17 - අන් ජීවිත සුරැකීම
පෙම් කරන්න එකිනෙකාට සුහද සොයුරු ප්‍රේමයෙන්
දිවි ගෙවන්න එකමුතු වී සමිඳුන් තුළ සාමයෙන්
ඔබට වඩා අනුන් උතුම් කොට නිරතුරු සලකන්න
උඩඟු නොවී අසල්වැසියනට බුහුමන් දක්වන්න
අලස නොවී සිතට දිරිය ගෙන කටයුතු සපුරන්න
සමිඳු කෙරේ බැතිය පෙරටු කොට සේවය සලසන්න
පෙම් කරන්න එකිනෙකාට ..............
සැපතේ හිදී සිතෙන් උදම් නොව සතුටට පත්වන්න
විපතේ හිදී නොපසුබටව තව ඉවසිලිමත් වන්න
උදය හවා දෙවිඳු යැදුම නම් අතපසු නොකරන්න
අසරණයන් පිහිට පතන විට පිළිසරණය වන්න
පෙම් කරන්න එකිනෙකාට ..............
දුක් පීඩා කරන අය කෙරේ සාමය පතුරන්න
ඔබට පවා වරද කරන විට නපුරක් නොකරන්න
සතුටු සිනා රැලි නැගෙනා විට ඔබ ද සිනාසෙන්න
දුකට වැටී අනුන් පෙළන විට සැබවින් දුක්වන්න
පෙම් කරන්න එකිනෙකාට ..............
(කිතුනු ගී 214)
ඉහත ගීතිකාව අවධානයෙන් ගායනා කර ඉන් ඔබට වැටහෙන කරුණු මෙනෙහි කරන්න.
මිනිස් ජීවිතයට ගරු කිරීම
ආබෙල් පිදු පඬුර දෙවියන් වහන්සේට ප්‍රසන්න පඬුරක් විය. එය ප්‍රසන්න වීම හේතුවෙන් දෙවියන් වහන්සේ එම පඬුර පිළිගත් සේක. අප දෙවියන් වහන්සේට පුදන පඬුරු ද උන්වහන්සේට ප්‍රසන්න වීමට නම් හොඳ ම දෙය පූජා කළ යුතු ය. උදාහරණයක් ලෙස, අපේ හොඳ ම කාලය උන්වහන්සේට පූජා කරමින් දිනපතා අවදි වූ විගස යාච්ඤා කිරීමට අමතක නොකළ යුතු ය.
කායින් විසින් දෙවියන් වහන්සේට පුදන ලද පඬුර පිළිනොගැනීම නිසා, කායින් ආබෙල් කෙරෙහි ඊර්ෂ්‍යා සහගත හැගීමකින් කටයුතු කළේ ය. ඊර්ෂ්‍යාව ඉතා සුළු දෙයක් ලෙ‍ෙසැලකුවත් මෙම කතා පුවතේ දී එය ජීවිතයක් විනාශ කිරීම දක්වා වර්ධනය විය. කායින් විසින් ආබෙල් වන තම එක ම සහෝදරයා මැරී ය.
ඊර්ෂ්‍යාව මුල්අගුණ පාපයකි. එය මුල්අගුණ පාපයක් ලෙස සලකන්නේ බරපතළ පාපයක් කරා යොමු කරන නිසා ය. එම නිසා ඒවායින් අප වැළකිය යුතු ය. ඊර්ෂ්‍යාව පළිගැනීම කරා යොමු කළ බව කායින් සහ ආබෙල් කතාවෙන් දැක ගත හැකි වේ.
පළිගැනීමෙන් අන් ජීවිතවලට ගරු කිරීමට නොහැකි වේ. එම නිසා පළිගැනීම අප ජීවිත තුළින් අත්හළ යුත්තකි. පළිනොගෙන සැමට ප්‍රේම කළ යුතු බව ජේසුස් වහන්සේ අපට ඉගැන්වූ බව අප සිහිපත් කර එසේ කිරීමට උනන්දු වෙමු.
