දේශනයකට සාවධානව සවන් දීම දේශකයාට ගෞරව කිරීමකි. මනාව සවන් දීම දේශනයක ඇතුළත් කරුණු අවබෝධ කර ගැනීමේ මග යි. අවධානය රඳවා ගෙන ශ්‍රවණය කිරීම මගින් ස්මරණ ශක්තිය දියුණු වෙයි. සවන් නො දී ඒ පිළිබඳ කතා කිරීම හෝ අදහස් ප්‍රකාශ කිරීම හෝ කළ නොහැකි ය. භාෂා ශක්‍යතාවන් වර්ධනය කර ගැනීමට නම් මුලින් ම කළ යුත්තේ හොඳින් සවන් දීම යි. ඉන් පසු කථනය සඳහා මග පෑදෙයි. ආචාර්ය එස්. පණීභාරත නම් වූ ශ්‍රේෂ්ඨ කලාකරුවා ගැන මෙම පාඩමෙහි ඇතුළත් තොරතුරු අසන්නට සැලැස්වීම හා එතුමා ගැන තොරතුරු ඉදිරිපත් කිරීමට ඔබ පෙලඹවීම මේ පාඩමේ අරමුණ යි.

දිනය : 2017 පෙබරවාරි 24
ස්ථානය : කෑගල්ල, අල්ගම ‘නෘත්‍ය’ කලායතනය
අවස්ථාව : ජාතික නර්තන දිනය වෙනුවෙන් පැවැත්වෙන සම්මාන ප්‍රදානෝත්සවය
දේශනය : සම්මානනීය නර්තන ශිල්පී, කලාසූරී ජගත් විමලසුරේන්ද්‍ර මහතා

ගෞරවාර්හ ස්වාමීන් වහන්ස, ගරු පූජකවරුනි, සම්භාවනීය අමුත්තනි, ‘නෘත්‍ය’ කලායතනයේ අධිපතිතුමා ඇතුළු ආචාර්ය මණ්ඩලයේ මහත්ම මහත්මියනි, දෙමවුපියනි, දූ දරුවනි, ඔබ සියලූ දෙනාගෙන් ම අවසර යි.

අද අපට විශේෂ දවසක්. ඒ මෙම කලායතනයේ දක්ෂ දරුවන්ට සම්මාන ලැබීමත්, මේ ප්‍රදේශයෙන් ලෝකයට දායාද කළ පුත්‍ර රත්නයක ජන්ම දිනය අදට යෙදී තිබීමත් යන කරුණු දෙක ම නිස යි. එතුමාගේ සෙවණෙහි ගුරුහරුකම් ලැබීමට වාසනාව මටත් උදා වුණු නිසා මමත් නර්තන කලාවට යම් සේවයක් කිරීමට ශක්තිය ලැබුවා. එතුමාගේ ගුණ ගයන්නට, එතුමා ගැන ඔබට කියන්නට අවස්ථාව උදා කර දීම පිළිබඳව මෙහි උත්සව කමිටුවට මාගේ ප්‍රණාමය පිරිනමන්න කැමති යි.

ඒ ශ්‍රේෂ්ඨ මිනිසා කවුරු ද? ඒ වෙනත් කිසිවෙක් නොවෙයි; ආචාර්ය එස්. පණීභාරත මැතිතුමා යි. මේ එතුමාගේ පය ගැටුණු ප්‍රදේශය යි; එතුමා උපන් ගම යි. අදට යෙදී තිබෙන එතුමාගේ ජන්ම දිනය ජාතික නර්තන දිනය ලෙස නම් කිරීමෙන් ම ඒ ශ්‍රේෂ්ඨත්වය වටහා ගන්න ඔබට හැකි වේවි.

