හිතෝපදේශ 2 : 6-10, 3 : 21 එපීස 5 : 15-17
කොලොස්සි 3 : 5-7, 1 තෙසලෝනික 4 : 2-8

"නව තාක්ෂණය" යන වචන එදින පාඩම ආරම්භයේ දී ම ගුරුතුමිය හුනු පුවරුවේ සටහන් කළා ය. විෂයයට අදාළ නොවන මාතෘකා ක්‍රිස්තියානි ධර්මය විෂයය උගන්වන ගුරුතුමිය විසින් මෙදින හඳුන්වා දෙනු ලැබීම පන්තියේ අප කාගෙත් කුතූහලය දනවන්න ක් විය. ඒ බව තමන් ද පසක් කරගත් බව හඟවමින් පන්තිය සිසාරා බැලු ගුරුතුමිය තම හඬ මෙලෙස අවදි කළා ය.

ගුරුතුමිය :

දරුවනි, මෙලොව සැම සිදුවීමක් ම, සැම නිර්මාණයක් ම, සිදු වන්නේ දේව කැමැත්තටත් දේව සැලැස්මටත් අනුකූල ව බව කිතුනු අපගේ විශ්වාසයයි. අප අද විමසා බලන්නට යන්නේ "නව තාක්ෂණය" යටතේ ලොවට හඳුන්වා දී ඇති අප පරිහරණය කරන මෙවලම් දේව කැමැත්තට අනුකූල ව කෙලෙස පරිහරණය කළ යුතු ද යන්නයි.

මෙලෙස දිනට නියමිත පාඩම හඳුන්වා දුන් ගුරුතුමිය පංතියේ සිසුන්, කණ්ඩායම් තුනකට බෙදා ඒ ඒ කණ්ඩායමට මාතෘකාව බැගින් බෙදා දුන්නා ය. සැම කණ්ඩායමක් ම අදාළ මාතෘකාව ගැන සාකච්ඡා කර නියමිත කාලය තුළ වාර්තාවක් පිළියෙල කළ යුතු වූ අතර, කණ්ඩායම විසින් තෝරාගනු ලබන නායකයා විසින් එය පංතියට ඉදිරිපත් කළ යුතු බවට ද උපදෙස් දුන්නා ය.

ඒ ඒ කණ්ඩායම විසින් ඉතා උනන්දුවෙන් සකස් කරන ලද වාර්තා අපි දැන් විමසා බලමු.

1 වන කණ්ඩායමේ නායක :

අපට ලැබුණු මාතෘකාව හිතෝපදේශ 2:6-10 හි දක්වා ඇති දෙව් වදන් ඇසුරින් "නව තාක්ෂණයේ දියුණුවක් ලෙස ලද ජංගම දූරකථනය නිවැරැදි ව භාවිත කළ හැකි ආකාරය" පිළිබඳ ව සාකච්ඡා කොට නිර්මාණාත්මක ලිපියක් ඉදිරිපත් කිරීමයි. මා දැන් ඒ ලිපිය ඔබ හමුවේ කියවනවා.

නව තාක්ෂණය හා දේව සැලසුම

නව තාක්ෂණයේ දියුණුව සම්බන්ධයෙන් කිතුනු දැක්මට අනුව දේව වචනයේ සඳහන් කරුණු පිළිබඳ ව අපි අපගේ අවධානය මෙලෙස යොමු කරමු.

"ප්‍රඥාව සමිඳුන්ගේ" දීමනාවකි.
දැනුම හා ඥානය පහල වන්නේ සමිඳුන්ගේ මුවිනි. සමිඳාණෝ අවංකවූවන්හට නියම
ප්‍රඥාව දෙන සේක.
සත්‍යවාදි අයට එතුමාණෝ පලිහක් වන සේක.
සමිඳාණෝ යුක්ති මාවත ආරක්ෂා කරන සේක.
බැතිමතුන්ගේ මාර්ගය රැකවල් කරන සේක.
මෙසේ ඔබ, දැහැමිකම ද යුක්තිය ද සත්‍යවාදී බව ද යන සියලූ
යහ මඟ තේරුම් ගන්නෙහි ය.
ප්‍රඥාව ඔබේ මනසට පිවිසෙයි.
දැනුම ඔබේ සිතට ප්‍රීතිය ගෙන දෙයි.

