් නමැති පිරිමි දරුවන් ද ගැහැනු දරුවන් තිදෙනෙක් ද උපන්නෝ ය. ෆාතිමා රළියල්ලාහු අන්හා තුමිය ඉස්ලාමය ශීලවන්ත ලෙස අනුගමනය කළා ය. දැඩි දුක්ඛිත තත්ත්වයේ දී ත් මෙතුමිය ඉවසීමෙන් කටයුතු කළා ය. ආගන්තුකයින්ට කැමැත්තෙන්ම සංග්‍රහ කළා ය. තමන් සතු දෑ දන් දුන්නා ය. දිනක් තමන් සතුව තිබු පොරොවනයක් යුදෙව්වෙකුට විකුණුවා ය. එම අවස්ථාවේ පැමිණි යාචකයකුට එම මුදල ද දන් දුන්නා ය.

දිනක් නබි සල්ලල්ලාහු අලෛහි වසල්ලම් තුමාණෝ කඃබාවේ සලාතයේ යෙදි සිටියහ. එවිට කුරෛෂි කාෆිර්වරුන්ගෙන් සමහරෙක් නබි සල්ලල්ලාහු අලෛහි වසල්ලම් තුමාගේ ශරීරයේ ඔටු බඩවැල් දැමූ හ. හිස එසවීමට නොහැකි ව නබි සල්ලල්ලාහු අලෛහි වසල්ලම් තුමාණෝ සුජූදයේ ම සිටියහ. එම අවස්ථාවේ එතැනට පැමිණි දුව ෆාතිමා රළියල්ලාහු අන්හා තම දෑතින් ම ඒවා ඉවත් කළා ය.

සලාතයේ යෙදීමෙහිත්, සවුම් රැකීමෙහිත් වැඩි කාලයක් ගත කළා ය. කරුණාව දයාව, ලැදියාව, මෙන් ම පරිත්‍යාගය මෙතුමිය වෙත දක්නට ලැබිණි. උඩඟුබව අත්හැර දුගී බව ප්‍රිය කළා ය.

ෆාතිමා රළියල්ලාහු අන්හා තුමිය කෙරෙහි නබි සල්ලල්ලාහු අලෛහි වසල්ලම් තුමාණෝ අධික ලෙස ආදරය දැක්වුහ. 'සමස්ත ලෝක කාන්තාවන්ගේ නායිකාව' වශයෙනුත් 'ස්වර්ගවාසී කාන්තාවන්ගේ නායිකාව' ලෙසිනුත් නබි සල්ලල්ලාහු අලෛහි වසල්ලම් තුමාණෝ මෙතුමිය වර්ණනා කළහ.

නබි සල්ලල්ලාහු අලෛහි වසල්ලම් තුමාණන් වෆාත්වී මාස 6කට පසුව එනම් තම 28 වන වියේ ෆාතිමා රළියල්ලාහු අන්හා තුමිය මදීනාවේ දී වෆාත් වූවා ය.