තම අත්තා වන අල්ගම සිරියා සහ බාප්පා වන කිරිගණිතයා යන ගුරුන්නාන්සේලාගෙන් මුලින් ම නැටුම් ඉගෙන ගත් පණීභාරත, පුංචිකිරා කෝන්පලේ ගුරුතුමා, මුද්දනාවේ ගුරුතුමා යන අයගෙන් බෙර වාදනයත්, තිබ්බටුවාවේ පනික්කි ගුරුන්ගෙන් දවුල් වාදනයත්, මංගලතිරියේ සියදෝරිස් ගුරුන්ගෙන් තම්මැට්ටම් වාදනයත් ඉගෙන ගත්තා. ඔහු එයින් නැවතුණේ නැහැ. රත්නාගල සිමා ගුරුන්ගෙන් බලියාග ද වෙල්ගම පහතරට ගින්තේරිස් ගුරුන්ගෙන් පහතරට නැටුම් හා බෙර වාදනය ද පුංචි මහත්මයා ගුරුන්ගෙන් සබරගමු නැටුම් ද ඉගෙන ගත්තා. පණීභාරත දක්ෂ ගායන, වාදන, නර්තන ශිල්පියෙකු වුණේ ඒ ගුරුවරුන්ගේ සෙවණෙහි ශිල්ප හැදෑරීමෙන්.

දැන් ඔබට හැඟෙනවා ද එතුමාගේ ශිෂ්‍ය ජීවිතයෙන් ඔබට කොතරම් පාඩම් උගත හැකි ද යන වග? එක් අංශයක අධ්‍යාපනය ලබන්නටත් මැළිකම් දක්වන දරුවන්ට තම ජීවිත ජයග්‍රහණ ළඟා කරගන්නට ධෛර්යය සපයන ඔහු ඔබට හොඳ ආදර්ශවත් චරිතයක්. ඔහු අධ්‍යාපනය ලැබුවේ ඉතා දුෂ්කර මාවතක යි. වරෙක ඔහු තම ශිෂ්‍යයන් දිරිමත් කළේ, "පුතේ, මම බෙරේ කරේ දාගෙන හැතැප්ම ගණන් පයින් ගිය කෙනෙක්" කියමින්.

නර්තන ශිල්පියකු තුළ තිබිය යුතු දැනුම හා දක්ෂතාව මඳක් වත් අඩු නැතිව එතුමා තුළ තිබුණා. ඔහු ඉතා නිර්මාණශීලි මිනිසෙක්. මේ නිර්මාණශීලිත්වයට ජේ.ඩී.ඒ. පෙරේරා මහතාගෙන් ඉගෙන ගත් චිත්‍ර කලාවත් කොටහේනේ සාර්දිස් ගුරුතුමාගෙන් ඉගෙන ගත් සංගීත කලාවත් ඔහු තුළ වූ ඉංග්‍රීසි, සිංහල හා සංස්කෘත භාෂාත්‍රය පිළිබඳ දැනුමත් උපකාරි වුණා.

ගුවන් විදුලි සංස්ථාව විවෘත කිරීමේ අවස්ථාවට මඟුල් ඛෙරය වැයුවේ ඔහු යි. කිරිගණිත ගුරුන්නාන්සේගේ මග පෙන්වීමට අනුව එවකට කොළඹ ලලිතකලායතනයේ අධිපති කලාගුරු ජේ.ඩී.ඒ. පෙරේරා මහතාගේ බිරිඳ වන චන්ද්‍රලේඛා පෙරේරා මහත්මියගේ නර්තනයකට බෙර වාදනය කරන්නෙකු ලෙස භාරතයට යාමට මෙතුමාට අවස්ථාව ලැබුණා. මේ තමයි එතුමාගේ ජීවිතයේ භාග්‍යවන්ත ම අවස්ථාව. එහි දී හමු වූ ගෝපිනාත් මහතා ප්‍රදානය කළ ශිෂ්‍යත්වයක් නිසායි එතුමාට භාරතයට ගොස් නර්තනය තව දුරටත් හැදැරීමේ භාග්‍යය ලැබුණේ.

