2.1 - ආහාර මූලික කරගත් කර්මාන්ත හඳුනා ගනිමු
මෙම පරිච්ඡේදය අධ්‍යයනය කිරීමෙන් ඔබට,
- ආහාර හා සබැඳි කර්මාන්තවල පැවැත්ම කෙරෙහි බලපාන සාධක හඳුනා ගැනීමටත්,
- සැපයුම්දාමය පිළිබඳ සැලකිලිමත් වෙමින් නිෂ්පාදන ක්‍රියාවලිය සැලසුම් කිරීමටත්,
- ආහාර මුලික කර ගත් කර්මාන්තයෙහි යෙදීම සඳහා සූදානම ප්‍රදර්ශනය කිරීමටත්,
- ව්‍යාපෘති සැලසුම් සකස් කිරීම සඳහා සුදුසු මෘදුකාංගයක් යොදා ගැනීමටත්
හැකියාව ලැබෙනු ඇත.
ලෝකයේ ජීවත් වන විවිධ පුද්ගලයන්ගේ අවශ්‍යතාව අනුව ඔවුන්ගේ රුචිකත්වයට ගැළපෙන පරිදි නව ආහාර ආශ්‍රිත නිෂ්පාදන නිරන්තරයෙන් වෙළෙඳපොළට හඳුන්වා දීම සිදු වේ. එමෙන් ම පවතින නිෂ්පාදන වැඩි දියුණු කර ආහාර කර්මාන්තයෙහි නියැලෙන අනෙකුත් ආයතනවල නිෂ්පාදන හා තරගකාරී මිල ගණන්වලට ඉදිරිපත් කිරීමට ද ආහාර නිෂ්පාදකයන් විසින් කටයුතු කරනු ලැබේ. ඒ අනුව ආහාර නිෂ්පාදකයින් අතර තියුණු තරගයක් ද දක්නට ලැබේ. මෙම තරගයට මුහුණ දීම සඳහා ආහාර නිෂ්පාදන ආයතන විවිධ උපක්‍රම යොදා ගනියි.
ආහාර කර්මාන්තය කෙරෙහි බලපාන සාධක හඳුනා ගනිමින් පාරිභෝගික අවශ්‍යතාවට ගැළපෙන, ගුණාත්මක ආහාර, සෞඛ්‍යාරක්ෂිතව හා නිර්මාණශීලීව ඉදිරිපත් කරන ආකාරය පිළිබඳ මෙම පරිච්ඡේදයේ දී සාකච්ඡා කරනු ලැබේ.
ආහාර ආශ්‍රිත කර්මාන්තවල පැවැත්ම කෙරෙහි බලපාන සාධක
ආහාර නිෂ්පාදනය කරන ආයතනවල නිෂ්පාදන ධාරිතාව, ලාභය සහ පැවැත්ම කෙරෙහි ප්‍රධාන වශයෙන් බලපාන කරුණු කිහිපයක් පහත දක්වා ඇත.
- ජනගහන වර්ධනය
ආහාර සඳහා ඇති ඉල්ලූම දිනෙන් දින වර්ධනය කරයි.
- ගෝලීයකරණය
ආහාර නිෂ්පාදනය සඳහා දේශීය (Local) සහ විදේශීය (Foreign) වෙළෙඳපොළ අවස්ථා නිර්මාණය කරයි.
- වෙළෙඳ ගිවිසුම්
රටවල් අතර ඇති කර ගනු ලබන වෙළෙඳ ගිවිසුම් නිසා පහසුවෙන් විදේශීය වෙළෙඳපොළට නව නිෂ්පාදන අඩු වියදමකින් (කුඩා බදු ප්‍රතිශත සහිත ව) හඳුන්වා දීමේ අවස්ථා ආහාර නිෂ්පාදන ආයතනවලට හිමි වේ.
- සුපිරි වෙළෙදසැල් ප්‍රචලිත වීම (Supermarkets)
ආහාර නිෂ්පාදකයින් මෙම වෙළඳසැල්වල අවශ්‍යතාව පරිදි උසස් ගුණාත්මක බවින් සහ ප්‍රමිතියෙන් යුතු සන්නාම සහිත (Branded) නිෂ්පාදන, තරගකාරීව නිපදවිය යුතු ය.
- ආහාර සෞඛ්‍යාරක්ෂිත බව (Food safety)
මේ පිළිබඳ පාරිභෝගික අවධානය වැඩි වීම නිසා නිෂ්පාදකයෝ තම නිෂ්පාදන රජයේ අනුමත නීතිරීතිවලට අනුකූලව සිදු කිරීමට උත්සුක වෙති.
