තමන් උපන් දේශය පිළිබඳ ඇල්මක් ඇති ඕනෑ ම පුද්ගලයකුගේ හදවත දේශාභිමානය, දේශානුරාගය, දේශහිතෛෂීභාවය හා දේශවාත්සල්‍යය බඳු හැඟීම්වලින් පරිපූර්ණ ය. ස්වකීය නිජ භූමියෙහි විශේෂ අනන්‍යතා ප්‍රකට වන පරිදි නිර්මාණය වූ කවි හා ගීත ආදිය පරිශීලනයෙන් එම හැඟීම් තවදුරටත් තීව්‍ර වෙයි. එබඳු හැඟීම් දේශාභිමානි හැඟීම් ලෙස හැඳින්වෙයි. ‘වැසි වසිනා අහස අපි’ මහගම සේකර විසින් රචිත දේශාභිමානි ගී පද මාලාවකි. රටේ දියුණුව උදෙසා වෙහෙස මහන්සි වී කටයුතු කිරීමේ අගය මේ නිර්මාණයෙන් ඉස්මතු කෙරෙයි. පණ්ඩිත් ඩබ්ලිව්. ඩී. අමරදේව ප්‍රමුඛ පිරිසගේ ගායනයෙන් මේ ගීය පරිපූර්ණ වී ඇත.

කවිය, ගීත පද මාලාව, නවකතාව, නාට්‍යය, චිත්‍රපටය, කෙටිකතාව ආදි ක්ෂේත්‍රවල මෙන් ම සිතුවම්කරණයෙහි අද්විතීය දක්ෂතා ප්‍රකට කළ කෘතහස්ත කලාකරුවකු ලෙස මහගම සේකර සම්භාවනාවට පාත්‍ර වෙයි. ඒ අතරින් පාඨකයන් හා විචාරකයන්ගේ වැඩි අවධානය දිනා ගෙන ඇත්තේ ඔහුගේ කවි සහ ගීත පද මාලා යි.

වැසි වසිනා අහස අපි
මුතු බඳිනා මුහුද අපි
මිණි දිලෙනා පොළොව අපි
සිරි ලංකා රට ම අපි

අපේ පැතුම් අහසට විහිදී යයි
කම්හල්වල දුම් වළලූ දිගේ
අපේ ම දහදිය මුගුරු ගලා එයි
ගං හෝ ඇළ දොළ කඳුරු වගේ‍

දෙරණ පළා රතු කැට මතුවන්නට
අප අත දෙන තුරු බලා හිඳී
බලවු යොමා නෙත රටේ ම මාවත
අපේ අතින් ගොඩ නැගෙන හැටි

ගොවියෝ අපි කම්කරුවෝ
රට රකිනා ජනතාවෝ

ගත රැඳි දුහුවිලි රනබරණයි
දහදිය මඩ විලවුන් සුවඳයි
රට වෙනුවෙන් ගත සිත වෙහෙසෙයි
සිත සතුටේ උල්පත එතැනයි

ගොවියෝ අපි කම්කරුවෝ
රට රකිනා ජනතාවෝ

විශේෂණ පද

ඉහත වාක්‍යය දෙස බලන්න. එහි 'ළමයා' යන නාම පදය විස්තර කර දක්වන 'කඩිසර' යන්න නාම විශේෂණය ලෙස සැලකේ. එහි දී 'ළමයා' යන්න විශේෂ්‍යය ලෙස සැලකේ. නාම විශේෂණය මගින් විස්තර කිරීමට භාජනය වන බැවිනි. 'ලියයි' යන ක්‍රියාව විස්තර කරන 'වේගයෙන්' යන්න මෙහි ක්‍රියා විශේෂණය වෙයි.

ඔබ 6 ශ්‍රේණියේ දී ද නාම විශේෂණ හා ක්‍රියා විශේෂණ පිළිබඳව උගෙන ඇත. ඒ දැනුම ද සිහිපත් කර බලන්න. පහත අභ්‍යාසවල නියැලී ඒ දැනුම අලූත් කර ගන්න.