මේ දැනුම් සම්භාරය භාවිත කරමින් එතුමා නර්තන කලාවේ ගුණාත්මකභාවය වර්ධනය කිරීමට කළ සේවය වචනයෙන් කියන්න බැරි තරම් උදාර යි. ඒ බව ජ්‍යේෂ්ඨ මහාචාර්ය මුදියන්සේ දිසානායක මහතා, ශ්‍රී ලාංකේය නව නර්තන කලාවේ පුරෝගාමියෝ නම් කෘතියෙහි සඳහන් කරන්නේ මෙහෙම යි:

"ශ්‍රී ලංකික නව නර්තන කලාව වඩ වඩාත් දේශීය නර්තන, ගායන, වාදන අංශ තුළින් ප්‍රතිපෝෂණය කිරීමට කැප වූ මහා පුරුෂයා ලෙස හැඳින්විය හැකි ආචාර්ය එස්. පණීභාරතයන් නොසිටින්නට වර්තමාන ශ්‍රී ලංකාවේ සිංහල නර්තන කලාව මතු නොව විශ්වවිද්‍යාල අධ්‍යාපනය තෙක් පැමිණි දේශීය නර්තන කලාවේ ආගමනය මීට වඩා වෙනස් මුහුණුවරක් ගනු ඇත."

මේ ප්‍රකාශයෙන් ම පණීභාරතයන් නර්තන කලාවට කළ මෙහෙය වැටහෙනවා ඇති. 1948 භාරතයේ සිට ශ්‍රී ලංකාවට පැමි‚ පණීභාරතයන් කොළඹ රාජකීය විද්‍යාලයේ ගුරුවරයකු ලෙස සේවය කරමින් සිසුන්ගේ දක්ෂතා කරළියට ගන්නට වෙහෙසුණා. මීරිගම ජ්‍යේෂ්ඨ පාඨශාලාවේ නැටුම් ගුරුවරයා ලෙස එතුමා කළ සේවය තවත් පුළුල් වන්නට, මීරිගම ගුරු අභ්‍යාස විද්‍යාලයේ කථීකාචාර්ය තනතුර හේතු වුණා. නර්තනය උදෙසා එතුමා කළ සේවයේ සන්ධිස්ථානය වූයේ රජයේ ලලිතකලායතනයේ විදුහල්පති ධුරය හිමි වීම යි. මෙම කලායතනය 1959 දී උඩරට නාට්‍ය කලා විද්‍යාලය ලෙස නම් කෙරුණේ එතුමාගේ දැඩි කැප වීම මත යි. 1962 දී එකී විද්‍යාලයට පහතරට නැටුම් සම්ප්‍රදාය හඳුන්වා දී, ඒ සඳහා පාඨමාලා සකස් කර, කථීකාචාර්යවරුන් පත් කර ගෙන නාට්‍ය විද්‍යාලයට ගුණාත්මක වූ නව පෙරළියක් නිර්මාණය කළා. එතැනින් එතුමාගේ කාර්යභාරය නැවතුණේ නැහැ. 1974 මැයි 01 දින මේ විද්‍යායතනය ශ්‍රී ලංකා විශ්වවිද්‍යාලයට අනුබද්ධ කළා. එහි නර්තන අධ්‍යයනාංශයේ ප්‍රථම අංශාධිපති වූයේත් එතුමා යි. ඒ නිසා ම ඔහුට නර්තනයේ දියුණුවට විවිධ වැඩපිළිවෙළ යෙදීමට ශක්තිය ලැබුණා.

නර්තනය හදාරන්නන් තුළ සබරගමු නර්තන සම්ප්‍රදාය පිළිබඳව ද පූර්ණ දැනුමක් තිබිය යුතු බවට එතුමා තුළ තිබුණු විශ්වාසය නිසා 1978 දී සබරගමු නර්තන සම්ප්‍රදාය ද සෞන්දර්ය අධ්‍යයන ආයතනයේ පාඨමාලාවට එකතු කළා. සබරගමු නර්තනය ඉගැන්වීම සඳහා සිරිබෝහාමි නම් බාහිර ආචාර්යවරයකු යොදා ගෙන විශිෂ්ට තීරණයක් ක්‍රියාත්මක කරමින් නර්තනයේ දේශීය සම්ප්‍රදායන් තුන ම එහි සිසුන්ට ඉගෙන ගන්න අවස්ථාව සලසා දුන්නා. නර්තනයේ අස්සක් මුල්ලක් නෑර හදාරන්න සිසුන්ට අවස්ථාව සලසා දීම රටට ජාතියට කළ මහඟු සේවයක්. ‘හේවුඩ්’ නමින් හැඳින්වුණු නර්තන විද්‍යා ආයතනය 2005 දී සෞන්දර්ය කලා විශ්වවිද්‍යාලය බවට පත් වූයේ එතුමාගේ පුරෝගාමිත්වය නිස යි. මේ වන විට සකල කලාංගයන් හදාරන විද්‍යාර්ථීන්ගේ තෝතැන්න වී ඇත්තේ මේ විශ්වවිද්‍යාලය යි.

