3.1 - අවශ්‍යතා සපුරාලීමට තාක්ෂණික සේවා යොදා ගනිමු
මෙම පරිච්ඡේදය අධ්‍යයනය කිරීමෙන් ඔබට,
- පාසල් ප්‍රජාවට අදාළව තාක්ෂණික සේවා අවශ්‍යතා විමසා බැලීමටත්,
- අපේක්ෂිත නව්‍ය තාක්ෂණික ක්‍රමවේද භාවිතයෙන් සැලසුම් සකස් කිරීමටත්,
- තෝරා ගත් සේවා සැපයීමක් ආරම්භ කර සාර්ථකව පවත්වා ගෙන යාමටත්,
හැකියාව ලැබෙනු ඇත.
දෛනික ජීවිතයේ අවශ්‍යතා අසීමිත ය. එම අසීමිත අවශ්‍යතා සපුරා ගැනීමේ දී කාර්යක්ෂමව සේවා සපයා ගැනීමෙන් කාර්යයන් පහසු කර ගැනීමට මිනිසා හුරු වී සිටියි. එවන් පසුබිමක පාසල් පරිශ්‍රයේ, නිවසේ හෝ සමාජයේ පවතින සේවා ගැටලූ හඳුනා ගනිමින් ඒවාට ගැළපෙන විසඳුම් ලබා දීමේ හැකියාව ඔබ සතු විය යුතු ය. එබැවින් කාලීන සමාජ අවශ්‍යතා හඳුනා ගනිමින්, ඒවා සපුරාලීමට හැකි, වඩාත් උචිත තිරසාර විසඳුම් එළිදැක්වීමට සමත් ගවේෂණාත්මක පුද්ගලයෙකු වීමට ඔබ යොමු කිරීම මෙම තාක්ෂණික ක්ෂේත්‍රයට අදාළ කෙටිකාලීන ව්‍යාපෘති කාර්යයන්හි මූලික අපේක්ෂාව වේ.
පහත දක්වා ඇත්තේ ගොවියෙකු විසින් සිය වගාවන් සඳහා ජලය ලබා ගැනීමට සකස් කරන ලද නිර්මාණ පිරිවිතර කිහිපයකි.
වර්ෂාව නොමැති දිනවල දී වගා භූමියට ස්වයංක්‍රීයව ජලය සැපයීම සඳහා ක්‍රමවේදයක් යොදා ගැනීම
පිරිවිතර
- වගා භූමියට ජලය සැපයීමට භාවිත කරන ජල ටැංකියට ජලය පිරුණු විට ජල පොම්පය ස්වයංක්‍රීයව නතර විය යුතු ය.
- ජල ටැංකියේ ජල ප්‍රමාණය අපේක්ෂිත මට්ටමට වඩා අඩු වූ විට ජල පොම්පය ස්වයංක්‍රීයව ක්‍රියාත්මක විය යුතු ය.
- අදාළ භූමියේ පසෙහි තෙතමනය අඩු වූ විට පමණක් ටැංකියෙන් ජලය ගොවිබිම වෙත ස්වයංක්‍රීයව නිකුත් විය යුතු අතර පස අපේක්ෂිත මට්ටමට පස තෙත් වූ පසු ජලය සැපයීම ස්වයංක්‍රීයව නතර විය යුතු ය.
මෙම පිරිවිතර අධ්‍යයනය කොට මෙම තාක්ෂණික සේවාවේ නිර්මාණශීලි බව වටහා ගන්න. ඉදිරියේ දී ඔබටත් එවැනි තාක්ෂණික සේවාවක් සිදු කිරීමේ හැකියාව ලබා ගත හැකි වනුයේ ඔබේ ගවේෂණාත්මක චින්තනය අවදි කිරීමෙනි.
ඉහත සඳහන් කළ ආකාරයේ ව්‍යාපෘතියක් නිම කිරීමට සඳහා දිගු කාලයක් අවශ්‍ය වේ. ඒ බව මෙම විසඳුමට ඇතුළත් නිර්මාණ පිරිවිතර අධ්‍යයනයේ දී පැහැදිලි වේ. පාසලේ දී සීමිත කාලයක් තුළ මෙවන් ව්‍යාපෘතියක් කිරීම සඳහා ඔබ එය මනාව සැලසුම් කර, නිවැරදි තීරණ ගෙන කි්‍රයාත්මක විය යුතුය. එවැනි ව්‍යාපෘතියකින් ලබන අත්දැකීම් පසුකාලීන ව නිර්මාණාත්මකව යොදා ගැනීමට ඔබට හැකි වනු ඇත.
