රෝගීන් ආලේප කිරීමේ පිළිවෙතට පෙර පූජාප්‍රසාදිතුමා රෝගියාගේ පාපෝච්චාරණය අසයි.

ආරම්භක පිළිවෙත

පූජාප්‍රසාදිතුමා ශුද්ධ වූ වස්ත්‍රයෙන් සැරසෙයි. "ස්වාමීන් වහන්සේගේ සමාදානය ඔබ සමග පවතීවා" යනුවෙන් පවසමින් රෝගියාට සහ නිවැසියන්ට ආචාර කරයි. රෝගියාට, එහි සිටින අයට සහ කාමරයට ආසිරි පැන් ඉසිමින් "ඔබ ලැබූ ප්‍රසාද ස්නාපනය මේ ජලය මගින් ඔබට සිහි ගැන්වේවා! තමන් වහන්සේගේ මරණය හා උත්ථානය මගින් අප ගලවා ගත් ක්‍රිස්තුන් වහන්සේ ඔබට සිහි ගැන්වේවා!" යයි පවසයි. ඉන්පසු පූජාප්‍රසාදිතුමා පහත සඳහන් වචනවලින් හෝ ඊට සමාන ලෙස රැස් ව සිටින්නන් අමතයි.

පූජාප්‍රසාදිතුමා :

දයාබර සහෝදර සහෝදරියෙනි, රෝගාතුරයන් වෙත ජේසුස් ස්වාමීන් වහන්සේ දයා පෑ සැටි ශු. සුවිශේෂයේ සඳහන් වේ. අප වෙනුවෙන් මහත් සේ දුක් විඳි ඔවුන් වහන්සේ ම ඔවුන් වහන්සේගේ නාමයෙන් එක් රැස් වී සිටින අප සමග දැන් මෙහි වැඩ සිටින සේක. ශු. ජාකොබ් අපෝස්තුලූතුමන් මගින් ඔවුන් වහන්සේ අපට මෙසේ අණ කළ සේක. ඔබ අතරින් යමෙක් රෝගී ව සිටිත් නම් සභාවේ පූජාප්‍රසාදිවරුන් කැඳවත්වා! ඔව්හු ස්වාමීන් වහන්සේගේ නාමයෙන් තෛලයෙන් ඔහු ආලේප කර ඔහු උදෙසා යාච්ඤා කරත්වා! එවිට විශ්වාසයෙන් යුත් යාච්ඤාවෙන් රෝගියා සුවපත් වන්නේ ය. ඒ හැර ස්වාමීන් වහන්සේ ඔහුට සහනය දෙන සේක. ඔහුට පව් ඇත්නම්, ඔහු සමාව ලබන්නේ ය. රෝගාතුර වූ අප සොහොයුරාට ද (සොහොයුරියට ද) ක්‍රිස්තුන් වහන්සේගෙන් සැනසීම හා සුවය ලැබෙන පිණිස ඔහු (ඇය) ඔවුන් වහන්සේගේ වරප්‍රසාදයටත් බලයටත් අප භාර කරමු.

පශ්චත්තාපික පිළිවෙත

පූජාප්‍රසාදිතුමා :

සහෝදරවරුනි, මේ ශුද්ධ වූ පිළිවෙතට සහභාගි වීමට සුදුස්සන් වන පිණිස අපි අපේ පව් සිහිකර ගනිමු. (මොහොතක් නිශ්ශබ්ද ව සිට)

ස්වාමිනී, ඔබ වහන්සේගේ මරණය හා උත්ථානය මගින් ඔබ අප ගලවා ගත් සේක් වේ ද? ස්වාමිනී කරුණා කළ මැනව.

උත්තරය :

ස්වාමිනී, කරුණ කළ මැනව.

පූජාප්‍රසාදිතුමා :

ක්‍රිස්තුනි, ඔබ වහන්සේගේ ආශ්චර්යවත් දුක්ඛප්‍රාප්තිය මගින් නව ජීවනයට ඔබ වහන්සේ අප ගෙන යන සේක් වේ ද? ක්‍රිස්තුනි, කරුණා කළ මැනව.

උත්තරය :

ක්‍රිස්තුනි, කරුණා කළ මැනව.

පූජාප්‍රසාදිතුමා :

ස්වාමීනි, අපගේ දුක් වේදනා මගින් ඔබ වහන්සේගේ දුක්ඛප්‍රාප්තියෙහි හවුල් වීමට ඔබ වහන්සේ අප කැඳවන සේක් වේ ද? ස්වාමීනි, කරුණා කළ මැනව.

උත්තරය :

ස්වාමීනි, කරුණා කළ මැනව.

පූජාප්‍රසාදිතුමා :

සියලූ බලැති දෙවියන් වහන්සේ අපට කරුණා කර අපගේ පව් කමා කර සදා ජීවිතයට අප පමුණුවන සේක්වා!

උත්තරය :

ආමෙන්.

දේව වාක්‍යය කියවීම

මතෙව් 8:5-10, 13 කියවයි.