එතුමාගේ මුවින් ම පවසන පරිදි ඉන්දියාවේ දී තමා උගත් භරත, කතකලි, මණිපුරි වැනි නර්තන සම්ප්‍රදායන්ගේ ආභාසය දේශීය නර්තනයේ ලාස්‍ය ගුණය වැඩි කරන්නට එතුමා යොදා ගත්තා. ඒ නිසා නර්තන කලාවේ ප්‍රාසංගික බව වර්ධනය වුණා. උඩරට, පහතරට හා සබරගමු නර්තන සම්ප්‍රදායන්ගේ ගුණ සුවඳ හඳුනා ගත් එතුමා තම දැනුම හා නිර්මාණශීලී ප්‍රතිභාව මෙහෙයවා දේශීය නර්තන කලාව ලෝකයට ගෙන ගියා. බටහිර ජර්මනිය, රුසියාව, එංගලන්තය, පාකිස්තානය, කැනඩාව, ජපානය, ඉන්දියාව, චෙකොස්ලෝවැකියාව ආදි විවිධ රටවලට දේශීය නර්තනයේ හැඩ වැඩ පෙන්වා පිටරැටියන් මවිතයට පත් කරමින් ලංකා මාතාවට කීර්තියක් ගෙන දුන් එතුමා මහා යුග පුරුෂයෙක්.

එතුමා සතු වාදන හැකියාව ප්‍රයෝජනයට ගනිමින් වරින් වර හඳුන්වා දුන් බෙර වාදන, නර්තනයට අත්‍යවශ්‍ය වූ වාදනයේ දියුණුවටත් එතුමාගේ ගායන හැකියාව, නර්තනයේ ප්‍රධාන අංගයක් වූ ගායනයේ දියුණුවටත් මහෝපකාරි වුණා. රටේ විවිධ ප්‍රදේශවල කලායතන බිහි කරන්නටත් ඒවාට අවශ්‍ය උපදෙස් හා සොයා බැලීම් කරන්නටත් එතුමා පුරුදුව සිටියා. පෞද්ගලික ගමනක් බිමනක් යද්දී පවා තොවිලයක්, ගම්මඩුවක්, කොහොඹා කංකාරියක් දුටු විට මඳක් නැවතී ඒවායේ රස විඳින්නට එතුමා පසුබට වුණේ නැහැ. ‘නර්තනයේ පියා’ ලෙස හඳුන්වන එතුමා නර්තන කලාවට කළ මෙහෙය මෙතෙකැයි විස්තර කිරීම අපහසු යි. දේශීය නර්තනයේ රන් සලකුණ එතුමා යි.

(දැන් අපි එතුමාගේ නිර්මාණ කීපයක් රස විඳිමු. ඒ නිර්මාණවල කොටස් කීපයක එකතුවක් දැන් ඔබට නැරඹිය හැකි යි.)

