ගීතාවලිය 119 : 105-111

දෙවියන් වහන්සේ මිනිසා වෙත අනාවරණය වන ප්‍රබලතම මාර්ගය "දේව වචනය" බව පෙන්වා දිය හැකි වේ. දේව වචනය අසා එය පිළිපැදීමෙන් අප ජීවිත සාර්ථක කර ගත යුතු ආකාරය ශුද්ධ බයිබලය අපට පෙන්වා දී ඇත. එම නිසා අප කිතුනු දිවියේ යහ පැවැත්මට දේව වචනය නිවැරැදි ලෙස අවබෝධ කර ගැනීම අත්‍යවශ්‍ය දෙයක් බවට පත් ව ඇත.

දේව වචනය අවබෝධ කරගැනීම සඳහා දෙවියන් වහන්සේ අපට විවිධාකාරයෙන් මඟපෙන්වන සේක. බොහෝ විට දේවගැතිවරුන්, දහම්පාසල් ගුරුවරුන්, දෙමව්පියන්, වැඩිහිටියන්, සහෝදර සහෝදරියන් වැනි අය දේව වචනය තේරුම් ගැනීමට අපට මඟපෙන්වනු ඇත.

"ඔබේ වචන මාගේ දෙපයට පහනක් ය; මාගේ මාවතට එළියක් ය"
                                                   ගීතාවලිය 119:105

දෙවියන් වහන්සේගේ වචනය, අපගේ ජීවිතවලට නිවැරැදි මාර්ගය හෙළි කර දෙන ආලෝකයකි. පාපය නැමැති අඳුරෙන් මිදී අප ජීවිත ආලෝකවත් කර ගැනීමට දේව වචනය අපට මඟපෙන්වයි. එය කෙලෙස සිදුවන්නේ දැයි විමසා බලමු.

• ජීවිතයට නිවැරැදි මඟ පෙන්වන දේව වචනය

දෙවියන් වහන්සේගේ වචනය අපගේ ජීවිත ආලෝකවත් කරයි. දෙවියන් වහන්සේගේ වචනය නිරතුරු ව ම අප ගමන් කළ යුතු නිවැරැදි මඟ පෙන්වා දෙනු ඇත. අන්ධකාර වූ වැරැදි මාර්ගයන්ගෙන් අප නිවැරැදි මාර්ගයට යොමු කරවන්නේ දේව වචනයයි.

• වැරැදි අවබෝධ කර දෙන දේව වචනය

දෙවියන් වහන්සේගේ දැහැමි නියම අපගේ ජීවිතවල පවතින අයහපත් ගති පැවතුම් අපට පෙන්වා දෙයි. දෙවියන් වහන්සේ, මිනිසාගෙන් දේව නියම ඉටු කිරීම බලාපොරොත්තු වන සේක. දෙවියන් වහන්සේ වෙනුවෙන් අපට කළ හැකි උපරිම මෙහෙවර නම් උන්වහන්සේගේ නියම ඉටු කිරීමයි. එම නිසා නිරන්තරයෙන් දෙවිපියාණන්ගේ නියම ඉගෙන ගැනීමට උත්සාහ දැරීම වැදගත් වේ.

එපමණක් නොව එම නියම නිරතුරු මෙනෙහි කිරීමත්, හැකි සැම විට ම එම පණත් ඉටු කිරීමට උත්සාහ දැරීමත් වැදගත් වේ. එමගින් පිරිපුන් ජීවිතයක් කරා ගමන් කිරීමට අපට හැකියාව ලැබේ. අප විසින් කරනු ලබන ඕනෑ ම ක්‍රියාවක වැරැදි හෝ නිවැරැදි බව තීරණය කළ යුතු වන්නේ දේව වචනය පදනම් කරගෙන ය.

• අප ධෛර්යවත් කරන දේව වචනය

අපගේ ජීවිතවලට මුහුණ දීමට සිදුවන නොයෙකුත් දුක් පීඩාවල දී අප ධෛර්යවත් කරන්නේ දේව වචනයයි. දේව වචනය ආධ්‍යාත්මික වශයෙන් අප ධෛර්යවත් කරමින් අපගේ ජීවිත ප්‍රාණවත් කරයි. අධෛර්යවත් අවස්ථාවල දේව වචනය කියවීමෙන් හා මෙනෙහි කිරීමෙන් ජීවිතයට නව ශක්තියක් හා බලයක් ලැබේ.

• දේව නියමය උගන්වන දේව වචනය

දේව වචනය තුළින් දේව නියම අවබෝධ කර ගැනීමට දෙවි පියාණන් වහන්සේ අපට මඟපෙන්වන සේක. ජීවිත යහමඟ ගෙන යාමට අවශ්‍ය කරන දැහැමි නියම අප විසින් හඳුනාගනු ලබන්නේ දේව වචනය තුළිනි. ශුද්ධ බයිබලය මගින් දෙවියන් වහන්සේ අපට ලබා දෙන නීති නියම දැනගැනීමත්, පිළිපැදීමත් මගින් ජීවිතයට නව අරුතක් ගෙන දෙයි.

