5.5 - ආලෝකයේ ප්‍රයෝජන
ආලෝකය පෙනීම සඳහා අවශ්‍ය වන ප්‍රධාන සාධකයක් බව අපි දනිමු. විද්‍යාවේ දියුණුවත් සමගම අපි ආලෝකය විවිධ ලෙස හසුරුවමින් එයින් විවිධ ප්‍රයෝජන ලබමින් සිටිමු.
මෙම ප්‍රයෝජන ලබාගැනීම සඳහා ආලෝකය භාවිත වන විවිධ අවස්ථා පිළිබඳ ව අපි සොයා බලමු.
විස්තර කිරීමේ පහසුව සඳහා ආලෝකයෙන් ඇති ප්‍රයෝජන අපි පහත දැක්වෙන ආකාරයට වර්ග කර ගනිමු.
මෙම ප්‍රයෝජන ලබාගැනීම සඳහා ආලෝකය භාවිත වන විවිධ අවස්ථා පිළිබඳව අපි සොයා බලමු.
- ශාකවල ආහාර නිෂ්පාදනයට
අනෙක් ජීවීන් මෙන් නොව හරිත ශාක තමාට අවශ්‍ය ආහාර තමා විසින් ම නිපදවා ගන්නා බව ඔබ ඉගෙනගෙන ඇත. මෙම ආහාර නිෂ්පාදන කි්‍රයාවලිය සඳහා අවශ්‍ය ශක්තිය ලබාගන්නේ සූර්යාලෝකය මගිනි.
අනෙකුත් සියලූම ජීවීන් තම ආහාරය සඳහා සෘජුව ම හෝ වක්‍රව හරිතශාක මත යැපෙන බව ඔබ දන්නා කරුණකි. මේ නිසා ශාක තුළ සිදුවන ආහාර නිෂ්පාදනය, ආලෝකයෙන් ලැඛෙන වැදගත් ම ප්‍රයෝජනය ලෙස සැලකිය හැකි ය.
- පෙනීම ලබා දීම
අතීතයේ දී මිනිසා ආලෝකය ලබා ගත්තේ සූර්යයා, චන්ද්‍රයා සහ තාරුක වැනි ස්වාභාවික වස්තුවලිනි. නමුත් ගින්දර නිපදවා ගැනීමෙන් පසුව මිනිසාට කෘත්‍රිම ආලෝක ප්‍රභවවලින් "එළිය" ලබා ගැනීමට හැකි විය.
විද්‍යාවේ දියුණුවත් සමගම ආලෝකය ලබා ගැනීම සඳහා විදුලි බුබුළ නිපදවන ලදී. විවිධ වර්ගවල විදුලි බුබුළු වෙළෙඳ පොළෙහි දක්නට ලැබේ.
- ප්‍රදිපනයට
ලෝකයේ බොහෝ රටවල උත්සව ආදිය උත්කර්ෂවත් කිරීම සඳහා විවි වර්ණ සහ රටාවන්ගෙන් යුත් ආලෝකය යොදා ගැනේ.
වෙළෙඳ ප්‍රචාරක කටයුතු සඳහා සාප්පු සංකීර්ණ, ජනාකීර්ණ වීදි සහ කඩසාප්පු ආදියෙහි බොහෝවිට ආලෝකය විශාල ලෙස යොදා ගැනේ. ඇතැම්විට මේ සඳහා දිවා කාලයේ දී පවා විදුලි බුබුළු දල්වා තිබෙනු ඔබ දැක තිබේ.
- සංඥා ලෙස
ප්‍රදීපාගාරවල ඉතා උස් කුළුණක් මුදුනේ සිට ප්‍රබල ආලෝක කදම්බ නිකුත් කරයි. මෙය මුහුදේ යාත්‍රා කරන අයට ගොඩබිම හැඟවීමට යොදා ගැනේ. මෙය ආලෝකය සංඥාවක් ලෙස භාවිත කරන අවස්ථාවකි.