1954 දී බ්‍රිතාන්‍ය මහ රැජින ඉදිරියේ රඟ දැක්වූ ගොයම් කැපීමේ නැටුම අද සාම්ප්‍රදායික නැටුමක් බවට පත් වෙලා. නාරිලතා නැටුම, මොනර නැටුම, දඩයක්කරුගේ රංගනය ආදියත් එතුමා ඉදිරිපත් කළ බෙර සංධ්වනිත් විශේෂිත යි. කාළගෝළ, මහදැනමුත්තා, කෝච්චිය, පන් නෙළීම, පොරපොල් පිටිය, ග්‍රහ අපලය, ග්‍රහ බලය, සුරන් විස්කම් ආදිය දේශීය මුහුණුවරක් ගත් නිර්මාණ යි. පොල්ගසේ වරුණ, ගම්මානේ මල් පිපිලා, සීගිරි අස්න වැනි නිර්මාණ මුද්‍රා නාට්‍ය ශෛලියෙන් නිමැවුණු නාට්‍ය යි. හස්ති කාන්ත මන්තරේ, වෙස්සන්තර, සිරිසඟබෝ, හරිශ්චන්ද්‍ර යන නාට්‍යවල රංග වින්‍යාසය නිර්මාණාත්මක ලෙස සකසා දෙමින් වේදිකා නාට්‍යයටත්, සිකුරු තරුව, කුරුලූ බැද්ද, අශෝකා වැනි විත්‍රපටවල නර්තන නිර්මාණය කරමින් චිත්‍රපටයටත් සහභාගි වුණා. මේ සෑම ක්ෂේත්‍රයක ම තම හැකියාව ප්‍රදර්ශනය කළා.

දෙස් විදෙස් කීර්තියට පත් වූ එතුමා වෙනුවෙන් පිදුණු සම්මාන බොහෝ යි. ජීවත්ව සිටිද්දී ද එතුමා වෙනුවෙන් අනුස්මරණ උලෙළක් පැවැත්වූවා. එතුමා එයින් බොහෝ සතුටට පත් වුණා. ජීවිතයේ ලැබූ ඉහළ ම සම්මානය ලෙස එතුමා එය අගය කළා. 1991 දී කැලණිය විශ්වවිද්‍යාලයේ සෞන්දර්ය අධ්‍යයන ආයතනය මගින් පිරිනමන ලද ආචාර්ය උපාධියත් 1999 සබරගමු විශ්වවිද්‍යාලය මගින් පිරිනමන ලද සාහිත්‍යසූරී උපාධියත් 2002 දී ශ්‍රී ලංකා කලා මණ්ඩලය මගින් පිරිනමන ලද විශේෂ සම්මානයත්, 2003 දී පිරිනමන ලද විශේෂ සම්මානයත් එතුමාගේ උදාරතම සේවය අගය කිරීම සඳහා පුදනු ලැබූ උපාධි සම්මාන යි. ඒත් එතුමාගේ නාමයට කළ විශිෂ්ට ම උපහාරය වන්නේ එවකට ජාතික නර්තන හා මුද්‍රා නාට්‍ය අනුමණ්ඩලය විසින් 2006 දී එතුමාගේ ජන්ම දිනය වන පෙබරවාරි 24 ජාතික නර්තන දිනය ලෙස නම් කිරීම යි.

ලෝකය ම ජය ගනිමින්, එතුමාගේ නම දස දෙස පතුරවමින්, එතුමාගේ සෙවණෙහි හැදුණු වැඩුණු සිසු දරු දැරියන්ගේ ශීර්ෂ ප්‍රණාමය එතුමා ලද උතුම් ම සම්මානය යි. මේ ශ්‍රේෂ්ඨ ගුරුවරයාගේ මානව දයාව තම ගෝලබාලයින් දිරිමත් කරන්නට සමත් වුණා. ඔවුන්ට ලෝකයට පිවිසෙන්නට පාර පෙන්නුවා. මේ සද්භාවය එතුමාට ලැබුණේ එතුමාගේ ගුරුවරුන්ගෙන් හා සමීපතමයන්ගෙන්. මහාත්මා ගාන්ධි, රබීන්ද්‍රනාත් තාගෝර්, ජවහර්ලාල් නේරු, කේරළ මහා කවි නාරායන්, රාෙජ්න්ද්‍ර ප්‍රසාද්, සරෝජිනී නායිදු වැනි ශ්‍රේෂ්ඨයින්ගේ හා හරිදාස් නාරායන්, රාම් ගෝපාල් සහ උදය ශංකර් වැනි ප්‍රවීණයන්ගේ ඇසුර එතුමාට ලැබුණා. ඩබ්. බී. මකුලොලූව, එඩ්වින් සමරදිවාකර, චිත්‍රසේන ඩයස්, ශේෂා පළිහක්කාර වැනි විද්වතුන්ගේ ඇසුර එතුමාට ලැබුණා. මේ ඇසුර හා ගුරුහරුකම් ඔහුගේ ජීවිතයේ ආලෝකය යි. කෙනෙකුගේ සාර්ථකත්වයට ඔහු හා ඇසුරේ පසුවන උතුම් මිනිසුන් ද බලපාන බව මෙයින් ඔබට පැහැදිලි වනු ඇති.

