බොහෝ නිවෙස්හි ජනේලවලට වීදුරු යොදා ඇත්තේ නිවෙස තුළට හොඳින් ආලෝකය ලබා ගැනීම සඳහා යි. නමුත් සමහර අවස්ථාවල දී ජනේලවල වීදුරු ආවරණය වන පරිදි තිර රෙදි යොදා ඇත්තේ ලැඛෙන ආලෝකය සීමා කිරීම සඳහා ය. තවත් සමහර අවස්ථාවල දී නාන කාමර වැනි ස්ථානවල ආලෝකය ලබා ගැනීම සඳහා මල් වීදුරු යොදා ඇත.

මේ ආකාරයට අපි එදිනෙදා ජීවිතයේ දී ද්‍රව්‍ය තුළින් ආලෝකය ගමන් කිරීමේ ගුණය විවිධ ආකාරයට ප්‍රයෝජනයට ගනිමු. මේ ගැන අපි තවදුරටත් පරීක්ෂා කර බලමු.

ක්‍රියාකාරකම 5.3

අවශ්‍ය ද්‍රව්‍ය : තරමක කාඩ්බෝඩ් කැබැල්ලක්, ඉටිපන්දමක් සහ පහත   
සඳහන් ද්‍රව්‍ය,

• ලෝහ තහඩුවක්       තෙල් කඩදසියක් 
• මල් වීදුරු කැබැල්ලක  කුඩා ලී තහඩුවක්
• තුනී වීදුරු තහඩුවක්    විවිධ වර්ගවල පොලිතින් කොළ
• කළු කඩදාසියක්         පත්තර කඩදාසියක්
  
  
• පාට කිහිපයක සව් කොළ (ටිෂූ කඩදාසි)

ක්‍රමය :- 

• කාඩ්බෝඩ් කැබැල්ල මැද 3 cm * 3 cm ප්‍රමාණයේ කොටුවක් කපා ගන්න.
• ඉටිපන්දම දල්වන්න.
• දැන් ඔබ විසින් සපයා ගන්නා ලද ද්‍රව්‍ය එක එක වෙන වෙන ම කාඩ්බෝඩ් කැබැල්ල මැද ඇති සිදුර වැසෙන ලෙස තබන්න.
• එසේ අල්ලාගෙන එක් එක් ද්‍රව්‍යය තුළින් ඉටිපන්දම් දැල්ල නිරීක්ෂණය කරන්න.

ඔබේ නිරීක්ෂණ පහත දැක්වෙන ආකාරයට වගුවක සටහන් කරන්න.

ඔබ ලබාගත් නිරීක්ෂණ අනුව ඔබ භාවිත කළ ද්‍රව්‍ය පහත දැක්වෙන ආකාරයට කාණ්ඩ තුනකට වෙන් කර ගන්න.

A   සමහර ද්‍රව්‍ය තුළින් බැලුවිට ආලෝකය පැහැදිලිව දැකිය හැකි ය. ඉටිපන්දම් දැල්ල ද පැහැදිලිව පෙනේ.

B   සමහර ද්‍රව්‍ය තුළින් බැලුවිට ආලෝකය දැකිය හැකි නමුත් ඉටිපන්දම් දැල්ල පැහැදිලිව නොපෙනේ.

C   සමහර ද්‍රව්‍ය තුළින් බැලුවිට ආලෝකය හා ඉටිපන්දම් දැල්ල දැකිය නොහැකි ය.

ඉහත ක්‍රියාකාරකමෙහි දී ඔබ විසින් නිරීක්ෂණ ලබා ගැනීම සඳහා භාවිත කළ ද්‍රව්‍ය A, B හා C යන කාණ්ඩ තුනෙන් කුමන කාණ්ඩයට අයත් දැ යි තීරණය කරන්න. ඒ අනුව එම ද්‍රව්‍ය පහත දැක්වෙන වගුවට ඇතුළත් කරන්න.

අප ඉහත කි්‍රයාකාරම්වල දී නිරීක්ෂණය කළේ ඝන ද්‍රව්‍ය පමණකි. නමුත් විවිධ ද්‍රව සහ වාතය තුළින් ද ආලෝකය ගමන් කරන ආකාරය එකිනෙකට වෙනස් ය. වාතය තුළින් ආලෝකය ඉතා හොඳින් ගමන් කරන අතර වාතයේ ඇති දෑ අපට පැහැදිලි ව දැකගත හැකි ය. නමුත් මීදුම සහිත අවස්ථාවල දී වාතයේ ඇති බොහෝ දේ අපට නොපෙනී යයි.