- සෞඛ්‍ය සම්පන්න ආහාර (Healthy Food)
සඳහා පාරිභෝගික අවධානය වැඩි වීම මේ නිසා දේශිය ආහාර, කෘති්‍රම රසකාරක නොමැති ආහාර, පිෂ්ටය අඩු ආහාර සහ මේදය අඩු ආහාර ආදිය සඳහා ඉල්ලූම වැඩි වී ඇත.
- ආහාර හා සබැඳි සේවා ලබා ගැනීම
සංකීර්ණ ජීවන රටාව නිසා අර්ධ වශයෙන් හෝ අවම වශයෙන් සැකසූ හෝ ක්ෂණික ආහාරවලට පාරිභෝගික ඉල්ලූම වැඩි ය.
ආහාර පරිභෝජනය සඳහා පාරිභෝගිකයා තුළ ඇති අපේක්ෂා
ආහාර සම්බන්ධයෙන් පාරිභෝගිකයාගේ අපේක්ෂා විවිධ වන අතර එම අපේක්ෂා, පුද්ගල සාධක මත වෙනස් විය හැකි ය. එම නිසා ආහාර නිෂ්පාදන කාර්යයේ දී පාරිභෝගික අපේක්ෂා උපරිම වශයෙන් මුදුන්පත් කිරීම සඳහා ක්‍රියා මාර්ග අනුගමනය කිරීම අත්‍යවශ්‍ය වේ. විශේෂයෙන් යම් ආහාරයක් එම ස්වභාවයෙන් ම අඛණ්ඩව පවත්වා ගැනීමෙන් හෝ සංවර්ධනයක් සහිතව ඉදිරිපත් කිරීමෙන් පාරිභෝගිකයාගේ අපේක්ෂා මුදුන්පත් කිරීමට අදාළ ආහාර නිෂ්පාදකයාට හෝ නිෂ්පාදන ආයතනයට හැකි විය යුතු ය. මෙහි දී පාරිභෝගිකයා විසින් ප්‍රධාන වශයෙන් ආහාරයේ මිල, ආහාර නිෂ්පාදනයේ විවිධත්වය (Food Product Variety), ආහාරයේ ගුණාත්මකභාවය (Food Quality) යනාදි සාධක පිළිබඳ සලකා බලනු ලැබේ.
ආහාර නිෂ්පාදනයක තිබිය යුතු ප්‍රමිති හා පිරිවිතර
ආහාර නිෂ්පාදන ක්‍රියාවලියේ දී ආහාරයේ ගුණාත්මක බව සහ සෞඛ්‍යාරක්ෂිත බව රැක ගැනීමට ආහාර ප්‍රමිති යොදා ගත හැකි ය.
ආහාර සඳහා ප්‍රමිති හා පිරිවිතර යොදා ගැනීමේ වැදගත්කම
- පාරිභෝගිකයාට සෞඛ්‍යාරක්ෂිත ආහාරයක් ලබා දීම
- පාරිභෝගිකයාට ආහාර සැපයුම්දාමය (Food Chain) පිළිබඳව විශ්වාසය තහවුරු කිරීම
- ගුණාත්මක හා සෞඛ්‍යසම්පන්න ආහාර තෝරා ගැනීමට පහසු කිරීම
- ආහාරවල ගුණාත්මක බව සහ සෞඛ්‍යාරක්ෂිත බව සන්නිවේදනය කිරීම
ශ්‍රී ලංකාවේ බහුලව භාවිත වන්නේ ජාත්‍යන්තර ප්‍රමිතිකරණ සංවිධානය (ISO) සහ ශ්‍රී ලංකා ප්‍රමිති ආයතනය (SLS) මඟින් නිර්දේශිත ප්‍රමිති වේ.
සෞඛ්‍යාරක්ෂිත සහ ඉහළ ගුණාත්මක බවින් යුතු ආහාර පිළියෙල කිරීම
ආහාර නිෂ්පාදනයේ දී හොඳ නිෂ්පාදන පුරුදු (GMP - Good Manufacturing Parctices) භාවිතයෙන්, ඉහළ ගුණාත්මක බවකින් සහ සෞඛ්‍යාරක්ෂිත බවකින් යුතු ආහාර පාරිභෝගිකයින්ට ලබා දීමට නිෂ්පාදකයාට හැකියාව ලැබේ. හොඳ ආහාර නිෂ්පාදන පුරුදු ප්‍රධාන වශයෙන් කොටස් හතරකට බෙදා වර්ග කළ හැකි ය.