මේ ශ්‍රේෂ්ඨ මිනිසා අප අතරින් වෙන් වී ගියේ 2006 පෙබරවාරි 20 දා යි. එය රටේ ම අවාසනාවක්. 1920 පෙබරවාරි 24 වැනි දින මෙලොව එළිය දුටු එතුමා මුළු ජීවිතය ම කැප කළේ නර්තනය වෙනුවෙන්. නර්තනය ලොව පවතින තුරු පවතින කලාවක්. ඒ ලෙසින් ම ලොව පවතින තුරු නර්තනය හා බැඳෙන නාමයකි ආචාර්ය එස්. පණීභාරත යන්න. නර්තන දායාදය පරපුරෙන් පරපුරට ගෙන යන්නට තමා වැනි ම දක්ෂ වූ ගෝලයන් ලක්ෂ ගණනක් එතුමා අතින් නිර්මාණය වුණා. නර්තනයෙන් ලොවක් සනසන්නට, ලොවක් නළවන්නට ඒ සිසුන් සමත් වෙලා තියෙනවා. නැවත මේ මාතෘ භූමියෙහි ම ඉපිද මේ නර්තන කලාව තව තවත් ඉදිරියට ගෙන යන්නට උර දෙන්නට එතුමාට හැකි වේවා! යි අපි සියලූ දෙනා ම ප්‍රාර්ථනා කරමු.

ඒ වගේ ම මේ ගුණානුස්මරණ දේශනය මා අවසන් කරන්නේ එතුමාගේ ජීවිතයෙන් ඔබට ලබා ගත හැකි ආදර්ශ ගෙන ඔබේ ජීවිතය රටට දැයට වැඩදායී ලෙස ගත කරන්න අදිටන් කර ගන්නා ලෙස ඉල්ලා සිටිමින්. දැන් ඔබට එතුමාගේ රුව, හඬ හා දස්කම් දැක්වෙන වීඩියෝ පටයක් නැරඹීමට මා අවස්ථාව සලසනවා. එයින් එතුමා කවුරුන්දැ'යි ඔබට පසක් වේවි... සියලූ දෙනාට ම සුබ දවසක් වේවා!

යුගල පද

ප්‍රාථමික ශ්‍රේණිවල දී හා හය, හත, අට ශ්‍රේණිවල දී ඔබ උගත් යුගල පද මතකයට නගා ගන්න. සිංහල භාෂාවේ සාම්ප්‍රදායික යෙදුම් ලෙස ගැනෙන මේ පද විශේෂය භාෂාව රසවත්ව භාවිත කිරීමට අවශ්‍ය වන්නකි.

ලේඛනයේ දීටත් වඩා වැඩි වශයෙන් යුගල පද භාවිත වන්නේ භාෂණයේ දී යි. එදිනෙදා ව්‍යවහාරයේ දී එය වඩාත් හොඳින් අවධාරණය වෙයි. ගැමි කටවහර වඩාත් පෝෂණය වන්නට යුගල පද හේතු වෙයි. පද යුගලය ම මිස එක් පදයක් යෙදීමෙන් අර්ථය මනාව ගම්‍ය නො වේ. එබැවින් මේ පද විශේෂය යුගල පද ලෙසින් ම හැඳින්වේ.

සිංහලයේ යුගල පද සැකසී තිබෙන ආකාර කීපයකි.