මාර්ග සංඥාවල දී රතු, කහ සහ කොළ පාට විදුලි බුබුළු යොදා ගැනේ. මෙහි දී විවිධ වර්ණවලින් විවිධ සංඥා ලබාදේ. සංඥා සඳහා ආලෝකය යොදා ගැනීමෙන් වැඩි අවධානයක් ලබා ගනී. රතු පාට ආලෝකය බොහෝ විට අනතුරක් හඟවන සංඥාවකි.
- සන්නිවේදන කටයුතුවලට
නූතන ලෝකයේ සන්නිවේදනය ඉතා ඉහළ මට්ටමක පවතී. මේ සඳහා නොයෙක් ආකාරයේ ආලෝක කිරණ ප්‍රයෝජනයට ගැනේ. ප්‍රකාශ තන්තු හරහා ආලෝකය මඟින් පණිවිඩ සම්ප්‍රේෂණය සිදුකරනු ලැබේ. ලංකාවේ
ප්‍රධාන නගර හරහා දුරකථන සම්බන්ධතා ජාලය සකස් කොට ඇත්තේ ද ප්‍රකාශ තන්තු මඟිනි. පරිගණක ජාල සම්බන්ධ කිරීමට හා උසස් තත්ත්වයේ ශ්‍රව්‍ය දෘශ්‍ය උපකරණ සම්බන්ධ කිරීමට ද ප්‍රකාශ තන්තු භාවිත වේ.
- වෛද්‍ය ක්ෂේත්‍රයේ දී
ඇසේ සුද ඉවත් කිරීම සහ හෘද සැත්කම්වල දී ද ආමාශගත තුවාලවලට ප්‍රතිකාර කිරීම ආදී ශල්‍යකර්මවල දී ද ලේසර් කිරණ යොදා ගැනේ. එමඟින් එම කාර්යය වඩා කාර්යක්ෂම ව සිදුකර ගත හැකි ය.
ප්‍රකාශ තන්තු තාක්ෂණය මඟින්, ශරීරය තුළ සිදුකරන වෛද්‍ය පරීක්ෂණ කටයුතුවල දී ශරීර අභ්‍යන්තරය නිරීක්ෂණය කිරීම සිදුකරයි. මෙහි දී ශරීර අභ්‍යන්තරය නිරීක්ෂණය කරන උපකරණය "එන්ඩොස්කෝප්" නම් වේ.
අමතර දැනුමට
සමහර රටවල උ ගොඩනැගිලිවල ඇතුළු කාමර දිවා කාලයේ දී ආලෝකවත් කිරීම සඳහා
ප්‍රකාශ තන්තු යොදා ගැනේ. හිරු එළිය මෙම තන්තු තුළින් යැවීම මඟින් කාමර ආලෝකවත් කරයි.
- විනෝදාස්වාදය ලබා දීම
සංගීත සංදර්ශන, සැණකෙළි ආදී ස්ථානවල බහුල වශයෙන් විදුලි ආලෝකය යොදා ගැනේ. නාට්‍ය සහ වෙනත් සංදර්ශනවල දී ද වේදිකාව බොහෝවිට අලංකාර වන්නේ විවිධ වර්ණ හා චලනය වන ආලෝක ධාරාවලිනි.
කුඩා දරුවන් සඳහා සැකසුණු ආලෝකය නිකුත්කරන ක්‍රිඩා භාණ්ඩ ද දැන් වෙළෙඳපොළෙහි දකින්නට ලැබේ.
ආලෝක ශක්තිය කෘත්‍රිමව නිපදවා ගැනීමට මුදල් වැය වේ. මේ නිසා ආලෝකය අනවශ්‍ය ලෙස යොදා ගැනීම, ශක්තිය හා මුදල් නාස්ති
කිරීමකි. මේ නිසා කිසිදු විටෙක විදුලි ආලෝකය අනවශ්‍ය ලෙස භාවිත නොකරමු. අනෙක් අයට කරදරයක් නොවන ලෙස ආලෝකය භාවිතයට
අප පුරුදු විය යුතු ය.