පුද්ගල සනීපාරක්ෂාව
- ක්‍රමවත් ලෙස අවශ්‍යතාව අනුව දැත් සේදීම
- පිරිසිදු නිල ඇදුම් ඇදීම
- සුදුසු හිස් ආවරණ පැලදීම
- ආහාර නිෂ්පාදන ක්‍රියාවලිය අතරතුර ආභරණ සහ ඔරලෝසු භාවිත නොකිරීම
- නිෂ්පාදන ක්‍රියාවලිය අතරතුර ආහාර නොගැනීම සහ දුම් පානය නොකිරීම
ආහාර නිෂ්පාදනය කරන ස්ථානයේ පිරිසිදුකම සහ පහසුකම්
- අත් සේදීමට අවශ්‍ය පහසුකම් සහිත වෙන් කරන ලද ස්ථානයක් පවත්වා ගෙන යාම
- ආහාර නිෂ්පාදනය කරන ස්ථානයට හො`දින් එළිය හා වාතාශ්‍රය ලැබීමට සැලැස්වීම
- සකස් කරන ලද ආහාර නියමිත පරිදි ගබඩා කිරීමේ පහසුකම් තිබීම
- සකස් කරන ලද ආහාර, පිළියෙල නොකළ ආහාරවලින් (Raw Materials) වෙන් කොට ගබඩා කිරීමට අවශ්‍ය පහසුකම් තිබීම
- නිසි පරිදි පළිබෝධ පාලන ක්‍රම අනුගමනය කිරීම
උදාහරණ:- මීයන්, කැරපොත්තන්, සහ මැස්සන් පාලනය
ප්‍රමිතියෙන් යුතු උපකරණ (Equipment) සහ භාජන (Utensils) භාවිතය
- පහසුවෙන් පිරිසිදු කළ හැකි සහ ආහාර සමග ප්‍රතික්‍රියා නොකරන අමුද්‍රව්‍යවලින් නිර්මාණය කරන ලද ඒවා වීම
උදාහරණ :- මළ නොබැෙඳන වානේ භාජන - පහසුවෙන් නඩත්තු කළ හැකි වීම
නිෂ්පාදන ක්‍රියාවලිය පාලනය කිරීම
- උෂ්ණත්වය වැනි භෞතික සාධක පාලනය පිළිබඳ දත්ත නිරතුරුව ලබා ගැනීම සහ වාර්තා පවත්වා ගෙන යෑම
- අමුද්‍රව්‍ය පිළිබඳව නිසි පරිදි වාර්තා තබා ගැනීම
- සියලූ ම ආහාර නිෂ්පාදන සඳහා හඳුනා ගැනීමේ අංකයක් (Identification Number) හෝ කේතයක් ලබා දීම
- ආහාර තත්ත්ව පාලනය පිළිබඳව අවශ්‍ය පරීක්ෂණ සිදු කිරීම සහ වාර්තා තබා ගැනීම
ආහාර නියමිත පරිදි සකස් කිරීමේ ක්‍රියාවලිය
නිෂ්පාදනය කරනු ලබන ආහාර වර්ගය අනුව උපයෝගී කර ගත යුතු ක්‍රම වෙනස් වේ. නමුත් සෑම ආහාරයක් ම පිළියෙල කිරීමේ දී පොදු ක්‍රියාවලියක් අනුගමනය කළ යුතු වේ.
ආහාර මූලික කර ගත් කර්මාන්ත සැලසුම් කිරීම
ආහාර මූලික කරගත් කර්මාන්තයක් ආරම්භ කිරීමට පෙර සැලසුමක් සකස් කර ගැනීම ඉතා වැදගත් වේ. මෙහි දී වෙළෙඳපොළ හඳුනා ගෙන එහි අවශ්‍යතාවලට අනුකූලව අලෙවි කරන ප්‍රමාණය තීරණය කළ යුතු වේ. තව ද පළාතේ පවතින සුලබ අමුද්‍රව්‍ය
යොදා ගනිමින් ආහාර නිෂ්පාදනය සැලසුම් කිරීමෙන් වැඩි ලාභයක් උපයා ගත හැකි වේ. උදාහරණයක් ලෙස වැඩි ඉල්ලූමක් පවතින ආහාර ද්‍රව්‍ය හඳුනා ගෙන ඒවා වැඩි වශයෙන් නිෂ්පාදනය කළ යුතු වේ.
පහත දක්වා ඇත්තේ නිෂ්පාදන ක්‍රියාවලියක් සැලසුම් කර ගත යුතු ආකාරය පිළිබඳ දළ සටහනකි. මෙම පරිච්ඡේදයේ අඩංගු ව්‍යාපෘතිය කියවීමෙන් ඔබට මේ පිළිබඳ අවබෝධයක් ලබා ගත හැකි වේ.
සැපයුම්දාමයේ දළ සටහනක්
දේශීය ආහාර පරිභෝජනය දිරිමත් කිරීම
දේශීය වශයෙන් නිපදවන ආහාරවල රසය, පෝෂ්‍යදායී බව සහ ගුණාත්මක බව ඉතා ඉහළ අගයක පවතී.
උදාහරණ :- දේශීය වී ප්‍රභේද සඳහා පාරිභෝගික මෙන් ම ගොවියන්ගේ ද වැඩි අවධානයක් යොමු වී තිබේ.
