12 - දිව්‍ය සත්ප්‍රසාද වහන්සේ
ජේසුස් වහන්සේ අන්තිම රාත්‍රී භෝජනයේ දී දිව්‍ය සත්ප්‍රසාද වහන්සේ ස්ථාපිත කළ සේක. දිව්‍ය පූජාව පවත්වන විට ජේසුස් වහන්සේ අන්තිම රාත්‍රි භෝජනයේ දී සිදු කළ පිළිවෙතට අපි සහභාගි වෙමු. එයට කතෝලික ජන වන්දනාවේ කේන්ද්‍රස්ථානය හිමි වේ. මන්ද යත් අන්තිම රාත්‍රී භෝජනයේ දී මෙන් ම දිව්‍ය පූජාවේ දී ද අප ව ජේසුස් වහන්සේ දිව්‍ය සත්ප්‍රසාදයෙන් උන්වහන්සේගේ ම ශ්‍රී ශරීරයෙන් හා ශ්‍රී රුධිරයෙන් පෝෂණය කරන සේක.
දිව්‍ය සත්ප්‍රසාද වහන්සේ තුළ උන්වහන්සේ ජීවමාන ව වැඩ සිටින සේක. එබැවින් අපි උන්වහන්සේ භක්තියෙන් ලබා ගත යුතු වෙමු. දිව්‍ය සත්ප්‍රසාද වහන්සේ ලබා ගැනීමට යන විට දෑත් වැඳගෙන ගොස් උන්වහන්සේ ලබා ගෙන දෑත් වැඳගෙන ආපසු පැමිණ දණ ගසා විනාඩි කිහිපයක් භක්තියෙන් යාච්ඤා කිරීමට අමතක නොකරන්න. ඔබ පළමු වරට දිව්‍ය සත්ප්‍රසාද වහන්සේ ලබා ගත් දිනය නැවත සිහියට නගා ගන්න. එදින ඔබ තුළ තිබූ භක්තිය හා ගෞරවය අදත් තිබේදැයි මෙනෙහි කරන්න.
දිව්‍ය සත්ප්‍රසාදයේ ලක්ෂණ
- දේව ප්‍රසාද නිධානයකි
- භෝජනයකි
- යාගයකි
- ගිවිසුමකි
- ස්තූති කිරීමකි
- සිහි කිරීමකි.
දිව්‍ය සත්ප්‍රසාදයට පූර්ව සලකුණු
1. මෙල්කිසෙදෙක්ගේ යාගය
පූජක රජතුමකු වූ මෙල්කිසෙදෙක් ප්‍රථම වරට පූප හා මිදියුස ගෙන දෙවියන් වහන්සේට යාගයක් ඔප්පු කළේ ය.
2. මන්නා භෝජනය
දෙවියන් වහන්සේ කාන්තාරයේ දී ආහාර නොමැති ව කුසගින්නේ සිටි ඉශ්රායෙල් ජනතාවට මන්නා භෝජනය ලබා දී ඔවුන් පෝෂණය කළ සේක (නික්මයාම 16).
3. ඉශ්රායෙල් ජනතාවගේ පාස්කු භෝජනය
ඊජිප්තුවේ වහල්කමින් මිදී පොරොන්දු දේශයට පිටත් වීම සිහි කිරීම සඳහා සැම වසරක් පාසා ම පාස්කු භෝජනය පැවැත්වීමේ දී ඉශ්රායෙල් ජනතාව නුමුහුන් පූප අනුභව කළහ; කුසලානෙන් පානය කළහ (නික්මයාම 12).
4. පූප වැඩි කිරීමේ ප්‍රාතිහාර්ය
පන්දහසකට පූප බෙදා දීමේ ප්‍රාතිහාර්ය නව ගිවිසුමේ දිව්‍ය සත්ප්‍රසාද වහන්සේට පූර්ව සලකුණකි.
අන් අයගේ කුසගින්නේ දී ජේසුස් වහන්සේ ඔවුන් පෝෂණය කිරීමට කටයුතු කළ සේක. අප ද අන් අයගේ කුසගින්නේ දී අපි සතු දේ අන් අය සමග ඛෙදා ගනිමු. ඒ සඳහා ජේසුස් වහන්සේ අපට ආරාධනා කරන සේක.ෙ