නැති වුණු පුත්‍රයා පිළිබඳ උපමාව

ශුද්ධ බයිබලය ගෙන ලුක් 15:11-32 කියවන්න.

තම පියාගෙන් ලැබෙන ආදරයට පිටුපා සතුට හා සැපත පැතූ බාල පුතා තමාට අයිති දේපළ කොටස පියාගෙන් ඉල්ලා ගෙන ගියත්, ඒ සියල්ල ටික කලෙකින් අවසන් වෙයි. සියලූ මිතුරන් ද සෙවූ සතුට හා සැපත ද අහිමි වෙයි. කෑම පවා නැති ව පාපයේ ප්‍රතිවිපාක අසීමිත ව අත්දකියි. එවිට සිහිවන්නේ තම පියාගේ ආදරය හා කරුණාවයි. පියා ළඟ සිටින සේවකයන් පවා ලබන සතුට හා සැපතයි. ඔහු සිත් හරවා ගනියි.

රජ කුමරෙකු ලෙසින් පියා අත්හැර ගිය පුතා යාචකයෙක් විලසින් නැවත පියා සොයා එයි. ඔහු සිත් හරවා ගෙන එනතෙක් බලා සිටි පියා අසීමිත කරුණාවෙන් ඔහු පිළිගනියි. සමාව දී ඔහුට හොඳ ම සළුව, මුදුව හා පාවහන් පලඳවා නැවත රජ කුමරෙක්ගේ තත්ත්වයට පත් කරයි.

දෙවියන් වහන්සේගේ ආදරය හා කරුණාව මේ උපමා කතාවට අනුව අපට පෙන්වා දෙයි. පාපි තත්ත්වය අවබෝධ කර ගෙන සිත් හරවා ගෙන ආපසු දෙවියන් වහන්සේග වෙතට එන්නාට සමාව ලබන්නට, දේව ආදරයේ සතුට හා සැපත අත් විදින්නට මේ උපමාව ආරාධනා කරයි.

නැති වුණු කාසිය පිළිබඳ උපමාව

රිදී කාසි දසයක් සතු ස්ත්‍රියක වුවත් ඉන් එකක් හෝ නැති වුවහොත් එය සෙවීමට ඇය දරන වෙහෙසත් සම්බ වූ විට අන් අය සමග සතුටු වන ආකාරයත් මෙම උපමාවෙන් පෙන්වා දෙයි. එලෙස දේව ආදරයේ බල මහිමය තුළ අප අත් නොහරින දෙවි පියාණෝ පාපි මාර්ගය අත හැර සිත් හරවා ගැනීමට අපට ආරාධනා කරන සේක. පසුතැවී සිත් හරවා ගන්නා අය පිළිබඳ ව දෙවියන් වහන්සේ ප්‍රීති වන ආකාරය ද අපට වටහා දෙයි. ඒ නිසා අප වෙනස් වී අන් අය ද යහපත කරා ගෙන යමු.

පාපි මගට වැටී දේව ආදරයෙන් ඈත්වී, පීඩා විඳින්නට
ඉඩ නොතබා අප සොයා එන ආදරණීය පියෙකු අපට
සිටින බව අපි අදහා ගනිමු.

පව්කාර ස්ත්‍රිය

ශුද්ධ වූ ජොහන් තුමාගේ සුවිශේෂයේ 8:1-11 දක්වා හොඳින් කියවන්න. එහි සඳහන් වන්නේ පව්කාර ස්ත්‍රිය පිළිබඳ කතාවයි.

මෝසෙස් තුමාගේ නීතිය අනුව කාමමිථ්‍යාචාරය කළ අය ගල් ගසා මරන්නට නියම විය. එහෙත් ජේසුස් වහන්සේ එවැනි ස්ත්‍රියකට ද සමාව දුන් සේක. එසේ ම ජේසුස් වහන්සේ ඇයට පවසන්නේ "තවත් පව් නොකරන්න" කියා ය.

අප අතින් මෙතෙක් සිදු වූ වැරදි තේරුම් ගෙන ඒවාට මනස්ථාපනය වී නැවත නොකිරීමට ඉටා ගෙන හොඳ පාපෝච්චාරණයක් කර ජේසුස් වහන්සේගෙන් සමාව ලබා ගත යුතු ය.

ශුද්ධ වූ අගොස්තීනු තුමා

ශුද්ධ වූ අගොස්තීනු තුමා ක්‍රි.ව. 354 නොවැම්බර් මස 13වන දින උතුරු අප්‍රිකාවේ තගස්තේ නුවර (අද ඇල්ජීරියාව) උපත ලැබී ය. එතුමාගේ පියා පැට්‍රිෂියස් ය. ඔහු අන්‍යාගමිකයෙකි. මව මොනිකා ය. ඇය කතෝලිකයෙකි. ඇය ශුද්ධවන්තියෙකි. ඇය ශුද්ධ මොනිකා තුමිය ලෙස හඳුන්වයි. අගොස්තීනු තුමා දක්ෂ කථීකයෙකි; කථීකාචාර්යවරයෙකි. නරක පුරුදු නිසා නොමඟ ගිය අයෙකි.

ඔහුගේ මව ස්ථීර විශ්වාසයෙන් යුතු ව දෙවියන් වහන්සේට ඔහුගේ සිත් හැරීම සඳහා යාච්ඤා කළා ය. ශුද්ධ වූ අම්බ්‍රොස් තුමාගේ සහාය ඒ සඳහා පැතුවා ය. දිගු කලක් ඇවෑමෙන්,

• මවගේ බලවත් යාච්ඤාවෙන්
• ශුද්ධ වූ අම්බ්‍රොස් තුමාගේ මග පෙන්වීමෙන්

ඔහු තුළ ජීවිත වෙනසක් ඇති විය. මවගේ ඉමහත් ප්‍රීතිය හා දේව ප්‍රශංසාව මධ්‍යයේ වයස අවුරුදු 33 දී පාස්කු ඉරුදින ඔහු ප්‍රසාද ස්නාපනය ලැබුවේ ය. ඒ මොහොතේ සිය මව මෙසේ පැවසුවා ය; "ආදර පුතුනි, මගේ දිවියෙහි තිබුණ එක ම පැතුම ඔබ කිතුනුවකු වනු දැකීමයි. මා පැතුවාටත් වඩා සමිඳාණෝ මට දී ඇත. දෙවියන් වහන්සේට ස්තෝත්‍ර වේවා."

නපුර සැම මොහොතක ම අප වැරදි මගට යොමු කිරීමට මාන බලමින් සිටියි. අද සමාජයේ ද පාපි තත්ත්වයට ඇද දමන, දුර්පරීක්ෂා අපමණ ය. නවීන තාක්ෂණය ඔස්සේ ද එවැනි තත්ත්ව ඇත. ඒවායින් මිදී අන් අය ද මුදවා ගැනීමට කටයුතු කළ යුතු වෙමු. ඒ සඳහා ශුද්ධාත්ම වරප්‍රසාද පතා යදිමු. ශුද්ධ වූ මොනිකා තුමියගේ ආදර්ශය තුළ කටයුතු කරමු.