හිතෝපදේශ 2:6-10

තාක්ෂණයේ නව මංපෙත් කරා පිවිසීමට මිනිසාට ලබා දී තිබෙන දැනුම හා ඥානය සමිඳුන්ගේ දීමනාවක් බවත් අවංක අයට නියම ප්‍රඥාව හිමි වන බවත් එතුමාණෝ අපට පවසති. එම දීමනාව ලද අප සත්‍යවාදී ලෙස යහමග තේරුම්ගෙන කටයුතු කළ යුතු බව ද දැක්වේ. එදිනෙදා ජීවිත පැවැත්මේ පහසුව පිණිස භාවිත කිරීමට යොදා ගෙන ඇති බොහෝ තාක්ෂණික මෙවලම් අතරින් ජංගම දූරකථනය පිළිබඳ ව මෙම ලිපියෙන් විශේෂිත ව අදහස් බෙදා ගැනීමට කැමැත්තෙමු.

සන්නිවේදන තාක්ෂණ දියුණුවේ නව මංපෙත් විවර කරමින් ජංගම දූරකථන භාවිතය අද පෙරමුණ ගෙන ඇත. එක් ප්‍රදේශයක සිට තවත් ප්‍රදේශයකට ද පුද්ගල කණ්ඩායම් අතර මෙන් ම එක් රටක සිට තවත් රටක් දක්වා ද එකිනෙකාගේ සන්නිවේදන අවශ්‍යතා මෙමගින් ඉටුකර ගැනීමේ පහසුව උදා වී ඇත. මේ මගින් ඉතා කාර්යක්ෂම ලෙස පෞද්ගලික සම්බන්ධතා පවත්වා ගනිමින් මිත්‍රත්වය ගොඩනගා ගැනීමට ද තොරතුරු හුවමාරුවට ද දරුවන්ගේ ආරක්ෂාව පිළිබඳ ව සොයා බැලීමට ද අවස්ථාව උදා වී ඇත.

නමුත් මිනිසාගේ පහසුවට - යහපතට යොදාගත හැකි ජංගම දූරකථනය වර්තමාන සමාජයේ යහපතට මෙන් ම අයහපතට ද යොදා ගෙන තිබීම කනගාටුවට කරුණකි. ඉන් බොහෝ මිනිස් ජීවිත පරිහානියට පත් ව ඇත; පවුල් සංස්ථා බිඳ වැටී ඇත. අනිසි ක්‍රියා කලාප නිසා සිත් බිඳ වැටීම්, අවිශ්වාසය, අසත්‍ය තොරතුරු ගලායාම, සමාජයේ විෂමාකාරි ක්‍රියාවන්ට යොමු වීම සිදු ව ඇත. ඒ තුළින් මිනිස් ජීවිත විනාශ වීම් පවා සිදු ව ඇත.