දෛනික අවශ්‍යතා සඳහා ජලය සපයා ගැනීමේ ක්‍රමවේදය කාලය අනුව වෙනස් වී ඇති අයුරු නිරීක්ෂණය කරන්න.
අතීතයේ දී ජල ප්‍රභවය වෙත ගොස් ජලය රැගෙන ආ මිනිසා අද වන විට ජල ප්‍රභවයේ සිට අවශ්‍ය ස්ථානය දක්වා ජලය සපයා ගැනීමට හැකි වන සේ සේවාවන් වර්ධනය කරගෙන ඇති ආකාරය ඉහත රූප පෙළ මගින් ඔබට දැකගත හැකි වේ. සේවා සංවර්ධනය කෙරෙහි තාක්ෂණය භාවිතයේ වැදගත්කම මෙයින් පැහැදිලි වේ.
මේ අයුරින් එදිනෙදා දක්නට ලැඛෙන බොහෝ සේවා සලකා බැලීමේ දී කාලානුරූපීව ඒවායේ වර්ධනයක් සිදු වන බව දැකිය හැකි ය. එවැනි සේවා කිහිපයක් පහත රූප සටහන්වලින් දැක්වෙයි.
ව්‍යාපෘතියක් ඇසුරෙන් සේවා අවශ්‍යතා විසඳමු
පාසලේ මෙන් ම බාහිර ප්‍රජාව අතර ද ක්‍රියාත්මක වන ඇතැම් සේවා පිළිබඳ විමසා බැලීමේ දී ඒවායේ වර්ධනයෙහි මන්දගාමී බවක් දැකගත හැකි වේ. එමෙන් ම ඇතැම් පාසල්වලට මෙන් ම ඇතැම් ප්‍රජාවන් වෙත ද මූලික සේවා නිසි ලෙස සැපයීමට නොහැකි වී ඇති අවස්ථා දක්නට ලැබේ. එවැනි සේවාවක දුබලතාවක් නිවැරදි කිරීමෙන් හෝ නව සේවාවක් ඇති කිරීමෙන් ප්‍රජා සංවර්ධනයට දායක වීමෙන් ඔබට ආත්මාභිමානයක් ඇති වේ.
පාසල කේන්ද්‍ර කර ගත් සේවා අවශ්‍යතා මතුවන ගැටලූමය තත්ත්ව සඳහා උදාහරණ කිහිපයක් පහත දක්වා ඇත.
- පාසල් පරිශ්‍රයේ අනතුරුදායක ස්ථාන පැවතීම
- පාසල් පරිශ්‍රයේ මග සලකුණු, නාම පුවරු හා වාහන නැවතුම් ස්ථාන විධිමත් නොවීම
- පාසලේ සන්නිවේදන පද්ධතියේ දුබලතා පැවතීම
- පාසලේ පානීය ජල නළ පද්ධතියේ දුර්වලතා පැවතීම
- පන්ති කාමරයේ පරිසර තත්ත්වය නුසුදුසු වීම
- පාසලේ සනීපාරක්ෂක පද්ධතිය නිසි පරිදි නොපැවතීම
- අපද්‍රව්‍ය බැහැර කරවීම සඳහා නිසි ක්‍රමවේදයක් නොමැති වීම
පහත රූප සටහන් මගින් දැක්වෙන්නේ බොහෝ පාසල්වල දැකගත හැකි සේවා අවශ්‍යතා මතු වන ගැටලූමය තත්ත්ව කිහිපයකි
පාසලේ හා පාසල් ප්‍රජාවගේ තෝරා ගත් පොදු අවශ්‍යතා, තාක්ෂ‚ක ක්‍රමෝපාය උපයෝගී කර ගනිමින් ඉටු කරලීම තාක්ෂණික සේවා ලෙස හඳුන්වයි. ව්‍යාපෘතියක් ලෙස තාක්ෂණික සේවා සැපයීමට අපේක්ෂා කරන අවස්ථාවක දී එවැනි ගැටලූ සහිත තත්ත්ව හඳුනා ගැනීම සඳහා අනුගමනය කළ යුතු ක්‍රියාදාමයක මූලික කාර්ය පහත දැක්වේ.