ශ්‍රී ලංකාවේ විවිධ පළාත්වල විවිධ ආහාර වර්ග සුලබ වශයෙන් දක්නට ලැබේ. පහත වගුවේ දක්වා ඇත්තේ ඒ සඳහා උදාහරණ කිහිපයකි.
ආහාර ආශ්‍රිත නිෂ්පාදනයක් ආරම්භ කිරීමේ දී තම ප්‍රදේශයේ බහුලව පවතින අමුද්‍රව්‍ය තෝරා ගැනීමෙන් නිෂ්පාදන පිරිවැය අඩු කර ගෙන වැඩි ලාභයක් ලබා ගත හැකි ය. මීට අමතර ව බොහෝ අස්වනු වාරවල දී එළවළු සහ පලතුරු ඉතා විශාල ලෙස අපතේ යාම ශ්‍රී ලංකාවේ සුලබ සංසිද්ධියකි. උදාහරණ ලෙස අඹ, දෙහි, දිවුල් සහ කොස් වැනි පලතුරු ද බොහෝ උඩරට සහ පහතරට එළවළු වර්ග ද දැක්විය හැකි ය. එම නිසා ව්‍යවසායකයකුට (Enterpreneeur) තම ප්‍රදේශයේ සුලබව දැකිය හැකි අමුද්‍රව්‍යයක් යොදා ගනිමින් ආහාර මූලික කර ගත් ව්‍යාපාරයක් ආරම්භ කළ හැකි ය.
ව්‍යාපෘතියක් ඇසුරින් ආහාර මූලික කරගත් කර්මාන්තයක් ආරම්භ කරමු
දේශීය අමුද්‍රව්‍ය බොහෝ අවස්ථාවල ප්‍රයෝජනයට නොගෙන අපතේ යන අවස්ථා අප කොතෙකුත් දැක ඇත. මෙසේ සුලබ දේශීය අමුද්‍රව්‍ය යොදා ගනිමින් දේශීය මෙන් ම විදේශීය සංචාරකයින් ඉලක්ක කර ගනිමින් ප්‍රමිතියෙන් යුතු ආහාර මූලික කරගත් කර්මාන්තයක් ආරම්භ කළ හැකි ය.
සැලසුම් කිරීම
මෙහි දී පළමු ව ආහාර කර්මාන්තය ආශ්‍රිතව පවතින ගැටලූ හඳුනාගත යුතු වේ. ඉහත හඳුනා ගත් ගැටලූව වන ආහාර සඳහා ගත හැකි දේශීයව සුලබ අමුද්‍රව්‍ය අපතේ යාම සඳහා පවතින විකල්ප විසඳුම් අතරින් සුදුසු විසඳුමක් තෝරා ගැනීමට අවධානය යොමු කළ යුතු ය.
ආහාර මූලික කරගත් ව්‍යාපෘතියක් සැලසුම් කිරීමේ දී පහත දැක්වෙන කරුණු පිළිබඳ විශේෂයෙන් සැලකිලිමත් විය යුතු ය.
- වෙළෙඳපොළ ආහාර අවශ්‍යතා හඳුනා ගැනීම
- ව්‍යාපෘතිය ක්‍රියාත්මක කිරීමේ දී මුහුණ දීමට සිදු වන අභියෝග හඳුනා ගැනීම
- ආහාර හා සබැඳි කර්මාන්ත කෙරෙහි බලපාන සාධක පිළිබඳ සැලකිලිමත් වීම
- නිෂ්පාදන ධාරිතාව, අලෙවි කරන ප්‍රමාණ, යෙදවුම්, මානව හා භෞතික සම්පත් හඳුනා ගැනීම
ක්‍රියාකාරි සැලැස්ම
ව්‍යාපෘතිය ආරම්භ කිරීමට පෙර ක්‍රියාකාරි සැලැස්මක් සකස් කර ගැනීමෙන් ක්‍රියාවලිය නිසි පරිදි කළමනාකරණය කර ගත හැකි ය. ඔබගේ පාසලේ පවතින පරිගණක පහසුකම් යොදා ගනිමින් ක්‍රියාකාරි සැලැස්ම පිළියෙල කර ගැනීමට කටයුතු කළ හැකි ය. පරිගණකය ආශ්‍රිතව ක්‍රියාකාරි සැලැස්මක් සකස් කර ගන්නා ආකාරය මෙම පරිච්ඡේදය අවසානයේ ඉදිරිපත් කර ඇත.
තීරණ ගැනීම සහ ක්‍රියාත්මක කිරීම
ක්‍රියාකාරී සැලැස්ම සකස් කිරීමෙන් පසු ව්‍යාපෘතිය ක්‍රියාත්මක කිරීමට මූලික වන මානව සාධක සහ භෞතික සාධක සපයා ගන්නා ආකාරය, පිරිවැය ගණනය, බෙදා හැරීම සහ අලෙවි කිරීමේ වැඩ පිළිවෙළ පිළිබඳ තීරණගත යුතු ය. ඉන් පසු නිෂ්පාදන ක්‍රියාවලියේ සෞඛ්‍යාරක්ෂිත බව රඳවා තබා ගනිමින් ව්‍යාපෘතිය ක්‍රියාත්මක කළ යුතු ය.