එලෙස ම පිරිසිදු ජලය සහිත මාළු ටැංකියක ඇති විවිධ වර්ණ මත්ස්‍යයන් අපට පැහැදිලි ව නිරීක්ෂණය කළ හැකි ය. නමුත් අපිරිසිදු බොර ජලය සහිත ටැංකියක හෝ පොකුණක සිටින මත්ස්‍යයන් අපට පැහැදිලි ව නොපෙනේ. එසේ වන්නේ එවැනි අවස්ථාවල ජලය සහ වාතය තුළින් ආලෝකය ගමන් කරන ආකාරය වෙනස් වන නිසා ය.

විවිධ ද්‍රව තුළින් ආලෝකය ගමන් කරන ආකාරය නිරීක්ෂණය කිරීම සඳහා 5.4 ක්‍රියාකාරකමෙහි යෙදෙමු.

ක්‍රියාකාරකම 5.4

අවශ්‍ය ද්‍රව්‍ය : විනිවිද පෙනෙන පළල් කුඩා වීදුරු බෝතල් කිහිපයක්

• ඉටි පන්දමක් 
• පැණි
• පැණිබීම
• ජලය
• දැවුණු එන්ජින් ඔයිල්
• භූමිතෙල් වැනි ද්‍රව කිහිපයක්

ක්‍රමය:- 

• ඔබ විසින් සපයා ගත් ද්‍රවවලින් කුඩා වීදුරු බෝතල් වෙන වෙන ම පුරවා ගන්න.
• ඉටි පන්දම දල්වන්න.
• ඉටි පන්දම ඉදිරියේ බෝතලය තබා බෝතලයේ ඇති ද්‍රවය තුළින් ඉටිපන්දම් දැල්ල නිරීක්ෂණය කරන්න. ඔබ විසින් ලබාගත් නිරීක්ෂණ අනුව එම ද්‍රව වර්ග 5.2 වගුවෙහි A, B හා C තීරුවලින් ගැළපෙන
  තීරුවට ඇතුළත් කරන්න.
  

සමහර ද්‍රව්‍ය තුළින් බැලුවිට අනෙක් පස ඇති ආලෝකය මෙන් ම වස්තු ද පැහැදිලි ව දැකිය හැකි ය. එසේ වන්නේ එවැනි ද්‍රව්‍ය තුළින් ආලෝකය ක්‍රමවත් ව ගමන් කිරීම නිසා ය. එවැනි ද්‍රව්‍ය පාරදෘශ්‍ය ද්‍රව්‍ය ලෙස හැඳින්වේ. වීදුරු, විනිවිද පෙනෙන අවර්ණ පොලිතීන් ආදිය පාරදෘශ්‍ය ද්‍රව්‍යවලට උදාහරණ වේ. තෙල් කඩදාසි, බොර ජලය, පාට ටිෂූ කඩදාසි වැනි ද්‍රව්‍ය තුළින් බැලු විට අනෙක් පස ඇති ආලෝකය පෙනෙන නමුත් වස්තුව පැහැදිලි ව නොපෙනේ. එසේ වන්නේ එම ද්‍රව්‍ය තුළින් ආලෝකය අක්‍රමවත් ව ගමන් කිරීම නිසා ය. එවැනි ද්‍රව්‍ය පාරභාසක ද්‍රව්‍ය ලෙස හැඳින්වේ.

බොහෝ ද්‍රව්‍ය තුළින් බැලු විට අනෙක් පස ඇති ආලෝකය හෝ වස්තු හෝ දක්නට නොලැබේ. එසේ වන්නේ එවැනි ද්‍රව්‍ය තුළින් ආලෝකය ගමන් නොකිරීම නිසා ය. කාඩ්බෝඩ් ලී, ලෝහ, කඩදාසි, තාර ආදිය එවැනි
ද්‍රව්‍යවලට උදාහරණ වේ. ඒවා පාරාන්ධ ද්‍රව්‍ය ලෙස හැඳින්වේ.

දැන් ඔබට 5.2 වගුවෙහි A, B හා C තීරුවල අඩංගු වන ද්‍රව්‍ය පිළිවෙළින් පාරදෘශ්‍ය, පාරභාසක හා පාරාන්ධ ද්‍රව්‍ය ලෙස හඳුනාගත හැකි ය.

පැවරුම 5.1

පහත වගුවෙහි දැක්වෙන්නේ එදිනෙදා ජීවිතයේ දී අප විසින් පාරදෘශ්‍ය, පාරාන්ධ සහ පාරභාසක ද්‍රව්‍ය භාවිත කරන අවස්ථා සඳහා උදාහරණකිහිපයකි. තවත් එවැනි අවස්ථා නිරීක්ෂණය කර පහත දැක්වෙන වගුව
සම්පූර්ණ කරන්න.