5.5 - මැනිං ආණ්ඩුක්‍රම ප්‍රතිසංස්කරණය - 1920
1910 - ආණ්ඩුක්‍රම ප්‍රතිසංස්කරණයෙන් සෑහීමකට පත් නොවූ ලාංකිකයන් දිගින් දිගට ම උද්ඝෝෂණය කිරීමේ ප්‍රතිඵලයක් වශයෙන් 1920 වර්ෂයේ දී තවත් ආණ්ඩුක්‍රම ප්‍රතිසංස්කරණයක් මෙරටට ලැබුණි. එවකට ලංකා ආණ්ඩුකාරවරයා වූ විලියම් මැනිංගේ නිර්දේශය මත සකස් කෙරුණ මෙම ආණ්ඩුක්‍රමය මැනිං ආණ්ඩුක්‍රම ප්‍රතිසංස්කරණය ලෙස හැඳින්වේ.
ව්‍යවස්ථාදායක සභාව
මෙම ප්‍රතිසංස්කරණය මගින් ව්‍යවස්ථාදායක සභාවේ සාමාජික සංඛ්‍යාව 37ක් දක්වා වැඩි කෙරිණ. ඔවුන්ගෙන් 14 දෙනෙකු නිල ලත් සාමාජිකයන් වූ අතර 23 දෙනෙක් නිල නොලත් සාමාජිකයෝ වූහ. නිල නොලත් සාමාජිකයන් 23 දෙනාගෙන් හතක් ආණුඩුකාරවරයා විසින් නාමකරණයෙන්, (නම් කිරීමෙන්) පත් කරන ලදි. ඉතිරි 16 දෙනා ඡන්ද බලයෙන් පත් කිරීම මෙම ආණ්ඩුක්‍රමයේ කැපී පෙනෙන ලක්ෂණයකි. 1920 වර්ෂයේ ව්‍යවස්ථාදායක සභාව පත් වූ ආකාරය පහත සටහනින් පෙන්නුම් කෙරේ.
ආණ්ඩුක්‍රම ප්‍රතිසංස්කරණය - 1920
මෙම ආණ්ඩුක්‍රමය අනුව ව්‍යවස්ථාදායක සභාවේ නිල ලත් පිරිසට වඩා නිල නොලත් පිරිස වැඩි වූ බව බැලු බැල්මට පෙනෙන නමුත් තීරණාත්මක ඡන්ද විමසීමක දී නිල ලත් දාහතර දෙනාට නාමකරණයෙන් පත් වූ හත් දෙනා ද එක් වන බැවින්, ඡන්දයෙන් පත් වූ දහසය දෙනාට වඩා වැඩි ඡන්දයක් ආණ්ඩුකාරවරයාට හිමිව තිබිණ.