1 කොරින්ති 6 : 12-14, 18-20 හෙබ්‍රෙව් 13 : 4

දෙවියන් වහන්සේ උන්වහන්සේගේ ස්වරූපය අනුව අප මවා වදාළ බවත්, දේව මැවිල්ල තුළ අප ඉතා ම වටිනා දේව මැවිල්ල බවත්, අපට ජීවිතය ලබා දුන්නා සේ ම අප සුරකින්නේ දෙවියන් වහන්සේ බවත්, අප මීට පෙර වසරවල දී හදාරා ඇත.

දෙවියන් වහන්සේ මෙලෙසින් තම දේව මැවිල්ල තුළ ඔබ ඉතා උසස් කොට තැබුවා පමණක් නොව ඔබ "ශුද්ධාත්මයාණන් වහන්සේගේ මාළිගාව" බව ද දේව වචනයේ සඳහන් වේ. ඒ මෙලෙසිනි.

දේව වචනයට අනුව,

• අපගේ ශරීර අපට ලබා දී තිබෙන්නේ දෙවියන් වහන්සේ විසිනි.
• එහෙයින් අපගේ ශරීරයේ අයිතිය ඇත්තේ දෙවියන් වහන්සේ සතු ව ය.
• ශුද්ධාත්මයාණන් වහන්සේගේ මාළිගාව වනුයේ අප ශරීරයයි. එබැවින් ශුද්ධාත්මයාණන් වහන්සේ අප තුළ වැඩ වසන සේක.
• එබැවින් අපගේ ශරීර දෙවියන් වහන්සේට ගෞරව වන ලෙසට නිවැරැදි ව, ශුද්ධ ව පවත්වා ගත යුතු වේ.

මෙලෙස අපගේ ශරීර දෙවියන් වහන්සේට ගෞරව වන ලෙසට නිවැරැදි ව ශුද්ධ ව පවත්වා ගැනීමට නම් අප තුළ පැවැතිය හැකි අයහපත් ජීවන රටා හඳුනාගෙන, ඒවායින් මිදී නිවැරැදි ජීවිත රටාවක් අනුගමනය කිරීමට සැම විට ම උත්සාහ ගැනීම වැදගත් වේ. අප අපගේ ජීවිත පවත්වා ගත යුතු නිවැරැදි ආකාරය පිළිබඳ ව දේව වචනයෙන් අපට ලබා දෙන මග පෙන්වීම විමසා බලමු.

"මා කැමති දෙයක් කිරීමට මට නිදහස ඇතැ"යි අපි බොහෝ විට සිතන්නෙමු. එහෙත් ඉහත දේව වචනයට අනුව එය එසේ නොවන බව පැහැදිලි ය. දෙවියන් වහන්සේ අපට ලබා දී ඇති නිදහස නම් සියල්ලේ දී යහපත ම තෝරා ගැනීම උදෙසා පමණක් වේ. එහෙයින් කිසි විටක කිසිදු අයහපත් දෙයකට අවනත නොවී සිටීමට අපගේ සිත් යොමු කළ යුතු වේ. අපට ලබා දී තිබෙන නිදහස නිවැරැදි ජීවිත පැවැත්මක් උදෙසා මිස දෙවියන් වහන්සේ අනුමත නොකරන්නා වූ අයහපතට යොමු වීමකට ලැබෙන නිදහසක් නොවන බව දේව වචනයෙන් අපට අවබෝධ කරගත හැකි වේ.

දෙවියන් වහන්සේ වදාළ ලෙස ශුද්ධාත්මයාණන් වහන්සේගේ මන්දිරය වූ ඔබ තුළ උන්වහන්සේ වැඩ වසන බව අන් අයහට ප්‍රකාශ වීමට නම් ඔබගේ සිතුවිලි, කථාව, හා හැසිරීම දේව කැමැත්තට අනුකූල වීම අවශ්‍ය වේ. එබැවින් ඊට සරිලන ලෙස යහපත් නිවැරැදි ජීවිත පැවැත්මකට ඔබ යොමු වීම ද අවශ්‍ය වේ. අවසානයේ අපගේ ජීවිතවලින් සැබෑ දේව ස්වරූපය අන්‍යයන් වෙත අත් දකින්නට හැකිවීම අපේක්ෂා කෙරේ.

අපගේ ජීවිත තුළින් දේව ස්වරූපය අන් අය අත් දකින්නට නම් අපගේ ජීවිත පැවැත්ම තුළින් බැහැපත්කම, දැහැමිකම, ශුද්ධවන්තකම, අවංකකම හා ප්‍රේමයෙන් පූර්ණ ක්‍රියාකාරිත්වයක් පිළිබිඹු වීම අවශ්‍ය වේ.

මෙලෙස දේව ගෞරවය උදෙසා දේව කැමැත්තට අනුකූල වන ලෙස අපගේ ශාරීරික ආත්මික හා මානසික ක්‍රියා නිවැරැදි ව, යහපත් ව පවත්වා ගත යුතු මුත් වර්තමානයේ සමාජය වෙතින් අසන්නට හා දකින්නට ලැඛෙන ප්‍රවණතා තුළ මාංසික තෘෂ්ණාවලට ප්‍රමුඛතාව ලබාදෙන, එනිසා ම ළමා ජීවිත හානියට පත් කරන, ළමා අපචාර හා අපගේ ජීවිත විනාශයට ලක් කෙරෙන සමාජ පසුබිමක් නිර්මාණය වෙමින් පැවතීම කනගාටුවට කරුණකි. මෙහි දී ඔබ වැනි දරුවන්ගේ ජීවිත සුරැකීමත්, දේව ගෞරවය උදෙසා ක්‍රියා කිරීමට ඔබට මග පෙන්වීමත් කිතුනු පවුලක වගකීමක් වන බව දේව වචනයේ මෙලෙස සඳහන් වේ.

පවුල් ජීවිතය ප්‍රේමණීය ව හා නොකැලැල් ව පවත්වා ගැනීම දේව නියමයක් බව මින් අපට පැහැදිලි වේ. එසේ නොවී එකී දේව නියමයන්ට එරෙහි ව කටයුතු කිරීම දේව විනිශ්චයට ලක් වීමට හේතු වන බව ද පෙන්වා දී ඇත. යහපත් පවුල් පසුබිමක් තුළ දරුවන්ගේ ජීවිතවල සුරක්ෂිත බවත් ඔවුන්ගේ අභිවෘද්ධියත් සහතික කෙරේ. නමුත් පවුලේ අයහපත් හැසිරීම් රටා නිසා;

• පවුල් ආරවුල් ඇති වේ.
• පවුල් සංස්ථාව බිඳ වැටේ.
• පවුලේ සතුට තුරන් ව ගොස් අසහනයට හේතු වේ.
• පවුලේ පිරිහීම වේගවත් වේ.
• දරුවන් අසරණ භාවයට පත් වේ.
• දේව විනිශ්චයට ලක් වේ.

මෙලෙස පවුලේ සමගිය බිඳ වැටීම හේතුවෙන් විවිධ දුක් කරදරවලට දෙමාපියන් හා දරුවන් ලක්වන්නේ නිරායාසයෙනි. එබැවින් අපි නිවැරැදි ව, ශුද්ධවත් ව, නොකැලැල් ව ජීවත් වෙමින් අපගේ ද, සමාජයේ ද සුරක්ෂිතතාව සුරැකීමට කටයුතු කරමු. ඒ මගින් සදාචාරාත්මක සමාජයක් ගොඩ නැගීමට සාමූහික ව දායක වෙමු.