17 පාඩම, දෙගුරුන් ගුණ දැන අදරින් සලකමු (ඉගැන්වීම් උපකාරක කෙටි සටහන්)

අපගේ අම්මා සහ තාත්තා දෙගුරුන් යන නමින් හඳුන්වයි.

මව්පිය දෙදෙනා දේවත්වයෙන් සැලකීමට තරම් සුදුසු වන බැවින් බුදු දහමෙහි ඔවුන් පුබ්බ දේව යන නමින් හඳුන්වයි.

අපට හමුවන මුල්ම ගුරුවරුන් දෙදෙනා දෙමාපියන් බැවින් බුදුරදුන් ඔවුන් පුබ්බාචරිය යන නමින්ද හැඳිවූ සේක.

මෙත්තා, කරුණා, මුදිතා, උපේක්ඛා යන මහා බ්‍රහ්මයා සතු ගුණ හතරින් යුක්ත වන බැවින් දෙමාපියන්ට බ්‍රහ්ම යන නම යෙදේ.

සටහන:-

සතර බ්‍රහ්ම විහරණ පිළිබඳ වැඩිදුර විස්තරයක් සඳහා 10 ශ්‍රේණිය (පැරණි නිර්දේශය) 25 පාඩම වන “සිව් සත සනසන සිව් බඹ විහරණ“ සහ ඊට අදාල ඉගැන්වීම් උපකාරක කෙටි සටහන් බලන්න.

පෙරදිගින් උදාවන සූර්යයා මෙන් දෙමාපියන් දරුවන්ගේ ජීවිත ආලෝකමත් කරන බැවින් බුදුරදුන් ඔවුන් පෙරදිග ලෙස දැක්වූ සේක.

දෙමව්පියන්ට උපස්ථාන කිරීම උතුම් මංගල කාරණයක් බවත් හැකියාව තිබියදී දෙමාපියන්ට නොසලකන දරුවා වසලයෙකු බවත් හෙතෙම පිරිහෙන බවත් බුදුරජාණන් වහන්සේ දේශනා කළ සේක.

දෙමව්පියන්ට සලකන දරුවා පැසසුම් ලැබීමට සුදුසු බව දක්වන බුදුරජාණන් වහන්සේ තමන් පිඬුසිඟා වැඩි ආහාරයෙන් දෙමාපියන් පෝෂණය කළ භික්ෂුන් වහන්සේ නමකට සාධුකාර පවත්වා පවත්වා ප්‍රශංසා කළ සේක.

අටවැනි අග්බෝ රජතුමා රාජ සභාවට යෑමට පෙර සිය මෑණියන් වන්දනා කිරීමෙන් පෙනී යන්නේ පෙර රජවරු පවා මව්පිය උපස්ථානය ඉමහත් ගෞරවයෙන් සිදුකළ බවයි.

දෙමාපියන්ට සැලකීමට අප වැඩිහිටියන් වන තුරු බලා සිටිය යුතු නැත.

නව යොවුන් වියේ දරුවන් ලෙස මව්පියන් වෙනුවෙන් අපට කළ හැකි දේ බොහෝය.
උදා:-

1. මව්පියන්ගේ සිතට සතුට සැනසිල්ල ඇති වන පරිදි කටයුතු කිරීම.

2. හොඳින් ඉගැනීම. හොඳට හැසිරීම.

3. ගෙදරදොර, වතුපිටි වල වැඩකටයුතු වලදී, ව්‍යාපාර කටයුතු වලදී සහාය වීම.

4. මව්පියන් අපට නියම කරන කටයුතු හැකිතාක් හොඳින් ඉටු කිරීම.
 

ගුණ දහමින් පෝෂණය වීමට මව්පියන්ට අත හිත දීම ඔවුන්ට කළ හැකි ඉහලම උපකාරය බව බුදුරදුන් විසින් දේශනා කළ සේක.
ඒ සඳහා පහත දේ කළ හැකිය.

1. දිනපතා සවස තෙරුවන් වැඳීමට මව්පියන්ට මල් බඳුන් ආදිය පිළියෙල කර දීම.

2. දිනපතා වන්දනාමාන නොකරන දෙමාපියන් ඒ සඳහා උනන්දු කරවීම.

3. පින් දහම් කිරීම, බණ ඇසීම, සිල් සමාදන් වීම, භාවනා කිරීම, දන් දීම, දහම් පොත් කියවීම ආදියට මව්පියන් උනන්දු කරවීම.

4. මව්පියන් දුසිරිතට හුරු වී සිටීනම් එයි මුදා ගැනීමට ක්‍රියා කිරීම.
 

අභ්‍යාස:-

ශ්‍රේණි විභාගය 2016

i. දෙමාපියන් “බ්‍රහ්ම“ යන නමින් හැඳින්වීමට හේතු කවරේදැයි පහදන්න. (ල. 5)

ii. සිඟාලෝවාද සූත්‍රයේ දෙමාපියන් “පෙරදිග“ ලෙස හඳුන්වා ඇත්තේ ඇයි? (ල. 5)

iii. අගනාම මව්පිය උපහාරය වන්නේ, ගුණ දහමින් පෝෂණය වීමට මව්පියන්ට අතහිත දීමයි. ඒ සඳහා දරුවෙකු වශයෙන් ඔබට කළහැකි දෑ මොනවාද? (ල. 5)