දෙවියන් වහන්සේගෙන් ලද ප්‍රඥාවේ දීමනා එකිනෙකාගේ ජීවිත වඩාත් අර්ථවත් කිරීමට යොදාගත යුතු මුත් විවිධ අනිසි ක්‍රියාදාම දූරකථනය මගින් සිදු කරමින් ජීවිත විනාශ කිරීමට යොමු කිරීම දෙවියන් වහන්සේ ප්‍රතික්ෂේප කරන සේක. දෙවියන් වහන්සේගේ කැමැත්ත නම් යුක්තිය ඉටු කරමින් නිවැරැදි දේ සමාජය තුළ ක්‍රියාත්මක වීම දැකීම ය. එසේ නව තාක්ෂණය නිසි ලෙස භාවිත කිරීමට යොමුවීම කිතුනු අපගේ වගකීම ලෙස සලකා කටයුතු කරමින් සමිඳාණන් වහන්සේ ඉදිරියේ දැහැමිකම ද යුක්තිය ද සත්‍යවාදි බව ද යන සියලූ යහමග තේරුම් ගෙන කටයුතු කිරීම අවශ්‍ය වේ. දැනුම ඔබට ප්‍රඥාව හා සතුට ගෙන දෙන හෙයින් ඊට සුදුසු පරිදි සෑම ක්‍රියවක ම නිරත වීමට සිතට ගන්න.

ගුරුතුමිය :

එම කණ්ඩායමේ ඉදිරිපත් කිරීම බොහොම හොඳයි. තාක්ෂ‚ක දියුණුව මිනිස් ජීවිත ශක්තිමත් කිරීමට මිස ජීවිත විනාශයට නොවන බව මතක තබා ගත යුතුයි.

ඒ වගේ ම ජංගම දූරකථන භාවිතයේ දී එය පරිහරණය කරන ස්ථානය වේලාව හා අවශ්‍යතාව පිළිබඳ ව වඩාත් සැලකිලිමත් විය යුතු බව ද මතක තබා ගන්න.

සමිත :

ඔව්........ සමහර අයගේ දූරකථන පල්ලියේ දේව මෙහෙය අතරතුර දීත් නාද වෙනවා. ඒක අනෙක් අයට බාධාවක් බව ඒ අය තේරුම් ගන්නේ නැහැ.

දිනිති :

සමහරු විනෝදයට රාත්‍රි කාලයේ නිදා සිටින මිනිසුන් අවදි කරමින් අනවශ්‍ය දූරකථන ඇමතුම් ලබා දෙනවා. ඒ වාගේ ම දූරකථනයේ අසභ්‍ය දර්ශන පවා රැස්කර තබා ගන්නවා.

අජිත් :

ඇයි..... තවත් අය විනෝදයට එක් එක් අය පිළිබඳ වැරැදි තොරතුරු ලබා දීමටත් දූරකථනය යොදා ගන්නවා.

දිනිති :

සමහර අය දූරකථනයට ම අවධානය යොමු කරමින් මහපාරේ ගමන් කරලා අනතුරුවලට පවා ලක්වී තියෙනවා.

ගුරුතුමිය :

ඔව්, ඒ හැම අදහසකින් ම කියවුණේ ජංගම දූරකථනය නිසා වන විනාශය පිළිබඳවයි. නමුත් දරුවන් ඇහුම්කන් දුන් ලිපියේ තොරතුරු පරිදි තේරුම් ගන්න අවශ්‍යයි, නව තාක්ෂණයේ දියණුව ඇත්තේ මිනිසාගේ යහපතට බව. දෙවියන් වහන්සේ ප්‍රඥාව දී තිඛෙන්නේ මිනිසාගේ යහ පැවැත්ම උදෙසායි.

දැන් දෙවන කණ්ඩායම ඉදිරිපත් කරන්න.

2 වන කණ්ඩායමේ නායක :

අපට ලැබුණේ හිතෝපදේශ 3:21 හා එපීස 5:15-17 ට අනුව "අන්තර්ජාල පහසුකම හා මුහුණු පොත භාවිතය පිළිබඳ කිතුනු දැක්ම කෙසේ විය යුතු ද" යන මාතෘකාව යටතේ වාර්තාවක් ඉදිරිපත් කිරීමටයි. මා අපේ වාර්තාව දැන් ඉදිරිපත් කරන්නම්.

දේව අභිමතයට අනුව අන්තර්ජාල පහසුකම හා මුහුණු පොත භාවිත කරමු.