පසු විපරම
ව්‍යාපෘතිය අවසානයේ ඔබ විසින් සිදු කරන ලද නිෂ්පාදනයේ පාරිභෝගික තෘප්තිය පිළිබඳව ශිෂ්‍යයන්ගේ, ගුරු මණ්ඩලයේ සහ වෙනත් අයගේ අදහස් ලබා ගැනීම සඳහා පසු විපරමක් සිදු කළ යුතු ය. මේ සඳහා ප්‍රශ්නාවලියක්, සමීක්ෂණ පත්‍රිකාවක් හෝ වෙනත් සුදුසු ක්‍රමවේදයක් අනුගමනය කළ හැකි ය.
පාරිභෝගික තෘප්තිය පිළිබඳ විමසා බැලිය හැකි සමීක්ෂණ පත්‍රිකාවක ආකෘතියක් (Consumer Satisfaction Survey Form)) පහත දක්වා ඇත.
ඉහත පරිදි සැලසුම් කර අවසන් කළ ව්‍යාපෘතියක් පිළිබඳ තොරතුරු පහත දක්වා ඇත. එය හොඳින් අධ්‍යයනය කරන්න.
පාසල් අධ්‍යාපනය හමාර කළ සුනිල් තමා ජීවත්වන ගම් ප්‍රදේශයේ බහුලව පවතින තල් (Borassus Flabellifer) ගසේ ගෙඩි යොදා ගනිමින් සිදු කළ හැකි කර්මාන්තයක් ලෙස තල්කිරි මුසු කර නව යෝගට් නිෂ්පාදනයක් වෙළෙඳපොළට ඉදිරිපත් කිරීමට කටයුතු කළේ ය. ඔහු විසින් අනුගමනය කරන ලද පියවර පහත දැක් වේ.
පියවර 1
තල් කිරි මිශ්‍ර යෝගට් සඳහා වෙළෙඳපොළ අවස්ථා හඳුනා ගැනීම
- ඉලක්ක කරන ගනුදෙනුකරුවන් හඳුනා ගැනීම සහ ඔවුන්ගේ වුවමනා හා අවශ්‍යතා හඳුනා ගැනීම
පියවර 2
යෙදවුම් සහ සැපයුම්කරුවන් හඳුනා ගැනීම
- තම නිෂ්පාදන සඳහා අවශ්‍ය තල් ගෙඩි සපයා ගන්නා අයුරු තීරණය කිරීම
- නිෂ්පාදනයේ සහ යොදාගන්නා උපකරණවල පිරිවිතර තීරණය කිරීම
- තල්කිරි නිෂ්පාදනය කිරීමේ තාක්ෂණික ක්‍රියාවලිය තීරණය කිරීම
- කිරි, සීනි, ජෙලටින්, මුහුන්, වර්ණක සහ යෝගට් කෝප්ප මිල දී ගත හැකි ස්ථාන සොයා ගැනීම
- යෝගට් සඳහා බීජෞෂණ කුටියක් නිර්මාණය කර ගැනීම
- යෝගට් නිෂ්පාදනය ශීත කිරීමට අවශ්‍ය ශීත ගබඩා පහසුකම් සපයා ගැනීම
- මූල්‍ය අවශ්‍යතා සපුරා ගැනීමට සහ තාක්ෂණික දැනුම වැඩි දියුණු කර ගැනීමට කටයුතු කිරීම.
