ක්‍රියා 5 : 12-21

මළවුන්ගෙන් උත්ථාන වූ ජේසුස් ක්‍රිස්තුස් වහන්සේ ස්වර්ගාරෝහණ වන අවස්ථාවේ දී වදාළ පරිදි, පෙන්තකොස්ත දිනයේ දී ශුද්ධාත්මදානය ප්‍රේරිතයන් වෙත ප්‍රදානය කළ බව අපි දනිමු. ශුද්ධාත්ම බලයෙන් පූර්ණ වූ ප්‍රේරිතවරු ජේසුස් වහන්සේගේ උත්ථානය පිළිබඳ ව සාක්ෂි දරමින් ද, බලවත් ලෙස දේශනා කරමින් ද, මනස්ථාපනය වී සිත් හරවාගන්නවුන් ජේසුස් වහන්සේගේ නාමයෙන් බව්තීස්ම - ස්නාපනය කරමින් ද, ලෙඩුන් සුව කරමින් ද, දහස් ගණනින් සෙනග ස්වාමීන් වහන්සේ වෙතට හරවා ගත්හ.

මෙලෙස ජේසුස් වහන්සේගේ උත්ථානය මගින් පුනරුජ්ජීවනය ඇතිවන බව ප්‍රේරිතයන් විසින් ප්‍රකාශ කරනු ලැබීම පූජකයන්ගේ ද, පූජා මූලිකයන්ගේ ද, සද්දුසිවරුන්ගේ ද බලවත් උදහසට හේතු වන්නක් විය. ඒ උන්වහන්සේ කුරුසි පත් කිරීමට ඔවුන් ද දායක වූ හෙයිනි. ලෙඩුන් සුවපත් කිරීම ඇතුළු ප්‍රේරිතයන් විසින් සිදු කරන ලද බොහෝ බලවත් ක්‍රියා නිසා ජනතාව විශාල ලෙස ප්‍රේරිතවරුන් වෙත යොමු වීම ඔවුන්ගේ ඊර්ෂ්‍යාවට හේතු විය.

සුදර්ශන නම් දොරටුව අභියස සිඟමන් යැදි කොරවූ මිනිසා සුවකිරීම පිළිබඳ සිද්ධියේ දී "ඔබ කුමන බලයකින් - කවරෙකුගේ නාමයෙන් මෙය කළහු දැ" යි ප්‍රේරිතවරුන් දෙදෙනා මන්ත්‍රණ සභාව මැද සිටුවා කරන ලද විමැසුමට පේදුරු තුමා ශුද්ධාත්මයාණන්ගෙන් පූර්ණ ව සිදු කරන ලද නිර්භීත ප්‍රකාශය අප පසුගිය පාඩමෙන් විමසා බැලීමු.

එහෙත් එදා ප්‍රේරිතවරුන්ගේ බලවත් ක්‍රියා නිසා අදහාගත් මහත් ජනතාවක් සිටි හෙයින් ප්‍රසිද්ධියේ ප්‍රේරිතවරුන්ට දඬුවම් කිරීමට නොහැකි ව "ජේසුස් වහන්සේගේ නාමයෙන් කොහෙත් ම කථා නොකරන මෙන් ද, නූගන්වන මෙන් ද අණ කොට - තර්ජනය කොට ඔවුන් නිදහස් කර යන්නට හැරියෝ ය.

එහෙත් ප්‍රේරිතවරු වඩවඩාත් ශක්තිමත් ව - නිර්භීත ව තම මෙහෙවර බලවත් ලෙස ඉටුකිරීමට වග බලා ගත්හ. මෙලෙස ශුද්ධාත්මයාණන්ගේ නාමයෙන් ප්‍රේරිතයන් විසින් සිදු කෙරෙන අරුම පුදුම දේ අත්දකිමින් සමිඳාණන් වහන්සේ කෙරෙහි අදහාගත් සෙනගට කෙමෙන් තවතවත් අය එකතු වූහ.

මෙනිසා ප්‍රේරිතවරුන් වෙත නැවත නැවතත් පීඩා පැමිණෙන ආකාරයත් ශුද්ධාත්මයාණන් වහන්සේ කරණකොටගෙන ඔවුන් ඒවාට මුහුණ දෙන ආකාරයත් විමසා බලමු.