1. එකිනෙකට විරුද්ධාර්ථවත් පද එකතු වීමෙන් සෑදෙන යුගල පද

උදාහරණ:- එහෙ මෙහෙ               යාම් ඊම්
              ඉහළ පහළ                උඩක් බිමක්
              දුකට සැපට

2. එකිනෙකට සමාන අර්ථ ඇති පද එකතු වීමෙන් සෑදෙන යුගල පද

උදාහරණ:- මිල මුදල්                 සමිති සමාගම්
              නඩු හබ                   අරුම පුදුම
              දුක් දොම්නස්

3. පද දෙකෙහි ම අර්ථයක් නොමැති වුවත් යෙදෙන අවස්ථාව අනුව මැනවින් අර්ථය මතු වන යුගල පද

උදාහරණ:- ලට්ට ලොට්ට               ලවක් දෙවක්
              ලට පට                      වං හුං
              අබල් බබල

4. එක් පදයක ශබ්දය අනුකරණය කරමින් අනෙක් පදය සැකසුණු යුගල පද

උදාහරණ:- අඟර දඟර              අබල දුබල
              ඇදලා පැදලා           උසුළු විසුළු
              අහල පහල

5. පළමු පදය අර්ථවත් වූත් දෙවැනි පදය අර්ථ විරහිත වූත් පද එකතු වීමෙන් සැකසුණු යුගල පද

උදාහරණ:- රොඩු බොඩු              ඔප්පු තිරප්පු
              ළමයි බමයි               ගසා බසා
              මුදල් හදල්

6. එකිනෙකට සමීප අර්ථ යෙදුණු යුගල පද

උදාහරණ:- ගේ දොර
              යන්ත්‍ර මන්ත්‍ර
              කයි කතන්දර
              ලෙඩ දුක්

7. පූර්ව ක්‍රියා පද දෙකක් එකතු වීමෙන් සැකසුණු යුගල පද

උදාහරණ:- කවා පොවා
              කා බී
              කර කියා
              දුවලා පැනලා
              හිතලා බලලා

8. ක්‍රියා රූප දෙකක් එකතු කිරීමෙන් සැකසුණු යුගල පද

උදාහරණ:-

තොරතුරු ඉදිරිපත් කිරීම සඳහා බහුවිධ මාධ්‍ය ඇසුරු කරමු

පරිගණකය නූතන ලෝකයේ බහුලව භාවිත කෙරෙන භාණ්ඩයක් බවට පත්ව තිබේ. පරිගණකය මගින් තොරතුරු සන්නිවේදනය අපේ කාර්යයන්හි කාර්යක්ෂමතාවට ප්‍රබල ලෙස බලපායි. මේ හේතුවෙන් ඇතැම් පැරණි සන්නිවේදන ක්‍රම සමාජයෙන් ඈත් වෙමින් පවතී. පරිගණකය ඇසුරෙන් ශ්‍රව්‍ය දෘශ්‍ය මාධ්‍ය කිහිපයක් එකවර භාවිත කොට ඉතා ආකර්ෂණීය ලෙස තොරතුරු ඉදිරිපත් කළ හැකි ය. එමගින් ග්‍රාහකයාට සිය ඇසින් සහ කනින් එකවර තොරතුරු ලබා ගැනීමට හැකි වන අතර ඉතා පැහැදිලිව සහ නිරවුල්ව තොරතුරු විධිමත් ලෙස ඉදිරිපත් කිරීමට ද ඉඩ සැලසෙයි. මෙය බහු විධ මාධ්‍ය ඉදිරිපත් කිරීමක් ලෙස සැලකෙයි.

කිසියම් දේශනයක් හෝ ඉදිරිපත් කිරීමක් පරිගණකය ආධාරයෙන් සිදු කිරීමේ දී බහුලව යොදා ගැනෙන්නේ පවර් පොයින්ට් (Power Point) නැමැති ඉතා ම ජනප්‍රිය මෘදුකාංගය යි. එය 1992 වර්ෂයේ නිල වශයෙන් නිකුත් වී ඇති අතර වින්ඩෝස් සහ ඇපල් මෙහෙයුම් පද්ධති සමග භාවිත කළ හැකි ය. මේ වන විට එම මෘදුකාංගය ඇපල් සහ ඇන්ඩ්‍රොයිඩ් දුරකථන මෙහෙයුම් පද්ධති සමග ද ක්‍රියාත්මක කළ හැකි ය.

