2.4 - මිනිස් කනෙහි ව්‍යුහය හා ක්‍රියාකාරිත්වය
කන ශ්‍රවණ සංවේදනය ප්‍රතිග්‍රහණය කරන අවයවයයි. ශ්‍රවණය සිදුවන ආකාරය අධ්‍යයනය කිරීම සඳහා කනෙහි ව්‍යුහය පිළිබඳව විමසා බලමු.
මිනිස් කනෙහි රූපසටහනක් 2.28 රූපයේ දැක්වේ.
කනෙහි ප්‍රධාන කොටස් කිහිපයක් පිළිබඳව තොරතුරු 2.2 වගුවේ දැක්වේ.
කන මගින් ශ්‍රවණ සංවේදනය සිදු වන ආකාරය විමසා බලමු.
ශබ්දයකට අනුව පටලයක් කම්පනය වන බව ආදර්ශනය සඳහා ක්‍රියාකාරකම 2.10 නිරත වෙමු.
සරසුල කම්පනය වන විට රබර් පටලය කම්පනය වීමෙන් වඩා හොඳින් හඬ ඇසීම නිරීක්ෂණය කළ හැකි ය. ඒ ආකාරයට ශබ්ද තරංගයකට අනුරූපව කර්ණපටහ පටලය කම්පනය වීම සිදු වේ.
බාහිර පරිසරයේ වස්තු කම්පනය වීමෙන් හට ගන්නා ධ්වනි තරංග බාහිර ශ්‍රවණ නාළය තුළින් කර්ණපටහ පටලය දක්වා ගමන් කරයි. එවිට කර්ණපටහ පටලය එම තරංගයට අනුරූපව කම්පනය වේ. එම කම්පන ශ්‍රවණ අස්ථීකා මගින් වර්ධනය කර ඒ ඔස්සේ කර්ණ සංඛයට සම්ප්‍රේෂණය කෙරේ. කර්ණ සංඛයට සම්බන්ධ ස්නායු අග්‍ර මගින් එම කම්පනයට අදාළ ආවේග ශ්‍රවණ ස්නායුව ඔස්සේ මොළය වෙත සම්ප්‍රේෂණය කෙරේ. මොළයේ ශ්‍රවණ සංවේදී ප්‍රදේශය මගින් අදාළ ශබ්දය කුමක්දැයි හඳුනා ගනියි.