ලුක් තුමාගේ ශුභාරංචිය මෙසේ විවිධ නම්වලින් හැදින්වීමට හේතු මොනවා දැයි විමසා බලමු.

1. යාච්ඤාවේ ශුභාරංචිය

ශුභාරංචිය පුරාවට ම "යාච්ඤාව" පිළිබඳ වැඩි අවධානයක් යොමු කරන බැවින් යාච්ඤාවේ ශුභාරංචිය ලෙස හඳුන්වනු ලැබේ. උදාහරණ:

• ජේසුස් වහන්සේ බෞතීස්මය ලබා යාච්ඤා කරමින් සිටිය දී ශුද්ධාත්මයාණන් වහන්සේ උන්වහන්සේ මත පහළ වූ සේක (ලුක් 3:21).
• අපෝස්තුලූවරුන් තෝරා ගැනීමට පෙර ද උන්වහන්සේ මුළු රැයක් ම යාච්ඤාවෙන් ගත කළ සේක (ලුක් 6:12).
• ජේසුස් වහන්සේ යාච්ඤා කරනු දැක ශ්‍රාවකයන් ද ඔවුන්ට යාච්ඤා කරන ආකාරය උගන්වන ලෙස ඉල්ලා සිටි සේක (ලුක් 11:1). එවිට ජේසුස් වහන්සේ "ස්වර්ගයෙහි වැඩ සිටින" යාච්ඤාව ඉගැන්වූ සේක.
• අධෛර්ය නොවී නොකඩවා යාච්ඤා කළ යුතු බව වැන්දඹුව හා විනිශ්චයකාරයා පිළිබඳ උපමාව දක්වයි.

ජේසුස් වහන්සේ මෙන් අප ද එදිනෙදා ජීවිතය තුළ යාච්ඤා කිරීමට අමතක නොකළ යුතු වේ.

2. අන්‍ය ජාතිකයන්ගේ ශුභාරංචිය

අන්‍ය ජාතිකයන් යනු ජුදා ජාතියට අයත් නොවූවන් ය. ලුක් ශුභාරංචියේ අන්‍ය ජාතීන් පිළිබඳ ව විශේෂ අවධානයක් යොමු කරන නිසා අන්‍ය ජාතීන්ගේ ශුභාරංචිය ලෙස ද හැඳින්වේ.

• ජේසුස් වහන්සේගේ උපත සියලූ ජනතාවට ආනන්දජනක පුවතක් බව දේව දූතයෝ ප්‍රකාශ කළහ (ලුක් 2:10-14).
• ඉශ්රායෙල්වරුන්ගේ විමුක්තිය අපේක්ෂාවෙන් සිටි සිමියොන් නම් දිවැසිවරයා ජේසුස් වහන්සේ විජාතීන්ට එළිය දෙන ආලෝකය බව ප්‍රකාශ කළේ ය (ලුක් 2:32).
• යහපත් සමරිතානුවරයා පිළිබඳ උපමාවෙන් ද අසරණ වූ තැනැත්තාට සරණ වූයේ සමරිතානු ජාතිකයෙකි (ලුක් 10:30-37).

3. දයාවේ ශුභාරංචිය

ජේසුස් වහන්සේගේ ධර්මදූත සේවාව තුළ පව්කරුවන්ට දයාව දැක්වූ බව ලුක් තුමා පෙන්වා දෙයි. උදාහරණයක් ලෙස නොමග ගිය බැටළුවෙකු සොයා යන එඬේරෙකු ලෙස ජේසුස් වහන්සේ පව්කරුවන් සොයා යන ආකාරය නැතිවුණු බැටළුවා පිළිබඳ උපමාවෙන් පැහැදිලි කරයි.

4. ශුද්ධාත්මයාණන්ගේ ශුභාරංචිය

වෙනත් ශුභාරංචිවලට වඩා ශුද්ධාත්මයාණන් වහන්සේගේ ක්‍රියාකාරීත්වය ගැන සඳහන් කරන බැවින් ශුද්ධාත්මයාණන්ගේ ශුභාරංචිය ලෙස හැඳින්වේ.