පවර් පොයින්ට් මෘදුකාංගය භාවිතයෙන් අදාළ ඉදිරිපත් කිරීමේ සැලැස්ම මුල සිට අග දක්වා රූප රාමු පෙළකට නැගිය හැකි ය. දේශනය පැවැත්වීමට සමගාමීව එම රූප රාමු පෙළ තිරය මත දිස්වීමට සලස්වමින් කිසිදු කරුණක් මග නොහැර අවශ්‍ය තොරතුරු ග්‍රාහකයා වෙත ඉදිරිපත් කළ හැකි ය.

පහසුවෙන් ග්‍රහණය කර ගත හැකි ආකාරයට පවර් පොයින්ට් රූප රාමු සකස් කර ගත යුතු ය. ඇසට පහසු වර්ණ භාවිත කළ යුතු අතර අනවශ්‍ය පරිදි රූප රාමුව අකුරුවලින් පිරවීම උචිත නො වේ. මිනිස් මොළයට වරකට ග්‍රහණය කර ගත හැකි වචන සංඛ්‍යාව සීමා සහිත බැවින් වචනවලින් පිරුණු රූප රාමු නිසා ග්‍රාහකයා වෙහෙසට පත් විය හැකි ය. එබැවින් අවම වචන භාවිතය මෙහි දී වැදගත් වේ. සමස්ත පවර් පොයින්ට් රූප රාමු පෙළ පුරා ම එක් සරල අකුරු වර්ගයක් භාවිත කිරීම උචිත ය. සභාවේ පසුපස සිට වුව ද කියවිය හැකි ලෙස අකුරක අවම ප්‍රමාණය පොයින්ට් 18 ලෙස භාවිත කිරීම යෝග්‍ය ය. උපරිම අකුරු වර්ග දෙකක් භාවිත කිරීමට සීමා විය යුතු ය.

සමස්ත ඉදිරිපත් කිරීම පුරා ඒකමිතියක් පවත්වා ගැනීම වැදගත් වන අතර සංඛ්‍යා ලේඛන ඉදිරිපත් කිරීමේ දී හැකි තාක් සරල වගු සහ චිත්‍රක රූප (Graphic) භාවිත කළ යුතු ය. උචිත වර්ණ භාවිතය ග්‍රාහක ආකර්ෂණයට හේතු වනු ඇත.

ග්‍රාහක අවධානය තීව්‍ර කිරීමට සහ කරුණු සනාථ කිරීමට ශ්‍රව්‍ය දෘශ්‍ය ප්‍රයෝග භාවිතය සුදුසු ය. අවශ්‍ය පරිදි සජීවීකරණය, රූප යොදා ගැනීම වැදගත් වන අතර රූප රාමුවෙන් රූප රාමුවට සජීවීකරණ රූප (Animation) යෙදීම ග්‍රාහකයා වෙහෙසට පත් කරන්නකි. එබැවින් යොදා ගන්නා සියලූ ප්‍රයෝග අවශ්‍ය පරිදි හා අවස්ථාවට උචිත ලෙස භාවිතය පිළිබඳව සැලකිලිමත් විය යුතු ය. කවර ශ්‍රව්‍ය දෘශ්‍ය ප්‍රයෝග යොදා ගනු ලැබුව ද පවර් පොයින්ට් සමර්පණය අර්ථවත් වන්නේ ඉදිරිපත් කරන්නාගේ කථනයත් සමග යි. පවර් පොයින්ට් සමර්පණය යනු ඔබේ ඉදිරිපත් කිරීමට ආධාරකයක් විනා සමස්ත ඉදිරිපත් කිරීම නොවන බව සිහි තබා ගත යුතු ය.

බහුවිධ මාධ්‍ය ප්‍රක්ෂේපකය (Multimedia projector), පිටු පෙරළනය, පෝස්ටරය, කාටුන්, සංයුක්ත තැටි ආදි විවිධ මාධ්‍ය ද කිසියම් ඉදිරිපත් කිරීමක් සඳහා ආධාරක වශයෙන් භාවිත කළ හැකි ය. මේ සියල්ල ඵලදායක වන්නේ ඔබේ ඉදිරිපත් කිරීමේ කුසලතා දියුණු කර ගත හොත් පමණකි. මන්ද ඉහත සියල්ල ඔබේ ඉදිරිපත් කිරීමේ පසුබිම මිස සමස්තය නොවන බැවිනි.