වර්තමාන ලෝකයේ තාක්ෂණයේ දියුණුවත් සමග හඳුන්වා දී ඇති අතිශයින් ම වැදගත් කොට සැලකිය හැකි අන්තර්ජාල පහසුකම නිසා ලියා නිම කළ නොහැකි තරමට විවිධ අවශ්‍යතා සපුරා ගැනීමේ පහසුකම් සැපයීමක් සිදුවන බව කිව යුතු ම ය.

වෛද්‍ය විද්‍යාව, ගමනාගමනය, වාරිමාර්ග, මුද්‍රණය, ආදි විවිධ ක්ෂේත්‍රවල දියුණුව මෙන් ම සන්නිවේදනයේ නව පෙරලියක් වන අන්තර්ජාල පහසුකම නව තාක්ෂණ දියුණුවේ ඉතා පුළුල් වූ මංපෙත් විවර කිරීමක් සිදුකර ඇත.

අන්තර්ජාල පහසුකම් හරහා ඕනෑ ම ක්ෂේත්‍රයක තොරතුරු ලබා ගැනීමට, විශ්ව දැනුම ලබා ගැනීමට, විද්‍යුත් තැපෑල පහසුකම් සපයා ගැනීමට, ඓතිහාසික, වර්තමාන හා අනාගත තොරතුරු පිළිබද දැනුවත් වීමට බලවත් මෙහෙවරක් ඉටු කරයි. එක් තැනක සිට ලෝකයේ ඕනෑ ම රටක් හා සම්බන්ධ වෙමින් සන්නිවේදන සම්බන්ධතා පවත්වා ගැනීමට හැකි වේ. විවිධ සේවා සපයන වෙබ් අඩවි පැවතීම නිසා අන්තර්ජාල මගින් පහසුකම් රැසක් සැපයේ. ඒ මගින් කාලය ඉතිරි වීම, බුද්ධිමය දැනුම හුවමාරු කර ගැනීමට හැකිවීම තුළින් දැනුම අලූත්කර ගැනීම වැනි යහපත් වාසි මිනිසාට අත්කර ගත හැකි වේ.

එමෙන් ම අන්තර්ජාලය භාවිත කරමින් පවත්වා ගෙන යනු ලබන "මුහුණු පොත" (Face Book) මගින් ද බොහෝ පහසුකම් සැලසී ඇත. දුර බැහැර මෙන් ම විදෙස් හි සිටින මිතුරන් ඇසුර, තොරතුරු හුවමාරුකර ගැනීම, අදහස් විමසීම, වැනි යහපත් සන්නිවේදන ක්‍රමයක් ලෙස මුහුණු පොත යොදාගත හැකි ය. වෙනත් අය ලැබූ අත්දැකීම් අධ්‍යයනය කිරීමට හා හුවමාරු කර ගැනීමට අවස්ථා මුහුණු පොත මගින් හිමි වේ.

මෙලෙස වර්තමාන තාක්ෂණ දියුණුව උදෙසා අප ලද දේව කරුණාව පිළිබඳ ව දේව වචනයේ සඳහන් දේ විමසා බලමු.

නව තාක්ෂණය දියුණුවෙන් දියුණුවට පත්වුවත් අන්තර්ජාල පහසුකම හා මුහුණු පොත නමැති පහසුකම වර්තමාන සමාජයේ යහපත උදෙසා පමණක් ම භාවිත කර ඇති දැයි විමසා බැලීම වැදගත් කරුණකි. මන්ද වර්තමානයේ අසන්නට හා දකින්නට ලැබෙන තොරතුරු අනුව බොහෝ විට තාක්ෂණික දියුණුව යහපතට වඩා අයහපතට යොදා ගැනීම නිසා ඇතිවන විනාශය ප්‍රබල වී ඇත. අන්තර්ජාලය හරහා සිදුවන ඇතැම් අක්‍රමිකතා නිසා දරුවන් නොමගට යොමුවීම, එකිනෙකා අපහාසයට හා අපකීර්තියට පත් වීම, විවිධ අන්තර්ජාල ක්‍රීඩා මගින් සිදුවන කාලය නාස්තිය නිසා දරුවන්ගේ අධ්‍යාපනය හා යහපැවැත්ම සඳහා යොමුවිමට ඇති කාලය නාස්ති වීම, පවුලේ සබඳතා පවත්වා ගැනීමට තිබෙන කාලය අනවශ්‍ය ලෙස අන්තර්ජාලයට යොමු කිරීම යනාදි අයහපත් කරුණු පිළිබඳ ව අප සැලකිලිමත් විය යුතු වේ.

