"අසිපා" (AsIPA) යනු "ආසියාතික ඒකාග්‍ර පෝෂණ සේවා යොමුව" වේ. (Asian Intergral Pastoral Approach)

ඉතිහාසය හා පසුබිම

ක්‍රි.ව. 1990 වසරේ, ආසියාතික රදගුරුවරුන් 400 දෙනෙකු පමණ සහභාගීත්වයෙන් ඉන්දුනීසියාවේ බැංඩුන් නුවර පැවති පස්වන ආසියාතික රදගුරු සමුළුවේ දී බිහි විය. ආසියාතික රටවල රදගුරුතුමන්ලාගේ සාංඝිකත්වයේ (සාමුහික යාච්ඤාවේ) හා ගැඹුරු භාවනාත්මක මෙනෙහි කිරීමේ ප්‍රතිඵලයක් ලෙස "අසිපා" ජනිත විය.

ආසියාවේ කතෝලික සභාව තුළ උදාසීන කිතුනුවන් අවදි කිරීමටත් ගිහි නායකත්වයට නිසි තැන දෙන්නටත් කිතුනු සංඝ තුළ දේව වචනය කියවීම තුළ ක්‍රියාත්මක වීමටත් අවශ්‍ය බව හඳුනා ගැනිණි.

මීසම් තුළ කිතුනු ඒකක පිහිටුවීමෙන් මේ කාර්ය වඩාත් හොඳින් කළ හැකි බව අනාවරණය විය. ඒ නිසා දේව වචනය මත පදනම් වූ ක්‍රියාශීලි කුඩා කිතුනු සංඝ පිහිටු විය.

කුඩා කිතුනු සංඝ තුළ සුපුවත බෙදා ගැනීම පියවර සතකින් සිදු කරනු ලැබේ. එබැවින් එය සත් පියවර ලෙස හදුන්වයි.

ස්ථානය සූදානම් කිරීම

• අසිපා ක්‍රියාකාරකම කිරීමට සුදුසු ස්ථානයක් තෝරා ගන්න.
• එම ස්ථානයේ මේසයක් හෝ ටීපෝවක් හෝ තබා එය මතට සුදු රෙද්දක් දමන්න.
• මේසය මත ශුද්ධ බයිබලය පෙරළා සිංහාසනාරූඪ කරන්න.
  (දේව වාක්‍යාසනයේ තබන ආකාරයට)
• ශුද්ධ බයිබලය ඉදිරියෙන් පොල්තෙල් පහනක් තබා එය දල්වන්න.
• කුඩා කණ්ඩායමක් ලෙස රවුමට අසුන් ගන්න.

සත් පියවර

පළමුවන පියවර : අපි ස්වාමීන් වහන්සේට ආරාධනා කරමු.

යාච්ඤාශීලි ව ශුද්ධ ලියවිල්ලේ අවස්ථා සිහිපත් කරමින් රැස්වූ අය අතරට ජේසුස් ක්‍රිස්තුන් වහන්සේට වඩින ලෙස කෙටි යාච්ඤාවකින් ඇරයුම් කිරීමට කිහිප දෙනෙකුට ආරාධනා කිරීම

නිදසුන් :

• එදා මාර්තා හා මරියාගේ නිවසට වැඩියා සේ මේ මොහොතේ අප අතරට වඩින්න.
• සකේවුස්ගේ නිවසට වැඩියා සේ අප අතරට වඩින්න.
• මාර්ගය ද සත්‍යය ද ජීවනය ද වන බව පැවසූ ජේසු ස්වාමීනි, අප අතරට වැඩිය මැනව.

දෙවන පියවර : අපි දැන් ශුද්ධ ලියවිලි පාඨය කියවමු.

• ශුද්ධවර .... තුමන්ගේ සුවිශේෂයේ ..... වෙනි පරිච්ඡේදය පෙරළා ගන්න. (මෙය දෙවරක් පවසන්න.)
• එම පරිච්ඡේදයේ .... වගන්තියේ සිට ..... වගන්තිය දක්වා පෙරළා ගන්න.
• අදාළ බයිබල් පාඨය දෙවරක් හෝ තෙවරක් දෙදෙනෙකුට හෝ තිදෙනෙකුට කියවීමට ආරාධනා කරන්න.

තෙවන පියවර : සිතට කාවැදුණු වචනය හෝ වාක්‍යය තුන්වරක් උච්චාරණය කරමු.

ශ්‍රවණය කළ ශුද්ධ ලියවිලි පාඨයෙන් තම සිතට තදින් ම කා වැදුණ වචනය හෝ වාක්‍යාංශය තම කණ්ඩායමට ඇසෙන පරිදි තෙවරක් උච්චාරණය කිරීමට ආරාධනා කරන්න.

සිව්වන පියවර : නිශ්ශබ්දතාව තුළ එකිනෙකාට කතා කරන්නට ස්වාමීන් වහන්සේට ඉඩ හරිමු.

• විනාඩි තුනක් නිශ්ශබ්ද ව මෙනෙහි කරමින් ස්වාමීන් වහන්සේට කතා කරන්නට අවස්ථාව ලබා දෙන්න.

පස්වන පියවර : තමන්ට ලැබුණු පණිවිඩය බෙදා ගන්න.

• තමන් තෝරා ගත් වචනයට අදාළ ව තමන් ලත් අත්දැකීම් කණ්ඩායමට ඉදිරිපත් කරන්නට කැමති කිහිප දෙනෙකුට ඇරයුම් කරන්න.

හයවන පියවර : කිතුනු ඒකකයට ඇති වැඩ කොටස් ගැන සාකච්ඡා කිරීම.

• ඉදිරි සතිය තුළ තව කෙනෙකුගේ අවශ්‍යතා හමුවේ කළ හැකි ක්‍රියාකාරකම් කිහිපයක් පිළිබඳ යෝජනා ඉදිරිපත් කිරීමට අවස්ථාව දෙන්න.
• ඉන් අත්‍යවශ්‍ය එක් කටයුත්තක් කණ්ඩායම සාකච්ඡා කර ක්‍රියාවට නංවන්නට පියවර ගැනීමට තීන්දු කරන්න.

හත්වන පියවර : අප හෘදයාංගම ලෙස යාච්ඤා කරමු.

• මේ මොහොතේ අප සමග සිටි ස්වාමීන් වහන්සේට තුති පුද දෙන්නට කිහිප දෙනෙකුට ඇරයුම් කරන්න. (මෙහි දී විශ්වාසකයින්ගේ යැදුම් ලෙස මෙම යාච්ඤා ඔප්පු කළ හැකි ය)