ඒ සඳහා එක් උදාහරණයක් නම් ජේසුස් වහන්සේගේ ප්‍රසාද ස්නාපනයේ දී ශුද්ධාත්මයාණන් වහන්සේ පරවියෙක් ආකාරයෙන් උන්වහන්සේ මත වැඩ සිටි සේක.

5. කාන්තාවන්ගේ ශුභාරංචිය

කාන්තාවන් පිළිබඳ වෙනත් ශුභාරංචිවලට වඩා සඳහන් වන නිසා කාන්තාවන්ගේ ශුභාරංචිය ලෙස නම් කෙරේ. එලෙස සඳහන් වන කාන්තාවන් කිහිප දෙනෙක් මෙසේ ය.

• ජේසුස් වහන්සේගේ මෑණියන් වූ මරිය තුමිය (ලුක් 1:26-56, 2:1-21).
• එලිසබෙත් තුමිය (ලුක් 1:5-6)
• අන්නා දිවැසිවරිය (ලුක් 2:36-38)
• නායින් නුවර වැන්දඹුව (ලුක් 7:11-17)
• පවුකාර ස්ත්‍රිය (ලුක් 7:36-50)
• සමහර කාන්තාවන් ජේසුස් වහන්සේට උපස්ථාන කිරීම (ලුක් 8:1-3)
• මාර්තා හා මරියා (ලුක් 10:38-42)
• කුදු ස්ත්‍රිය සුව කිරීම (ලුක් 13:10-17)
• ජෙරුසලම් ස්ත්‍රින් සැනසීම (ලුක් 23:27-28)

6. දිළින්දන්ගේ ශුභාරංචිය

දිළින්දන් අගය කරමින් ඔවුන් දෙවියන් වහන්සේට ප්‍රිය බව සනාථ කරන නිසා දිළින්දන්ගේ ශුභාරංචිය ලෙස ද දැක්වේ. උදාහරණ :-

• උන්වහන්සේගේ උපත පළමුවෙන් ම ප්‍රකාශ කළේ දුප්පත් එඬේරුන්ට ය. (ලුක් 2:10).
• දේව රාජ්‍යය අයිති දුප්පත් අයට ය. "දිළිඳු වූ ඔබ භාග්‍යවන්තයෝ ය; මන්ද, දෙවියන් වහන්සේගේ රාජ්‍ය ඔබගේ ය" (ලුක් 6:20).

7. කොන්වූවන්ගේ ශුභාරංචිය

කොන්කිරීම්වලට ලක්වූවන් පිළිබඳ ව විශේෂ අවධානයක් යොමු කරන නිසා කොන්වූවන්ගේ ශුභාරංචිය ලෙස ද හඳුන්වනු ලැබේ.

• සකේවුස් පිළිබඳ සිද්ධිය (ලුක් 19:1-10) ඒ සඳහා උදාහරණයකි.

සකේවුස් අයකැමියෙකි. (රෝම අධිරාජ්‍යයට බදු එකතු කරන්නෙකි). ජුදා සමාජය අයකැමියන් පව්කරුවන් ලෙස සලකා කොන් කළහ. එසේ වූයේ ඔවුන් සාමාන්‍ය ජනතාව තලා පෙළා අසාධාරණ ලෙස බදු එකතු කොට වැඩිපුර එකතු කළ මුදල් ඔවුන් ළඟ තබා ගත් නිසා ය. ජේසුස් වහන්සේ එවැනි අයට අනුකම්පා කර යහමගට ගත් බව සකේවුස් පිළිබඳ සිද්ධියෙන් විස්තර කරයි.

අපි ද අප සමග ජීවත් වන කිසිවකු කිසි ම හේතුවක් නිසා වත් හෙළා නොදැකිය යුතු වෙමු. සැමට කරුණාව දැක්විය හැකි පහන් සිතක් ඇති කර ගනිමු.