ශුද්ධ බයිබලයේ නව ගිවිසුමේ ඇතුළත් ග්‍රන්ථ 27න් පළමු ග්‍රන්ථ හතර "ශුභාරංචි" යනුවෙන් හැඳින්වේ. ඒවා ලියන ලද කතුවරුන්ගේ නමින් ඒවා හඳුන්වනු ලබයි. ක්‍රිස්තුන් වහන්සේගේ උපත, සේවය, ඉගැන්වීම්, උකුත්වීම හා උත්ථානය ආශ්‍රයෙන් මෙම ග්‍රන්ථ ලියවී ඇත. ඒවා ක්‍රිස්තුන් වහන්සේ පිළිබඳ කරුණු ඇතුළත් ප්‍රධාන මූලාශ්‍ර හතරක් ලෙස පිළිගැනේ. ඒවා නම්;

1. ශු. මතෙව් තුමා විසින් ලියන ලද මතෙව් ශුභාරංචිය
2. ශු. මාක් තුමා විසින් ලියන ලද මාක් ශුභාරංචිය
3. ශු. ලුක් තුමා විසින් ලියන ලද ලුක් ශුභාරංචිය
4. ශු. ජොහන් තුමා විසින් ලියන ලද ජොහන් ශුභාරංචිය

1. මතෙව් ශුභාරංචිය

ශු. මතෙව් තුමා ජේසුස් වහන්සේගේ අපෝස්තුලූවරුන් දොළොස්දෙනාගෙන් කෙනෙකි. කැඳවීමට පෙර එතුමා අය බදු එකතු කළ අයකැමියෙකි. තම කැඳවීමෙන් පසු ජේසුස් වහන්සේගේ ප්‍රසිද්ධ ජීවිතයේ කොටස්කරුවකු වී ඔවුන් වහන්සේ ව අත්දුටුවේ ය. දිවැස්වැකි බහුල ව ඇතුළත් කර,බලාපොරොත්තු වූ "මෙසියස් වහන්සේ" ක්‍රිස්තුන් වහන්සේ බව පෙන්වා දී ඇත. ජේසුස් වහන්සේගේ වංශාවලියෙන් ශුභාරංචිය ආරම්භ කර ඇතිබැවින් මෙම ශුභාරංචියේ සංකේතය, "මිනිසා" ය.

2. මාක් ශුභාරංචිය

ශු. මාක් තුමා ජේසුස් වහන්සේගේ අපෝස්තුලූවරයෙක් නොවේ. එතුමා ශු. පේදුරු තුමාගේ ගෝලයෙකි. ජොහන් මාක් යනුවෙන් ද හඳුන්වනු ලැබූ මෙතුමා, පේදුරුතුමාගේ භාෂා පරිවර්තකයා ලෙස ද කටයුතු කර ඇත. එම නිසා ජේසුස් වහන්සේ පිළිබඳ බොහෝ තොරතුරු පේදුරු තුමාගෙන් දැනගන්නට ඇතැයි සිතිය හැකි ය. ස්නාවක ජොහන් තුමාගේ ගාම්භීර (මාක් 1:3) දේශනය පිළිබඳ විස්තරයෙන් ආරම්භ කර ඇති බැවින් මෙම ශුභාරංචියේ සංකේතය වන්නේ "සිංහයා" ය.

3. ලුක් ශුභාරංචිය

ශු. ලුක් තුමා ක්‍රිස්තුන් වහන්සේගේ අපෝස්තුලූවරයෙක් නොවේ. එතුමා වෛද්‍යවරයෙකි; ඉතිහාසඥයෙකි; චිත්‍ර ශිල්පියෙකි. ශුභාරංචියක් ලියන ලද එක ම "අන්‍ය ජාතිකයා" ලුක් තුමා ය. එතුමා පාවුලූ තුමා සමග ධර්මදූත සේවයේ නියැලී ඇත. විවිධ මුලාශ්‍රවලින් තොරතුරු සොයා, මෙම ශුභාරංචිය සම්පාදනය කර ඇත. ගීතිකා, යාච්ඤා හා කාන්තාවන් පිළිබඳ තොරතුරු ද වැඩිපුර මෙහි ඇතුළත් කර ඇත.

ජුදා ජාතිකයන්ගේ පමණක් නොව සියලූ ජාතීන්ගේ ගැලැවුම්කරුවා, ක්‍රිස්තුන් වහන්සේ බව මෙමගින් පෙන්වා දෙයි. සකරියස් තුමාගේ පූජාවෙන් ශුභාරංචිය ආරම්භ කර ඇත. එකල පූජා කරනු ලැබුවේ සතුන් බැවින් මෙම ශුභාරංචියේ සංකේතය වන්නේ, "ගවයා" ය.

4. ජොහන් ශුභාරංචිය

ශු. ජොහන් තුමා ජේසුස් වහන්සේගේ අපෝස්තුලූවරයෙකි. එතුමාගේ සහෝදරයා වූ මහා ජාකොබ් තුමා ද ජේසුස් වහන්සේගේ අපෝස්තුලූවරයෙකි. මේ දෙදෙනා ක්‍රිස්තුන් වහන්සේ කැදැවීමට පෙර ධීවරයෝ වූහ. සෙබදි හා සලෝමි ඔවුන්ගේ දෙමාපියෝ ය. මරිය තුමී සලෝමිගේ ඥාතිවරියකි. එබැවින් මේ දෙදෙනා ජේසුස් වහන්සේගේ ඥාති සහෝදරයෝ වූහ. තේරුම් ගැනීමට අපහසු සංකල්පනාවකින් මෙය ආරම්භ කර ඇති නිසා, මෙම ශුභාරංචියේ සංකේතය "රාජාලියා" ය.

ක්‍රිස්තුන් වහන්සේ මෙලොවට පැමිණීම ශුභාරංචියකි. මන්ද, ඔවුන් වහන්සේ මෙලොවට සපැමිණියේ, මනුෂ්‍ය සංහතියට ගැලවීම ලබා දීම පිණිස ය.