- මූල්‍ය අවශ්‍යතා සපුරා ගැනීම සඳහා වාණිජ බැංකු මඟින් ලබා දෙන සුළු හා මධ්‍ය පරිමාණ ව්‍යාපාර දිරි ගැන්විමේ විශේෂ මූල්‍ය ආධාර ක්‍රම ගැන සොයා බැලීම
- මූල්‍ය නොවන උපකාර ලබා ගැනීම සඳහා විවිධ ආයතන සම්බන්ධ කර ගැනීම
පියවර 3
පහත කරුණු අන්තර්ගත ව්‍යාපාර සැලැස්ම සකස් කිරීම
- ව්‍යාපාරය පිළිබඳ විස්තර
- වෙළෙඳපොළ සහ වෙළෙඳ පොළ කොටස
- අපේක්ෂිත විකුණුම් ඇස්තමේන්තුව
- අලෙවිකරණය
- බෙදා හැරීම හෝ සැපයීම
- සම්පත් කළමනාකරණ සැලැස්ම
- ගිණුම් කටයුතු
පියවර 4
නිෂ්පාදන ක්‍රියාවලිය සැලසුම් කිරීම
- පූර්ව නිෂ්පාදන ක්‍රියාවලිය මඟින් නියම ආකාරයෙන් තල්කිරි මිශ්‍ර යෝගට් නිෂ්පාදනය අත්හදා බලමින් යෝගට් සහ මිශ්‍ර කළ හැකි උපරිම තල්කිරි ප්‍රමාණය සොයා ගැනීම
- නව නිෂ්පාදන කෙරෙහි පාරිභෝගික රුචිකත්වය දැන ගැනීම සහ අනෙකුත් ගුණාත්මක ලක්ෂණ සොයා ගැනීම
- නිෂ්පාදන ධාරිතාව සහ ඒකක ප්‍රමාණය තීරණය කිරීම
- පරිරක්ෂණ ක්‍රම තීරණය කිරීම
ආහාර නිෂ්පාදනයක් කිරීමට සැලසුම් කරන විට පරිරක්ෂණ ක්‍රම වන, ශීතනය, අධි ශීතනය, විජලනය, සාන්ද්‍ර සීනි / ලූණු යෙදීම, පැසවීම, පැස්චරීකරණය සහ ජීවාණුහරණය ආදිය පිළිබඳ අවධානය යොමු කිරීම අනිවාර්ය වේ. - නිෂ්පාදන ක්‍රියාවලියේ දී හොඳ නිෂ්පාදන පුරුදු (Good Manufacturing Practices- GMP) සහ SLS ප්‍රමිති අනුගමනය කිරීම
පියවර 5
ඇසුරුම්කරණය සහ ලේබල් කිරීම
- සන්නාමය (Brand Name) හා ලාංඡනය (Business Logo) සකස් කිරීම
සන්නාමය :- සුනිල් ඇග්‍රෝ ප්‍රොඩක්ට්ස් (Sunil Agro Products)
ලාංඡනය :- 
- තල්කිරි මිශ්‍ර යෝගට් සඳහා වෙළඳ නාමයක් (Trade Name) තීරණය කිරීම
උදාහරණ:- පිරිසුදු තල්කිරි මිශ්‍ර යෝගට්
(සන්නාමය සහ වෙළෙඳ නාමය පාරිභෝගික පිළිගැනීම සහ විශ්වාසය ගොඩ නැගීමට අත්‍යවශ්‍ය කාරණා ලෙස සැලකිය හැකි ය.)
- සුදුසු ඇසුරුමක් තෝරා ගැනීම
සුදුසු ඇසුරුමක් තෝරා ගැනීම මගින් අත්කර ගත හැකි වාසි
පරිභෝජනය කරන තෙක් නිෂ්පාදනය බාහිර උපද්‍රවවලින් ආරක්ෂා කිරීම
නිෂ්පාදනය සඳහා පාරිභෝගික ආකර්ෂණය සහ විශ්වාසය දිනා ගැනීම
නිෂ්පාදනයේ වටිනාකම වැඩි කිරීම සහ එයට ප්‍රවර්ධනයක් ලබා දීම
නිෂ්පාදනයේ ගුණාත්මක භාවය ආරක්ෂා කිරීම
නිෂ්පාදනයට වෙළෙඳපොළේ දී අනන්‍යතාවක් ලබා දීම
ප්‍රවාහනය පහසු කිරීම
- පහත සඳහන් කරුණු ඇතුළත් කොට ලේබලයක් සකස් කර ගැනීම
අඩංගු ද්‍රව්‍ය
ශුද්ධ බර හෝ ප්‍රමාණය (g/ml)
නිෂ්පාදිත දිනය හා කල් ඉකුත් වීමේ දිනය
නිෂ්පාදනය ගබඩා කළ යුතු හා ප්‍රවාහනය කළ යුතු ආකාරය
ප්‍රමිිතිරැපිරිවිතරවලට අනුකූල බව (SLS/ISO)
නිෂ්පාදකයාගේ තොරතුරු (ලිපිනයල දුරකථන අංකයල ෆැක්ස් අංකයල විද්‍යුත් තැපැල් ලිපිනය)
පියවර 6
ගබඩාකරණය
- අමුද්‍රව්‍ය ගබඩා කර තැබීම
- නිෂ්පාදන වෙළෙඳපොළට ප්‍රවාහනය කරන තුරු සහ පාරිභෝගිකයා අතට පත්වන තුරු ගබඩා කර තැබීම
නිෂ්පාදනය අනුව ශීත හෝ කාමර උෂ්ණත්වයේ ගබඩා පහසුකම් සකස් කළ හැකි ය. ගබඩා පහසුකම් ඉතා හොඳින් නඩත්තු කිරීම හා පලිබෝධ පාලනය ද වැදගත් අංගයක් වේ.