ඉහත ඔබ විසින් විමසා බලන ලද බයිබල් පාඨ වෙතින් ශුද්ධාත්ම වැඩවිසීම තුළ ප්‍රේරිතවරුන්ගේ ක්‍රියා පිළිබඳ ව ගම්‍ය වන කාරණා පහත දැක්වෙන වගුවෙහි වම් පසෙහි දැක්වේ. නැවත එම බයිබල් පාඨ විමසා බලමින් ඒ ඒ කාරණය දැක්වෙන අදාළ බයිබල් පාඨ අංකය/අංක අදාළ කාරණය ඉදිරියෙහි යොදන්න.

එහෙත් "ධර්මිෂ්ඨයන්ට පීඩා බොහෝ ය" යන්න පසක් කරමින්, ස්වාමීන් වහන්සේ වෙනුවෙන් සාක්ෂි දැරීම හා ශුද්ධාත්ම බලයෙන් බොහෝ අරුම පුදුම දේ කළ නිසා ප්‍රේරිතයන් නැවත වරක් පීඩාවලට ලක්වන ආකාරය පහත දැක්වෙන බයිබල් පාඨ විමසා බැලීමෙන් පැහැදිලි වේ.

මෙලෙස "දෙවියන් වහන්සේට කීකරු වන අයහට පදානය කර ඇති ශුද්ධාත්මයාණන් වහන්සේ (ක්‍රියා 5:32) විසින් සිරගෙයින් ප්‍රේරිතයන් මුදවාගෙන, ස්වාමීන් වහන්සේගේ "ජීවන මග" පිළිබඳ ව සෙනගට ප්‍රකාශ කිරීමේ අවස්ථාව ඔවුන්හට නැවත සලසා දුන් සේක. ජේසුස් වහන්සේ අප වෙත හෙළිකළ "ජීවන මග" වනුයේ "පසුතැවී, හිත් හරවාගෙන, පව්කමාව ලබා ගැනීම තුළින් දේව දරුකමට ඇතුළු වීමයි."

ඉන් පසු ව ද ප්‍රේරිතයන්හට කස පහර දී ජේසුස් වහන්සේ ගැන කථා නොකරන්නට අණ කළ ද, ප්‍රේරිතවරු ඒ නාමය උදෙසා නින්දා විඳීමට සිදුවීම ගැන ප්‍රීති වෙමින්, දිනපතා ම දේව මාලිගයේ ද ගෙදරක් පාසා ද ඉගැන්වීමෙහිත්, ජේසුස් වහන්සේ පිළිබඳ සුබ අස්න දේශනා කිරීමෙහිත් නිරත වූ බව සඳහන් වේ. (ක්‍රියා 5:40-42)

එදා ප්‍රේරිතවරු ශුද්ධාත්මදානය ලැබීම තුළ,

• ජේසුස් වහන්සේ විසින් තම ජීවිත පූජාවෙන් අප වෙත හඳුන්වා දෙන ලද "ජීවන මඟ" ලෝකය වෙත ගෙනයෑමේ මෙහෙවර, ප්‍රේරිතයන් විසින් බාරගනු ලැබූ බවත්,
• ස්වාමීන් වහන්සේගේ නාමය දැරීම නිසා විඳින්නට සිදු වූ විවිධ තර්ජන - නින්දා - අපහාස හා ශාරීරික වේදනා, තමන්ට පීඩා නොව භාග්‍යයක් කොට එදා ප්‍රේරිතයින් විසින් සලකන ලද බවත්,
• මනුෂ්‍යයන්ගේ කාරණාවලට නොව දෙවියන් වහන්සේගේ කාරණාවලට ප්‍රමුඛතාව හිමිකර දී ප්‍රේරිතවරුන් එඩිතර ව කටයුතු කළ බවත්, පැහැදිලි වේ.

ජේසුස් වහන්සේ විසින් එදා ප්‍රේරිතවරුන් වෙත පවරන ලද මෙහෙවරෙහි වගකීම නිතැතින් ම අප වෙත ද පැවරෙන බව පසක් කරගන්න. එමෙන් ම ඒ උදෙසා එදා ප්‍රේරිතවරුන් හට ස්වාමීන් වහන්සේ විසින් ශුද්ධාත්මයාණන් වහන්සේ මගින් අවශ්‍ය බලය - දිරිය ලබාදුන්නාක් මෙන්, අපහට ද එම ශුද්ධාත්මදානය ලබා දෙන බව විශ්වාස කරන්න. එලෙස ශුද්ධාත්මයාණන් තුළින් ජේසුස් වහන්සේගේ බලය අත්දකින අපි, යැදුමෙන් හා ප්‍රශංසාවෙන් ශුද්ධාත්ම ක්‍රියාකාරීත්වය පිළිබඳ ව සාක්ෂි දැරීමට ද යොමු වෙමු.