8.2 - අස්ථී, පේශි හා සන්ධි
අපෘෂ්ඨවංශී සත්තු දේහ චලන සඳහා පේශි යොදාගන්නා අතර පෘෂ්ඨවංශීහු දේහ චලන සඳහා පේශිවලට අමතරව අස්ථී ද උපයෝගී කර ගනිති. පේශි සහ අස්ථී චලනයට අමතරව සිරුරේ හැඩය පවත්වා ගැනීමට ද උපකාරී වේ. එසේ ම අස්ථී මගින් සිරුරට දෘඪතාවක් ලබා දේ. එනම් සිරුරේ සන්ධාරණය පවත්වා ගනියි.
පේශි මගින් චලන සිදු කරන ආකාරය අවබෝධ කර ගැනීමට පේශියක ලක්ෂණ පිළිබඳව සොයා බැලිය යුතු ය. පේශියක ලක්ෂණ කිහිපයක් පහත දැක්වේ.
- පේශියක සෛල, තන්තු ආකාරයට පිහිටා තිබීම.
- පේශි තන්තුවකට සංකෝචනය වීමට නැතහොත් හැකිලීමට ඇති හැකියාව.
- පේශි තන්තුව ඉහිල්වීමට ඇති හැකියාව නැතහොත් දිගහැරීමට ඇති හැකියාව.
- සංකෝචනයට හෝ ඉහිල්වීමට ලක්වීමෙන් පසු නැවත ආරම්භක අවස්ථාවට පැමිණීමට ඇති හැකියාව.
පේශි මගින් අස්ථීයක චලනය සිදුවන ආකාරය හඳුනා ගැනීමට ක්‍රියාකාරකම 8.2 හි නිරත වෙමු.
ක්‍රියාකාරකම 8.2 හි නිරීක්ෂණ පදනම් කරගෙන මිනිසාගේ වැලමිට සන්ධිය ක්‍රියා කරන ආකාරය සොයා බලමු.
A ඉලාස්ටික් පටිය මගින් වැලමිට සන්ධියෙහි ද්විශීර්ෂ පේශිය නිරූපණය කරයි. ද්විශීර්ෂ පේශිය සංකෝචනය වන විට අත නැවෙමින් ඉහළට එසවේ.
B ඉලාස්ටික් පටිය මගින් ත්‍රීශීර්ෂ පේශිය නිරූපණය කරයි. ත්‍රීශීර්ෂ පේශිය සංකෝචනය වන විට අත දිග හැරීම සිදු වේ. එවිට ද්විශීර්ෂ පේශිය මුල් පිහිටුමට පැමිණේ.