පියවර 7
බෙදා හැරීම
- නව නිෂ්පාදනය වෙළෙඳපොළට ඉදිරිපත් කිරීම
- වෙළෙඳපොළට ඉදිරිපත් කිරීමේ ක්‍රම තීරණය කිරීම
- සෘජුව ම තමා විසින් ම පාරිභෝගිකයාට විකිණීම
- සිල්ලර හා තොග වෙළඳුන් මගින් විකිණීම
- වෙළඳ නියෝජිතයින් මගින් (ව්‍යාපාරය දියුණු වූ පසුව) විකිණීම
පියවර 8
වෙළෙඳ ප්‍රචාරණය හා පාරිභෝගික පසු අලෙවි සේවා පවත්වාගෙන යාම
- වෙළෙඳ ප්‍රචාරණ ක්‍රම යොදා ගැනීම
මේ සඳහා නිෂ්පාදනය පිළිබඳව අත් පත්‍රිකාවක් මුද්‍රණය කර ඛෙදාහැරීම, දැන්වීමක් මුද්‍රණය කර නගරයේ දැන්වීම් පුවරුවල ඇලවීම, ප්‍රසිද්ධ ස්ථානවල බැනර් හෝ පෝස්ටර් ප්‍රදර්ශනය කිරීම කළ හැකි ය.
- පාරිභෝගික පසු අලෙවි සේවා සැපයීම
- තම නිෂ්පාදනය මිල දී ගත් පාරිභෝගිකයා තෘප්තිමත් කිරීම සඳහා විවිධ ක්‍රියාමාර්ග යොදා ගැනීම
- පාරිභෝගික පසු අලෙවි සේවා (after sales services) සිදු කළ හැකි ආකාර තීරණය කිරීම
- හැකි සෑම විට ම තම නිෂ්පාදනය පිළිබඳව පාරිභෝගික ප්‍රතිචාරය ලබා ගැනීම සඳහා කටයුතු කිරීම
- සෑම විට ම පාරිභෝගික පැමිණිලි පිළිබඳ ව සැලකිලිමත් වෙමින් අදාළ ගැටලූ ක්ෂණිකව විසඳීම
උදාහරණ:-
කැඩීබිඳී හෝ හානියට පත් නිෂ්පාදන ක්ෂණිකව මාරු කර දීම සහ අදාළ සිදුවීම පිළිබඳ කනගාටුව ප්‍රකාශ කිරීම
නිෂ්පාදනයක් මාරු කිරීමට පැමිණි පාරිභෝගිකයෙකුට එය පහසුවෙන් කර දීම
අදාළ භාණ්ඩයට ආදේශකයක් පිළිබඳව පාරිභෝගිකයා දැනුවත් කිරීම
පසු අලෙවි සේවා සැපයීමේ වාසි
- පාරිභෝගිකයා නිෂ්පාදනය කෙරෙහි රඳවා තබා ගනියි.
- පාරිභෝගිකයා විසින් නිෂ්පාදනය පිළිබඳ විශ්වාස කිරීමත් ඒ පිළිබඳව අන් අයට පැවසීමත් සිදු කරන අතර ඒ මගින් වැඩිපුර පාරිභෝගිකයින් සංඛ්‍යාවක් අදාළ නිෂ්පාදනය මිල දී ගැනීමට පොළඹවනු ලබයි.
- පාරිභෝගිකයා හා අදාළ ආයතන අතර බැඳීම වැඩි දියුණු කරයි.
ඔබ ප්‍රදේශයේ සුලබව ඇති ආහාරයට ගත හැකි ද්‍රව්‍යයක් යොදා ගෙන වෙළෙඳපොළට නව නිෂ්පාදනයක් හඳුන්වා දීම සඳහා ව්‍යාපෘතියක් සැලසුම් කර ක්‍රියාත්මක කරන්න. ඒ පිළිබඳව පන්ති භාර ගුරුතුමා හෝ ගුරුතුමිය සමග සාකච්ඡා කරන්න. පන්තිය කණ්ඩායම්වලට ඛෙදී එක් ව්‍යාපෘතියක් හෝ ව්‍යාපෘති කිහිපයක් වුව ද සිදු කළ හැකි ය.
පරිගණක මෘදුකාංග භාවිත කරමින් ක්‍රියාකාරි සැලැස්මක් සකස් කරමු
ජීවිතය පුරා මතකයෙන් ඈත් නොවන අත්දැකීම් බවට පත් වන්නේ කැමැත්තෙන් හා ක්‍රියාශීලී ලෙස යම් කාර්යක් සාර්ථකව නිම කළ විටක දී ය. සාර්ථකව කාර්යයක් නිම කිරීමට නම් ඒ සඳහා ගත කරන කාලය කළමනාකරණය කිරීම සඳහා ක්‍රියාකාරී සැලැස්ම සකස් කිරීම ඉතා වැදගත් වේ.