විශ්වාසිකයන්ගේ යාච්ඤා

(රෝගියා ද අවට සිටින අය ද ඊට පිළිතුරු දෙති)

පූජාප්‍රසාදිතුමා :

සහෝදර සහෝදරියනි, ........... නමැති අප සොහොයුරා (සොහොයුරිය) උදෙසා ස්වාමීන් වහන්සේට බැහැපත් ව අයදිමින් විශ්වාසයෙන් යුතු ව යාච්ඤා කරමු.

පූජාප්‍රසාදිතුමා :

මේ රෝගියා වෙත දයාබර ව වැඩම කර ශුද්ධ වූ ආලේපයෙන් ඔහු (ඇය) ශක්තිමත් කරන පිණිස.

උත්තරය :

ස්වාමීනි අප කරන යාච්ඤා අසා වදාළ මැනව.

පූජාප්‍රසාදිතුමා :

සියලූ නපුරෙන් ඔහු (ඇය) මුදාලන පිණිස.

උත්තරය :

ස්වාමීනි අප කරන යාච්ඤා අසා වදාළ මැනව.

පූජාප්‍රසාදිතුමා :

වේදනා විඳින සියලූ රෝගීන් හට සහනය සලසන පිණිස.

උත්තරය :

ස්වාමීනි අප කරන යාච්ඤා අසා වදාළ මැනව.

පූජාප්‍රසාදිතුමා :

රෝගීන් සුව කිරීම සඳහා වෙහෙසෙන අයට ඔබ වහන්සේ සහාය වනු පිණිස.

උත්තරය :

ස්වාමීනි අප කරන යාච්ඤා අසා වදාළ මැනව.

පූජාප්‍රසාදිතුමා :

ඔහු (ඇය) සියලූ දුර්පරීක්ෂාවලින් හා පාපයෙන් ගලවනු පිණිස.

උත්තරය :

ස්වාමීනි අප කරන යාච්ඤා අසා වදාළ මැනව.

පූජාප්‍රසාදිතුමා :

ඔබ වහන්සේගේ නාමයෙන් අප අත් තබන ඔහු (ඇය) හට සුවය හා ජීවනය දානය කරන පිණිස.

උත්තරය :

ස්වාමීනි අප කරන යාච්ඤා අසා වදාළ මැනව.

(හිස මත අත තැබීම)

පූජාප්‍රසාදිතුමා රෝගියාගේ හිස මත නිශ්ශබ්ද ව අත් තබයි. ඉන් පසු ව රෝගීන් ආලේප කිරීමේ තෛලය සඳහා තුති පිදීමේ යාච්ඤාව කියනු ලැබේ.

පූජාප්‍රසාදිතුමා :

මේ රෝගියාගේ සහනය සඳහා ආලේප කිරීමට අපට ශුද්ධ වූ තෛලය දෙවා වදාළ දෙවි ස්වාමීන් වහන්සේට අපි දැන් ස්තූති කරමු.

අප සඳහා ද අපගේ ගැලවීම සඳහා ද ස්වකීය පුත්‍රයාණන් ලොවට එවා වදාළ සියලූ බලැති දෙවි පියාණෙනි, ඔබ වහන්සේට සදා ප්‍රශංසා වේවා!

උත්තරය :

දෙවියන් වහන්සේට සදා ප්‍රශංසා වේවා!

පූජාප්‍රසාදිතුමා :

අප වැනි මිනිසෙකු මෙන් ඉපිද අප අජරාමර බවට පත් කිරීමට කරුණා කළ දේව පුත්‍රයාණෙනි, ඔබ වහන්සේට ප්‍රශංසා වේවා!

උත්තරය :

දෙවියන් වහන්සේට සදා ප්‍රශංසා වේවා!

පූජාප්‍රසාදිතුමා :

අප ශරීරයේ දුර්වලතා ඔබ වහන්සේගේ ආනුභාවයේ ශක්තියෙන් දුරලන ශුද්ධාත්මයාණන් වන දෙවියනි, ඔබ වහන්සේට ප්‍රශංසා වේවා!

උත්තරය :

දෙවියන් වහන්සේට සදා ප්‍රශංසා වේවා!

පූජාප්‍රසාදිතුමා :

ස්වාමීනි, ඔබ වහන්සේ කෙරෙහි විශ්වාසවන්ත ව මේ ශුද්ධ වූ තෛලයෙන් ආලේප කරනු ලබන අපගේ සහෝදරයා (සහෝදරිය) වේදනාවේ දී සහනය ද දුර්වලත්වයේ දී ශක්තිය ද අප ස්වාමීන් වන ක්‍රිස්තුන් වහන්සේ මගින් ලබා ගනීවා!

උත්තරය :

ආමෙන්.

ආලේපනය

පූජාප්‍රසාදිතුමා රෝගීන් ආලේප කිරීමේ තෛලය රැගෙන රෝගීයාගේ නළල ද දෑත ද ආලේප කරමින් නියමිත යාච්ඤාව පවසයි.

