මෙම ශුද්ධ වූ ලියවිලි පාඨයට අනුව අපගේ විරුද්ධකාරයා යක්ෂයා බව පෙන්වා දෙයි. එමගින් දුක් කරදර පැමිණෙන බව ද පෙන්වයි. එම විරුද්ධකාරයා පරාජය කළ හැක්කේ ඇදහිල්ලෙහි ස්ථීර ව සිටීමෙන් බව පහදා දෙයි. එසේ ඇදහිල්ලේ ස්ථීර ව සිටීමට නම් පාපය බැහැර කළ යුතු ය. ඒ සඳහා "පාපෝච්චාරණය" හෙවත් සමගි සන්ධානය නමැති දේව ප්‍රසාද නිධානය ලබා ගත යුතු වේ.

අප පාප පරීක්ෂාවට හසු වී සමගි සන්ධානයේ දේව ප්‍රසාද නිධානය ලබා නොගතහොත් ඉෂ්ට වරප්‍රසාද අපට අහිමි වේ. ස්වර්ග රාජ්‍යයට ඇතුළු වීමේ වරම අහිමි වේ.

පාපයට ලැබෙන දඬුවම් දෙවර්ගයකි.

1. සදාකාලික දඬුවම්
2. කාලීන දඬුවම්

පාපයට ලැබෙන දඬුවම් වර්ග දෙක පිළිබඳ වත් දේව දයාව මගින් පව්කරුවාට එම දඬුවම්වලින් නිදහස් විය හැකි ආකාරය පිළිබඳ වත් පහත සඳහන් පාඨය අපට පැහැදිලි කර දෙයි.

තමා කළ වැරදිවලට සමාව ඉල්ලීමට පමා වීම යෝග්‍ය නැත. මනස්ථාපනය වී පාපිෂ්ඨ බවින් මිදී ජීවත් විය යුතු ය. එවිට සැම කෙනෙකුට ම ස්වර්ගයට ඇතුළු විය හැකි ය.

ඉහත ශුද්ධ ලියවිලි පාඨය මගින් පෙන්වා දෙන්නේ පාපයෙහි දිවි ගෙවන්නාට පසුතැවීමට ජේසුස් වහන්සේ අවස්ථාව හා කාලය ලබා දෙන බව ය.

සදාකාලික දඬුවමින් මිදීමට කළ යුතු දේ

සදාකාලික දඬුවමින් මිදීමට ඇති මාර්ගය පාපෝච්චාරණය හෙවත් සමගි සන්ධානයේ දේව ප්‍රසාද නිධානය වේ. මේ පිළිබඳ ව කතෝලික සභා ඉගැන්වීම් විමසා බලමු.

සමගි සන්ධානයේ දේව ප්‍රසාද නිධානය මගින් ස්වර්ග රාජ්‍යයට ඇතුළු වීමට හැකියාව ලැබේ. එය සදාකාලික දණ්ඩනයෙන් නිදහස් වීමයි.

පාපෝච්චාරණය නම් දේව ප්‍රසාද නිධානය ලබා සදාකාලික දඬුවමින් මිදී ස්වර්ග රාජ්‍යයට හිමිකම් කීව ද අප කළ වැරදිවලට වන්දි ගෙවිය යුතු වේ. එම වන්දි ගෙවීම් "කාලීන දඬුවම" ලෙස හැඳින්වේ.

බරපතල පාපයක් සිදු වුවහොත් එකෙණෙහි ම පාපෝච්චාරණය කළ යුතු ය. ඒ පිළිබඳ ව මහෝපදේශයේ මෙසේ සඳහන් වේ.

සමගි සන්ධානයේ දේව ප්‍රසාද නිධානය මගින් පාපයට සමාව ලබා ගැනීමට නම්,

1. හොඳ පාපෝච්චාරණයක් කිරීමට පිහිට පතා යාච්ඤා කරන්න. දේව පනත් හා ශුද්ධ වූ සභාවේ ශික්ෂාපද එකිනෙක ගෙන ඉකුත් පාපෝච්චාරණය කළ දින සිට ඒවා අනුසාර කර ඇත්දැයි ආත්ම සෝදිසියක යෙදෙන්න.
2. දේව ආදරයට පිටුපෑම පිළිබඳ ව අවංක ව කනගාටු වී කළ වැරදි ප්‍රතික්ෂේප කරන්න.
3. යළි කවරදාකවත් ඒවා නොකරන්නට ඉටා ගන්න.
4. කළ පව් එකක්වත් නොසඟවා පියතුමාට කියන්න.
5. පියතුමා දෙන දඬුවම් ඉටු කරන්න.

පාපෝච්චාරණය කිරීමේ පිළිවෙත

• ත්‍රිත්වයේ ලකුණ අඳින්න.
• "පියාණෙනී, පව්කාර වූ මට ආශීර්වාද කළ මැනව" යනුවෙන් කියන්න.
• අන්තිමට පාපෝච්චාරණය කළ දිනය පූජාප්‍රසාදිතුමාට කියන්න.
• පසුගිය පාපෝච්චාරණයේ සිට කළ පව් දැන් පැහැදිලි ව ගණන් හා විස්තර ඇති ව කියන්න.
• පව් කීවාට පසු "පියාණෙනී මතක ඇති පව් මෙපමණයි. මේවාටත් මතක නැති පව්වලටත් සමාව හා දඬුවම් දුන මැනව" යනුවෙන් කියන්න.
• පූජාප්‍රසාදිතුමාට සාවධාන ව ඇහුම්කන් දෙන්න. එතුමාගේ අවවාද සහ එතුමා ඔබට නියම කරන දඬුවම සතුටින් පිළිගන්න.
• පූජාප්‍රසාදිතුමා දෙවියන් වහන්සේගේ නාමයෙන් ඔබට සමාව දෙන විට භක්තිවන්ත ලෙස "දයාධික මනස්ථාපය" කියන්න
• ශුද්ධ වූ ත්‍රිත්වයේ ලකුණු අඳින්න.
• ජේසු පිහිටයි!

පූජාප්‍රසාදිතුමා නියම කරන දඬුවම් හැකි
විගස ඉටු කිරීමට අමතක නොකරන්න.

අන් අය වෙනුවෙන් ඔබේ යුතුකම

සමගි සන්ධානයේ දේව ප්‍රසාද නිධානයේ අවශ්‍යතාව වටහා ගෙන එම දේව ප්‍රසාද නිධානය අවශ්‍ය වූ සැම විට ම ලබා ගැනීමට යොමු වන්න. අන් අය ද ඒ සඳහා යොමු කරන්න. පාපය නිසා දේව ආදරයෙන් ඈත් වී යාමෙන් සිදු වන විනාශය ඔවුන්ට වටහා දෙන්න. සමගි සන්ධානයේ දේව ප්‍රසාද නිධානය ලබා ගන්නා ආකාරය අමතක නම් කියා දෙන්න. එම දේව ප්‍රසාද නිධානය ලබා ගැනීමට අවස්ථාව ද සොයා යාමට මඟ පෙන්වන්න. එලෙස කාලීන සහ සදාකාලීන දඬුවමින් මිදී වරප්‍රසාදීය ජීවිතය ලබා ගැනීමට අන් අය ද යොමු කරන්න.