ගැටලූ හඳුනා ගැනීම සඳහා සලකා බැලිය යුතු කරුණු
- තාක්ෂණික ශිල්ප ඥානය සහ කුසලතා පදනම් කර ගනිමින් පාසල් ප්‍රජාවට අදාළව සැපයිය හැකි තාක්ෂණික සේවා කවරේ ද?
- පාසලේ සංවර්ධනය කළ යුතු තාක්ෂණික සේවා කවරේ ද?
- පාසල් ප්‍රජාවට අදාළව දැනට විසඳුම් ලැබී නොමැති තාක්ෂණික සේවා ඉටු කිරීමට ගත යුතු පියවර මොනවා ද?
- අවශ්‍යතාව අනුව සැපයිය යුතු තාක්ෂණික සේවා ඉටු කිරීමට ගත යුතු පියවර කුමක් ද?
- නව්‍ය තාක්ෂණික සේවා භාවිතයේ ප්‍රයෝජන මොනවා ද?
- පවතින තාක්ෂණික සේවාවල නව්‍යකරණයට ලක්විය යුතු අංග කවරේ ද?
පාසලේ දී ඔබට ලැබී ඇති කාල සීමාව ඇතුළත, ව්‍යාපෘතියක් දියත් කිරීම සඳහා පෙර සුදානමක් අවශ්‍ය වේ. ඒ පිළිබඳ මූලික කරුණු ව්‍යාපෘති හැඳින්වීම යටතේ ඔබ හදාරා ඇත. එහි ලබා දී ඇති උපදෙස් අනුගමනය කිරීමෙන් ව්‍යාපෘති සාර්ථක කර ගැනීමට හැකි වනු ඇත. මෙම ක්‍රියාවලියේ දී ඔබ අනුගමනය කරන ලද සියලූ ම ක්‍රියාකාරකම් ස්වනිර්මාණ සංග්‍රහයේ ඇතුළත් කිරීම අත්‍යවශ්‍ය වේ. එමෙන් ම ව්‍යාපෘතියට අදාළ දෛනික තොරතුරු රැස් කර වාර්තා තබා ගැනීම සඳහා ක්ෂේත්‍ර පොතක් භාවිත කළ යුතු අතර එය සතියකට වරක් ගුරුතුමාගේ මග පෙන්වීම ලබා ගැනීම සඳහා ඉදිරිපත් කළ යුතු වේ.
මෙම කෙටිකාලීන ව්‍යාපෘතිය සාර්ථකව සම්පුර්ණ කර ගැනීම පිණිස අනුගමනය කළ යුතු පියවර කෙරෙහි මෙතැන් සිට අවධානය යොමු කරමු.
- ගැටලූව මතු කර ගැනීම
පාසලක හෝ පාසල් ප්‍රජාවට අවශ්‍ය සේවාවල පැවතිය යුතු තත්ත්ව හා පවතින තත්ත්ව අතර හිදැස ගැටලූවක් ලෙස හඳුනා ගත හැකි ය. සපුරා ගැනීමට අපොහොසත් වූ පාසල් ප්‍රජා සේවා අවශ්‍යතා පිළිබඳ ගුරුතුමාගේ මඟ පෙන්වීම යටතේ ස්වඅධ්‍යයනයෙන් හා ගවේෂණවල යෙදෙමින් එවැනි අවශ්‍යතා ඉටු කර ගැනීමට අපොහොසත් වීමට බලපා ඇති හේතු විමසා බැලිය යුතු ය.
තෝරා ගත් ගැටලූ අතරින් කාලය සහ ආශ්‍රිත සම්පත් සීමා තුළ, ඉංජිනේරුමය තාක්ෂණික ක්ෂේත්‍රවලට අයත් තාක්ෂණික සේවා සඳහා විසඳුම් ලබා දීමේ හැකියාව ඇති, එකිනෙකට වෙනස් වු ගැටලූ තෝරා ගැනීමට ගුරුතුමා හෝ ගුරුතුමිය ඔබට සහාය වනු ඇත.