දේව වචනයට අනුව දෙවියන් වහන්සේ අපට දී ඇති විචක්ෂණ බුද්ධිය හා තීක්ෂණ ඥානය දියුණු කර ගැනීමත් ඒවා අප කෙරෙන් පහ ව නොගොස් ඥානවන්ත ව අප ක්‍රියා කිරීමත් උන්වහන්සේ අපගෙන් බලාපොරොත්තු වන සේක.

උන්වහන්සේ වදාළ පරිදි කාලය නපුරු බැවින් ඇති හැම අවස්ථාවකින් ම නිවැරැදි ලෙස ප්‍රයෝජන ගනිමින් සමිඳාණන් වහන්සේගේ කැමැත්ත ඉටු කිරීමට කටයුතු කිරීම කිතුනු දරුවන් වන අපගේ යුතුකම බව සිහි තබාගෙන ඒ අනුව ජීවත් වීමට උත්සාහ කරමු. දේව මඟපෙන්වීම ඉල්ලා යාච්ඤා කරමු.

ගුරුතුමිය :

එම කණ්ඩායමේ අදහස් පිළිබඳ ව මම සතුටු වෙනවා. අන්තර්ජාලය හා මුහුණු පොත පිළිබඳ ව යහපත අයහපත හඳුනාගෙන කටයුතු කළ යුතු බව දැන සිටීමත් සතුටට කරුණක්. දැන් අපේ අවසාන කණ්ඩායමේ ඉදිරිපත් කිරීම බලමු.

3 වන කණ්ඩායමේ නායක :

අපට ලැබුණු මාතෘකාව කොලොස්සි 3:5-7, 1 තෙසලෝනික 4:2-8 දක්වා බයිබල් කොටස කියවා "කිතුනු දරුවකු ලෙස නිවැරැදි දේ දැකීමටත් කියවීමටත් යොමු විය යුතු වේ" යන්නයි. මා දැන් සූදානම් වන්නේ ඒ මාතෘකාව යටතේ අපගේ කණ්ඩායමේ සාකච්ඡා කළ දේ ඔබ හමුවේ තැබීමටයි.

ශ්‍රව්‍ය දෘශ්‍ය මාධ්‍ය නිවැරැදි ව භාවිත කරමු

මිනිසාගේ රස වින්දනය හා දැනුම අලූත් කර ගැනීම සඳහා ප්‍රබල මාධ්‍යයක් ලෙස කටයුතු කරන පුවත්පත්, සඟරා හා චිත්‍රපට තුළින් ප්‍රබල සන්නිවේදන කර්තව්‍යයක් සිදු වේ. පොතපත තුළින් ද පුළුල් දැනුමක් ඇතිකර ගැනීමට හැකි අතර විද්‍යුත් මාධ්‍ය වන රූපවාහිනිය හා චිත්‍රපට මගින් ඊටත් වඩා මනසේ රැඳෙන සුලූ දර්ශන මගින් දැනුම වර්ධනයක් සිදු වේ. මුද්‍රණ ශිල්පයේ දියුණුවත් සමග විවිධ පොත පත සඟරා ආදිය එළි දැක්වුණ අතර අවශ්‍ය අවස්ථාවන්හි දි තොරතුරු එක්රැස්කර තබා ගැනීමට දැනුම උකහා ගැනීමට එමගින් අවස්ථාව උදා වී තිබේ. තව ද චිත්‍රපට හා රූපවාහිනිය මගින් නිදහස් මනසක් ඇති කර ගැනීමටත්, විනෝදය සතුට ලබා ගැනීමටත්, අප වැනි දරුවන්ගේ අධ්‍යාපනික අවස්ථා පුළුල් ලෙස උදාකර ගැනීමටත් අවස්ථාව උදා වී තිබේ.