• සතුරන් පරාජය කරන දේව වචනය

දෙවියන් වහන්සේගේ වචනය හේතු කොටගෙන අප වෙත පැමිණෙන බොහෝ සතුරු උවදුරු අප කෙරෙන් දුරු කරගත හැකි වේ. පාපයට වැටීමට අප වෙත විවිධ පරීක්ෂා පැමිණිය ද දේව වචනය තුළ ඒවා පරාජය කිරීමේ හැකියාව අපට ඇත. එම නිසා කිසිදු බියක් සැකක් නොමැති ව දෙව් වදන් නැමති මාර්ගයෙහි ගමන් කිරීමට අපට හැකි වේ. අප වෙත පැමිණෙන විවිධ අනතුරු ජීවිත අවදානම් තුළ පවා අප බියක් ඇති කරගත යුතු නොවේ. මන්ද දෙවියන් වහන්සේගේ වචනය විසින් එවැනි අනතුරු හා සතුරු උවදුරුවලින් අපගේ ජීවිත ආරක්ෂා කරනු ලබන බැවිනි.

• ප්‍රීතිය ගෙන දෙන දේව වචනය

දෙවියන් වහන්සේ හා මිනිසා අතර සදාකාලික ගිවිසුමක් ඇතිකරගත් ආකාරය ශුද්ධ බයිබලය අපට පෙන්වා දෙයි. එම නිසා දේව වචනය පිළිපැදීම හා ඒ තුළ ජීවත් වීම මිනිසාගේ උරුමයක් හා වගකීමක් වේ. දෙවියන් වහන්සේගේ වචනය සම්පූර්ණ කැමැත්තෙන් හා පූර්ණ උත්සාහයෙන් ඉටු කිරීම වැදගත් වේ.

මෙලෙස දේව වචනය තමන් සතු කර ගැනීමෙන් හා ඒ තුළ ජීවත් වීමෙන් මිනිසාට ප්‍රීතිය ළඟාකරගත හැකි වේ. එම නිසා දේව වචනයට පිටුපා අයහපත් ක්‍රියාවල නොයෙදීම ඔබගේ වගකීමකි. දේව වචනය තුළ ජීවත් වන්නා සදාකාල ප්‍රීතියෙහි උරුමකරුවෙකි. එලෙස දේව වචනය මත තම ජීවිතයේ ප්‍රීතිය අත්කරගත් ශිෂ්‍යයෙකුගේ සැබෑ අත්දැකීමක් පහත දැක්වේ.

නගරයෙන් සැතපුම් ගණනාවකට ඈතින් පිහිටි එක්තරා පිටිසර ගම්මානයක ශිෂ්‍යයෙක් විෂය සියල්ලට ම විශිෂ්ට සම්මාන ලබා ගනිමින් අ.පො.ස. සාමාන්‍ය පෙළ විභාගය සමත් විය. කිතුනු භක්තිකයකු වූ මේ සිසුවා පාසල නිම වී සවස් කාලය ගත කළේ සිය දෙමව්පියන්ගේ ගොවිතැන් කටයුතුවලට උපකාර කිරීමෙනි. එසේ ම ඔහුට කිසි ම විෂයයක් සඳහා උපකාර පන්තියකට සහභාගී වීමේ හැකියාවක් ද නොමැති විය. ඔහු තමා ලබාගත් විශිෂ්ට ප්‍රතිඵලය ගැන තමන්ට ක්‍රිස්තියානි ධර්මය විෂයය උගන්වන ගුරුතුමියට මෙලෙස ප්‍රකාශ කළේ ය. "මම සැම දිනයක ම අලූයම අවදි වී පාඩම් කිරීමට ප්‍රථමයෙන් ශුද්ධ බයිබලයේ හිතෝපදේශය හෝ ගීතාවලිය පොතේ පරිච්ඡේදයක් කියවීමෙන් අනතුරුව දෙවි පියාණන්ට දවස බාර දෙමින් යාච්ඤාවක් කළෙමි" ඔහුට එලෙස සාර්ථක ගමනක් යෑමට, එම යහපුරුද්ද තුළ දෙවියන් වහන්සේ මඟපෙන්වූ බව ඔහු තම ගුරුතුමියට ප්‍රකාශ කළේ ය.

දේව වචනය පිළිගැනීමෙන් හා පිළිපැදීමෙන් අපගේ ජීවිත තුළට ප්‍රීතිය ළඟා වේ. එම ප්‍රීතිය අන් අයගේ ද විශ්වාසය ශක්තිමත් කිරීම සඳහා යොදා ගැනීම වැදගත් වේ. දේව වචනයට අනුව දිවි ගෙවීමෙන් ඔබ ලබන අත්දැකීම ඔබේ මිතුරු මිතුරියන් සමග බෙදා ගැනීම වැදගත් වේ. එමගින් ඒ අයගේ ජීවිත ද යහමඟට ගෙනයාමට උපකාර කළ හැකි වේ. අන් අයගේ ජීවිත යහපත වෙත යොමු කිරීමට ද, ඔවුන්ගේ වැරැදි නිවැරැදි කර දීමට ද, ජීවිත අභියෝග ජය ගැනීමට ද එලෙස ඔබට දායක විය හැකි වේ. එසේ ම විපතට පත්වූවන් ධෛර්යවත් කිරීම ද, අන් අය තුළ පවතින බිය දුරු කිරීම ද, යහපත මගින් සතුරන් පරාජය කිරීම සඳහා ද ඔබ අවට සිටින්නන් වෙත දේව වචනය මගින් මහත් මෙහෙවරක් කළ හැකි වේ.

මෙලෙස දිනපතා දේව වචනය මෙනෙහි කර, ඒ තුළින් මඟපෙන්වීම් ලබා ධෛර්යයෙන් හා ප්‍රීතියෙන් යුතු ව ජීවිතයට මුහුණ දෙන අයකු ලෙස ජීවත් වීමට නිරතුරුව ම උත්සාහ දරමු.