- ව්‍යාපෘතිය සැලසුම් කිරීම
ව්‍යාපෘතිය සැලසුම් කිරීමේ දී අවධානය යොමු කළ යුතු කරුණු රාශියකි. පළමුව පාසලේ හෝ ප්‍රජාවේ අවශ්‍යතා විමසා බැලිය යුතු ය. එමගින් ඔබගේ ව්‍යාපෘතියෙන් සේවා සැපයෙන කණ්ඩායම තෝරා ගැනීමට හා අදාළ සේවාලාභීන් සංඛ්‍යාව මත සැපයිය හැකි සේවා ධාරිතාව නිර්ණය කිරීමට හැකියාව ලැබෙනු ඇත. ව්‍යාපෘතියට අදාළ තාක්ෂණික සේවා සඳහා වූ සැලසුම් හා පියවර තීරණය කිරීම සඳහා ද එය වැදගත් වේ. මෙහි දී ගැටලූව විසඳීම පිණිස ලබා දෙන තාක්ෂණික විසඳුම් සරල විය යුතු ය. එමෙන් ම ඒවා පහසුවෙන් ක්‍රියාත්මක කළ හැකි විය යුතු ය. ඒ සඳහා නව්‍ය තාක්ෂ‚ක ක්‍රමෝපාය අන්තර්ගත කිරීමට ඔබට හැකියාව පවතී.
ඔබගේ ව්‍යාපෘතිය සඳහා අදාළ සම්පත් පහසුවෙන් ලබා ගත හැකි ක්‍රම පිළිබඳ සොයා බැලීම ද ගුරුතුමා හෝ ගුරුතුමියගේ මඟ පෙන්වීම යටතේ අදාළ ක්‍රියාවලි සඳහා සම්පත් පුද්ගලයන් හඳුනා ගැනීම හා ඔවුන්ගේ සහාය ලබා ගැනීම ද කළ යුතු ය.
ව්‍යාපෘතියේ අවශ්‍යතාව අනුව සේවාව සඳහා භෞතික හා භෞතික නොවන ගුණාංග (පිරිවිතර) තීරණය කරන්න. මෙහි දී ද්‍රව්‍ය, ආවුද හා උපකරණ, ඇටවුම්, ක්‍රියාවලි හා ශිල්ප ක්‍රම ආදිය සඳහා පිරිවිතර තෝරා ගැනීමට කටයුතු කළ යුතු ය.
ව්‍යාපෘතිය සිදු කරගෙන යාමේ දී පරිසර සංරක්ෂණ ක්‍රමවේද භාවිත කිරීමටත්, අවම බල ශක්ති භාවිතයට ප්‍රමුඛත්වය දීමටත්, තාක්ෂ‚ක සේවාවලට අදාළ ආරක්ෂක පිළිවෙත් අනුගමනය කිරීමටත්, සම්පත් ඵලදායීව භාවිත කිරීමටත් හැකි සෑම අවස්ථාවකදී ම පියවර ගත යුතු ය.
ව්‍යාපෘතියෙන් ඉටු කෙරෙන තාක්ෂණික සේවාවල ගුණාත්මකභාවය සහ ව්‍යාපෘතිය සඳහා අවශ්‍ය සම්පත් අතර තුලනයක් පැවතිය යුතු ය. මේ සඳහා නියාමනය හා ඇගයීම අඛණ්ඩව සිදු කිරීම වැදගත් වේ.
ක්‍රියාකාරී සැලැස්ම
ක්‍රියාකාරී සැලැස්ම ලෙස හඳුන්වනු ලබන්නේ අදාළ ව්‍යාපෘතිය ආරම්භයේ සිට අවසානය දක්වා පියවර ඇතුළත් කාල රාමුවකි. එම කාල රාමුව තුළ පහත සඳහන් පියවර ඇතුළත් විය යුතු ය.
- තීරණ ගැනීම
ව්‍යාපෘතියේ දී සිදුකළ යුතු වැදගත් කාර්යයක් වනුයේ තීරණ ගැනීම යි. එහි දී ඔබ නිවැරදි තීරණයකට එළඹීම මගින් ව්‍යාපෘතිය සාර්ථකව නිම කළ හැකි වේ. විසඳුම තීරණය කිරීම සඳහා, විකල්ප විසඳුම් ඇගැයීම සිදු කළ යුතු ය. ඒ සඳහා ආධාර වන නිර්ණායක කිහිපයක් පහත දැක්වේ.