නමුත් වර්තමානයේ මෙම පහසුකම් සමාජයේ යහපතට යොදා ගැනීම වෙනුවට අයහපතට යොදා ගනිමින් අසභ්‍ය චිත්‍රපට, සඟරා හා පොත් පත් භාවිතයට යොමු වීමෙන් මිනිස් මනස විකෘති කරමින්, දේව අණ පනත් කඩ කරමින් නව තාක්ෂණික දියුණුව විනාශය කරා ගෙන ගොස් තිබේ. මිනිසාට ලබා දුන් දේව දීමනාව වන ප්‍රඥාව තුළින් වරදට යොමුවන මිනිසාට අත්වන උදහස පිළිබඳ ව, කොලොස්සි 3:5-7 දක්වා බයිබල් කොටසේ මෙලෙස සඳහන් වේ.

මෙලෙස අසභ්‍ය චිත්‍රපට සඟරා හා පුවත්පත් මගින් සිතින් මෙන් ම ක්‍රියාවෙන් ද කාමමිථ්‍යාචාරයට, අපිරිසිදුකමට, කාමරාගයට, නපුරු තෘෂ්ණා යන දුසිරිත්වලට යොමුවන බවත් දේව උදහස පැමිණෙන බවත් දේව වචනය තුළින් පැහැදිලි වේ. දේව වචනයේ සඳහන් දේ නම්;

ඉහත දේව වචනයට අනුව අපගේ ජීවිත හැඩගස්වා ගනිමින් උන්වහන්සේට ප්‍රසන්න වූ දිවි පෙවෙතක් ගත කිරීමට කිතුනු දරුවන් වන අපි සිතට ගනිමු. ඒ අනුව

• අපගේ ශරීර දමනය කර ගනිමු.
• අපගේ සිත් පිරිසිදු ව තබා ගනිමු.
• දෙවියන් වහන්සේගේ කැමැත්ත අනුව ශුද්ධවත් ජීවිතයක් ගත කරමු.
• කාමමිථ්‍යාචාරයෙන් වැළකී සිටිමු.
• අවට සිටින අය කෙලෙස ක්‍රියා කළත් නිවැරැදි දේ අවබෝධ කර ගනිමින් යහපත් ජීවිත ගත කරමින් අන් අයට ආදර්ශවත් වෙමින් ජීවත් වෙමු.

ගුරුතුමි :

බොහොම හොඳයි. කණ්ඩායම් තුනේ ම ඉදිරිපත් කිරීම් පිළිබඳ ව මම සතුටු වෙනවා. දරුවන් ඉදිරිපත් කළ කරුණු තුළින් ම දැන් ඔබට වැටහෙනවා ඇති නව තාක්ෂණයේ දියුණුව ඉතා හොඳ නමුත් ඒවා නිසි ලෙස භාවිත කරමින් සමිඳුන්ගේ කැමැත්ත සොයා බලමින් දෙවියන් වහන්සේ දුන් ප්‍රඥාව තුළ උන්වහන්සේ මහිමයට පත්වන ලෙස ජීවත් වීම කිතුනු අපගේ යුතුකම හා වගකීම බව

ඔබ සැමට ජේසු පිහිටයි.

දරුවන් :

ජේසු පිහිටයි ගුරුතුමි.