පූජාප්‍රසාදිතුමා :

මේ පරිශුද්ධ ආලේපයෙන් ද තමන් වහන්සේගේ දයාබර කරුණාවෙන් ද ස්වාමීන් වහන්සේ ශුද්ධාත්මයාණන් වහන්සේගේ වරම් දෙමින් ඔබට ආධාර කරන සේක්වා!

උත්තරය :

ආමෙන්.

පූජාප්‍රසාදිතුමා :

ඔබේ පාපවලින් ඔබ මුදා ගැලවීම දානය කර කරුණාබර ව ඔබ සනසන සේක්වා!

උත්තරය :

ආමෙන්.

(ඉන් පසු පූජාප්‍රසාදිතුමා රෝගියාගේ තත්ත්වය සලකා ගැලපෙන යාච්ඤාවක් උච්චාරණය කරනු ලබයි. සාමාන්‍ය රෝගියෙකු සඳහා කරනු ලබන යාච්ඤාව මෙසේ ය)

පූජාප්‍රසාදිතුමා :

යාච්ඤා කරම්හ.

අපගේ ගැලවුම්කාරයාණනි, ශුද්ධාත්මයාණන් වහන්සේගේ වරමින් මේ රෝගියාගේ ආබාධ දුරු කළ මැනව. ඔහුගේ (ඇයගේ) පව් කමා කළ මැනව. සිතේ සහ ගතේ සියලූ වේදනා සංසිඳුව මැනව. ආත්මික හා ශාරීරික සම්පූර්ණ සුවය දානය කිරීමට කරුණා කළ මැනව. ඔබ වහන්සේගේ දයාබර කමින් සුව කරනු ලැබ ඔහුගේ (ඇයගේ) වැඩ කටයුතුවල යෙදීමට ඔහුට (ඇයට) හැකි වේවා! සදාතනව වැඩ සිටිමින් රජකම් කරන ඔබ වහන්සේ ම මෙය දානය කරන සේක්වා!

උත්තරය :

ආමෙන්.

දිව්‍ය සත්ප්‍රසාද වහන්සේ දානය කිරීම

ස්වර්ගයේ වැඩ සිටි යාච්ඤාවෙන් පසු පූජාප්‍රසාදිතුමා දිව්‍ය සත්ප්‍රසාද වහන්සේ ඔසවා දක්වමින් "මෙන්න දේවාජබාලකයාණෝ මෙන්න ලොවේ පව් හරින තැනැන් වහන්සේ අජබාලකයාණන්ගේ භෝජනයට කැඳවීම ලද්දෝ භාග්‍යවන්තයෝ ය" යන්න ප්‍රකාශ කළ විට, එයට නියමිත පිළිතුර සියලූ දෙනා ලබා දෙයි. රෝගියාට දිව්‍ය සත්ප්‍රසාද වහන්සේ දානය කරනු ලබයි. දිව්‍ය සත්ප්‍රසාද වහන්සේ ලබා ගැනීමට අපේක්ෂා කරන අන් අයට ද ලබා ගත හැකි ය.

අනතුරු ව පූජාප්‍රසාදිතුමා පහත යැදුම උච්චාරණය කරයි.

පූජාප්‍රසාදිතුමා :

යාච්ඤා කරම්හ.
පරිශුද්ධ පියාණෙනි, සියලූ බලැති දෙවි ස්වාමීනි, මේ අපගේ සොහොයුරා (සොයුරිය) ලබා ගත් ඔබ වහන්සේගේ පුත්‍රයාණන් හා අපගේ ස්වාමීන් වන ජේසුස් ක්‍රිස්තුන් වහන්සේගේ ශ්‍රී ශරීරය (ශ්‍රී රුධිරය) ඔහුගේ (ඇයගේ) ආත්මික හා ශාරීරික සුවය සඳහා සදාතන ඖෂධයක් කළ මැනවයි අපි විශ්වාසයෙන් යුතු ව අයදිමු. මේ කීදේ අප ස්වාමීන් වන ජේසුස් ක්‍රිස්තුන් වහන්සේ උදෙසා ම ලැබේවා!

උත්තරය :

ආමෙන්.

ආශීර්වාදය

පූජාප්‍රසාදිතුමා :

පියාණන් වහන්සේ ද පුත්‍රයාණන් වහන්සේ ද ශුද්ධාත්මයාණන් වහන්සේ ද වන සියලූ බලැති දෙවියන් වහන්සේ ඔබ ආශීර්වාද කරන සේක්වා!

උත්තරය :

ආමෙන්.

රෝගීන්ගේ ආලේපය සඳහා පැමිණෙන පූජාප්‍රසාදිතුමාට සහාය වීම, එතුමා සමග රෝගියා වෙනුවෙන් යාච්ඤා කිරීම හා රෝගියාට ද යාච්ඤාවට සවන් දිය හැකි අයුරින් හඬ නගා යාච්ඤාවේ යෙදීම අපගේ වගකීම් වේ.

මාර්ගෝපකාර දිව්‍ය සත්ප්‍රසාදය පිළිබඳ ව කතෝලික සභා ධර්මෝපදේශයෙහි මෙසේ දක්වයි.