- ප්‍රමිති හා පිරිවිතරවලට ගැළපීම
- භාවිත වන තාක්ෂණික ශිල්ප ක්‍රම, ආවුද හා උපකරණ හැසිරවීමට හැකියාව පැවතීම
- පහසුවෙන් සපයා ගත හැකි හා සපයා ගත යුතු ද්‍රව්‍ය සපයා ගැනීම
- අදාළ ද්‍රව්‍ය හා උපකරණ හෝ අනුයෝගී උපකරණ තෝරා ගැනීම
- සරල හා ප්‍රයෝජනවත් කාර්යයක් වීම හා එමගින් ඉගෙනුම් අවස්ථා සම්පාදනය වී තිබීම
- සපයාගත හැකි මුල්‍ය හා මුල්‍ය නොවන සම්පත් මගින් ක්‍රියාත්මක කළ හැකි වීම
- පාසලේ පවතින ගැටලූ අතරින් එකක් හෝ කිහිපයක් සඳහා විසඳුම් ලබා දිය හැකි වීම
- ව්‍යාපෘතිය සඳහා අවශ්‍ය වන කාලය තීරණය කිරීම
- කාර්යය පහසුවෙන් ක්‍රියාත්මක කර නිම කළ හැකි වීම
- තාක්ෂණික හා නඩත්තු සේවා ඉල්ලූම සැපයීම සඳහා අවශ්‍ය ධාරිතාව පැවතීම
ඉහත දක්වා ඇති සියලූ නිර්ණායක ඔබගේ ව්‍යාපෘතිය සඳහා අදාළ නොවුණ ද අවශ්‍යතා මත සුදුසු නිර්ණායක තෝරා ගත යුතු ය.
- ක්‍රියාත්මක කිරීම
අදාළ ව්‍යාපෘති කාර්යය සාර්ථක කර ගැනීම සඳහා සැලසුම් කරන ලද පියවර අනුගමනය කිරීම අත්‍යවශ්‍ය වේ. එහි දී ක්‍රියාකාරී සැලසුමේ පියවර පෙළ ගැස්සීම අනුව හා කාල රාමුව අනුව ක්‍රියාත්මක විය යුතු ය.
ගැටලූවට අදාළ ගවේෂණයෙන් හඳුනා ගත් තොරතුරු සහ පිරිවිතර සොයා බලා අනතුරුව ක්‍රියාවට නැංවිය හැකි උචිත ම විසඳුම තෝරා ගැනීමට කටයුතු කරන්න. අවශ්‍යතාව අනුව සැලසුම් චිත්‍ර හා ආකෘති ගොඩ නැගීම සිදු කරන්න. එය සෑම අවස්ථාවකදීම අනිවාර්ය නොවේ. ව්‍යාපෘතිය සඳහා යොදා ගන්නා තාක්ෂණික ශිල්ප ක්‍රමවලට අදාළ ක්‍රියාවලිය සටහන් කර ගන්න. ඒ සඳහා අවශ්‍ය ආවුද හා උපකරණ ලැයිස්තුවක් ද සකස් කර ඒවා සපයා ගැනීමට කටයුතු කරන්න. මෙහි දී ද්‍රව්‍ය ප්‍රමාණ අවශ්‍යතාව තක්සේරු කර ඇස්තමේන්තුවක් සකස් කළ යුතු ය. හඳුනාගත් සම්පත් දායකයින් ගේ සහාය ලබා ගැනීම ද කණ්ඩායමේ එක් එක් සාමාජිකයාගේ කාර්යයභාරය බෙදා ගැනීම ද මගින් කාර්යය පහසු කරවයි.
ඔබගේ ව්‍යාපෘති කාලය තුළ දී භාවිත වන තාක්ෂ‚ක ශිල්ප ක්‍රමවල යෝග්‍යතාව තහවුරු කිරීම සඳහා නියාමන අධ්‍යයනයක් ගුරුතුමා හෝ ගුරුතුමියගේ සහයෙන් සිදු කළ හැකි නම් වඩාත් යෝග්‍ය වේ.
ව්‍යාපෘතිය නිම කිරීමෙන් අනතුරුව පහත කරුණු පිළිබඳ ව පසු විපරම සිදු කරන්න.
- තාක්ෂණික සේවාවෙහි ක්‍රියානුරූපී බව පිළිබඳ පන්තිය දැනුවත් කිරීම
- තාක්ෂණික සේවාවේ සහ එහි සාර්ථකත්වය පිළිබඳ ස්වයං ඇගැයීමක නිරත වීම
- අන්‍ය කණ්ඩායම්වල ප්‍රතිපෝෂණ අදහස් ඇතුළත් කිරීම