ව්‍යාපෘතියක් සැලසුම් කර ක්‍රියාත්මක කිරීමේ දී එම ව්‍යාපෘති කාර්යය තුළ විවිධ වූ පියවර මැනවින් ක්‍රමවත්ව හා ආකර්ෂණීයව සිදු කිරීමට පරිගණක මෘදුකාංග භාවිත කළ හැකි ය. ව්‍යාපෘති සකස් කිරීමේ ක්‍රියාවලියේ දී පහත අවස්ථා වෙත අවධානය යොමු කරන්න.
ව්‍යාපෘති සකස් කිරීම සඳහා පවතින පරිගණක මෘදුකාංග අතරින් Microsoft Project සහ Gantt Project යන මෘදුකාංග ඔබට පාසල් පරිගණක විද්‍යාගාරයේ දී පහසුවෙන් භාවිත කළ හැකි ය.
Gantt Project පරිගණක මෘදුකාංගය භාවිත කරමින් ක්‍රියාකාරි සැලැස්මක් සකස් කරන ආකාරය මෙහි විස්තර කර ඇත.
පරිගණක විද්‍යාගාරය භාර ගුරුතුමාගේ සහාය හා උපදෙස් ලබාගෙන Gantt Project හෝ වෙනත් ව්‍යාපෘති සැලසුම් කිරීමට සුදුසු මෘදුකාංගයක් අන්තර්ජාලය භාවිත කරමින් බාගත (Download) කර ගන්න. Gantt Project මෘදුකාංගය ලබා ගැනීම සඳහා පහත දැක්වෙන අන්තර්ජාල ලිපිනය භාවිත කරන්න.
https:/www.ganttproject.biz/download
Gantt Project මෘදුකාංගය බාගත කිරීමෙන් අනතුරුව මෙම මෘදුකාංගය පරිගණකයට ස්ථාපනය කිරීමට JAVA මෘදුකාංගයේ සහාය අවශ්‍ය වේ. මෙහි දී පරිණක තිරය මත පෙන්නුම් කරන සංවාද කොටුව භාවිත කර JAVA මෘදුකාංගය බාගත කරන්න.
පරිගණකයේ ස්ථාපනය කරන ලද Gantt Project මෘදුකාංගය විවෘත කිරීම සඳහා පහත දැක්වෙන උපදෙස් පිළිපදින්න
ව්‍යාපෘතිය සඳහා භාවිත වන Gantt Project මෘදුකාංගයේ අතුරු මුහුණත පහත දැක්වේ.
වැඩතලය අවශ්‍ය පරිදි සකස් කර ගැනීම සඳහා පහත උපදෙස් අනුව කටයුතු කරන්න.
Edit - Setting - Application - Enter
මෙම සංවාද කොටුව භාවිතයෙන් භාෂාව, අකුරු විශේෂ හා අකුරුවල ප්‍රමාණය ආදිය සැකසීමට හැකි වේ.
දත්ත සකස් කිරීමේ අතුරු මුහුණත ලබා ගැනීම සඳහා පහත පියවර අනුගමනය කරන්න.
Tasks - New Tasks - Enter
Tasks - Tasks Properties - Enter
Tasks Properties අතුරු මුහුණත පහත දැක්වේ.
එවිට ඉහත දැක්වෙන සංවාද කොටුව ලැබෙන අතර එය භාවිත කරමින් කාර්යය පියවරට යෙදෙන නම, ආරම්භක දිනය, අවසාන දිනය, පියවරක ගත කරන කාලය ආදිය ඇතුළත් කළ යුතු ය. එම ආකාරයට ඉදිරි පියවර සඳහා ද දත්ත ඇතුළත් කළ හැකි ය.
පියවරෙන් පියවර දත්ත ඇතුළත් කිරීමේ දී Gantt Project හි දත්ත සැකසෙන ආකාරය පහත දැක්වේ.
ඔබ විසින් ව්‍යාපෘතියට අදාළ ව සපයන ලද දත්ත අනුව පරිගණක මෘදුකාංගය විසින් කාල රාමුව නිර්මාණය කරනු ඇත.
ඔබ විසින් නිර්මාණය කරන ලද කාල රාමුව මුද්‍රණය කිරීම සඳහා පහත පියවර අනුගමනය කරන්න. එමගින් ආකර්ෂණීය කාල රාමුවක් ඔබට ලබාගත හැකි ය.
Project - Print - Ok
ඔබ විසින් සිදු කරන ව්‍යාපෘති ලේඛනවල ආකර්ෂණීය හා ගුණාත්මක බව වර්ධනය කිරීම සඳහා ව්‍යාපෘති සැලසුම් කිරීමේ මෘදුකාංගය මෙන් ම අනෙකුත් මෘදුකාංග ද ප්‍රයෝජනවත් වනු ඇත.