ඉහත ගීතිකාව අනුව ජීවත් වීමෙන් අන් ජීවිතවලට ගරු කළ හැකි ය.
ගබ්සා කිරීම
පින්තූර දෙස අවධානයෙන් බලන්න. තමන්ගේ මව දස මසක් කුසේ දරා ගෙන මොලොවට ඔබ බිහි කළ බව සිහිපත් කරන්න. එම නිසා ඔබේ මවට හා පියාට ස්තුති කරන්න. ඔබ මව් කුස පිළිසිඳ ගත් මොහොතේ සිට මේ දක්වා ආරක්ෂා කර රැක බලා ගත්තාටත් ස්තූති කරන්න.
ජීවිතය ආරම්භ වන්නේ මෙලොවට උපත ලැබීමෙන් පසු නොව පිළිසිඳ ගත් මොහොතේ ය. පිළිසිඳ ගත් මොහොතේ පටන් ජීවිතය දෙවියන් වහන්සේට අයිති බව පහත සඳහන් ශුද්ධ ලියවිලි පාඨ මගින් පෙන්වා දෙයි.
මව් කුසයේ සිටින ජීවිතය පවා දෙවියන් වහන්සේට අයිති නම් එය විනාශ කිරීමට අපට අයිතියක් නැත. එය සදාචාර විරෝධි ක්‍රියාවකි. කායින් විසින් කළ පාපය ම ගබ්සා කරන්නා විසින් කරනු ලබයි. ඔහු ආබෙල්ටත් වඩා අහිංසක හා අසරණ (ළදරුවකු) පුද්ගලයකු මරා දමයි. ආත්ම ආරක්ෂාව වෙනුවෙන් කටයුතු කළ නොහැකි කෙනෙකු මරා දමයි. මේ පිළිබඳ ව කතෝලික සභා ධර්මෝපදේශය මෙසේ පවසයි.
ජීවිත විනාශ නොකිරීම
ගබ්සා නොකළ යුතුවා මෙන් ම කිසි ම ජීවිතයක් විනාශ නොකළ යුතු බව ද ශුද්ධ වූ සභා මාතාව අපට මෙසේ උගන්වන්නී ය.
අහිසංකයන් පමණක් නොව වරදකරුවන් පවා ඝාතනය නොකළ යුතු බව කායින්ට දෙවියන් වහන්සේ පැවසූ පහත සඳහන් වචනවලින් ද පැහැදිලි වේ.
ජේසුස් වහන්සේ කන්ද උඩ දේශනයේ දී ද පස්වන පනත සිහි ගන්වයි.
තමාගේ සහෝදරයා සමග සාමයෙන් ජීවත්විය යුතු බව ජේසුස් වහන්සේ අපට පෙන්වා දෙයි. මෙමගින් අන් අයගේ ජීවිත සුරැකීමට අප සැම බැඳී සිටින බව පෙන්වයි.
කෝපය, ක්‍රෝධය, පළිගැනීම ආදිය ද සහෝදර ප්‍රේමයට විරුද්ධ වේ. පළිනොගත යුතු බව අනෙක් කම්මුල හැරවීමට අවවාද කිරීමෙන් තම ශ්‍රාවකයන්ට ජේසුස් වහන්සේ උගන්වා වදාළ සේක.
දේව දරුවන් හැටියට අපගේ පැවැත්ම ශ්‍රේෂ්ඨ විය යුතු ය. අපි උතුම් දේව පියෙකුගේ දරුවන් හැටියට සහෝදර සහෝදරියන්ට ප්‍රේම කළ යුතු වෙමු. අසල්වැසි ප්‍රේමය අපගේ විශේෂ ලක්ෂණයක් විය යුතු ය. එමගින් අන් අයගේ ජීවිත සුරැකිය යුතු වෙමු. සැම කෙනෙක් ම දෙවියන් වහන්සේගේ සමානකමට මවා ඇති නිසා අපි සැවො ම දේව දරුවෝ වෙමු.