8.1 - සතුන්ගේ චලනය හා සන්ධාරණය
උත්තේජයකට දක්වන ප්‍රතිචාරයක් ලෙස ජීවීහු සම්පූර්ණ දේහය ම හෝ දේහයෙන් කොටසක හෝ පිහිටීම වෙනස් කර ගනිති. මෙම ක්‍රියාවලිය චලනය ලෙස හැඳින්විය හැකි ය. බොහෝ ජීවීන්ගේ සිදු වන චලන ආකාර බොහෝ විට අපට හොඳින් නිරීක්ෂණය කළ හැකි ය. සතුන් මෙන් ම ශාක ද චලන දක්වයි.
සතුන්ගේ චලන පිළිබඳව විමසා බැලීමට ක්‍රියාකාරකම 8.1 හි නිරත වෙමු.
ඇමීබා චලනය සඳහා ව්‍යාජ පාද යොදා ගන්නා අතර එවුග්ලීනා චලනයට කශිකා යොදා ගනියි. පැරමීසියම් සංචරණය සඳහා යොදා ගනු ලබන්නේ පක්ෂ්ම නම් වූ සියුම් කෙඳි විශේෂයකි. ගෙම්බා, චීටා, මිනිසා පාද මගින් චලන සිදු කරති. ඩොල්ෆින් අවල්පත් මගින් චලනය සිදු කරයි. කපුටා වැනි පක්ෂීන් චලනය සඳහා පියාපත් උපයෝගී කර ගනියි. ගැඩවිලා, කූඩැල්ලා, ගොළුබෙල්ලා සහ නයා වැනි සතුන්ගේ චලනය සඳහා වූ නිරීක්ෂණය කළ හැකි විශේෂ අවයව නොමැත. සතුන් දේහ අවයව චලනය කරන අතර බොහොමයක් සත්තු එම අවයව චලනය කිරීම සඳහා පේශි උපයෝගී කර ගනිති.