11.1 - ඝනත්වය හැඳින්වීම
බීමට ගන්නා ජලය සහිත වීදුරුවක ඇත්තේ කුඩා ජල පරිමාවක් මෙන් ම කුඩා ජල ස්කන්ධයකි. ළිඳක ඊට වඩා විශාල ජල පරිමාවක් හා ජල ස්කන්ධයක් ඇත. නමුත් ජලාශයක් සැලකූ විට එහි විශාල ජල පරිමාවක් ඇති සේ ම එම ජලයේ ස්කන්ධය ද අතිවිශාල ය (11.1 රූපය).
ස්කන්ධය හා පරිමාව කොතරම් වෙනස් වුවත් යම් ද්‍රව්‍යයක ස්කන්ධය හා පරිමාව අතර සම්බන්ධයක් ඇති බව ඔබ දන්නවා ද? එය විමසා බැලීම සඳහා 11.1 ක්‍රියාකාරකමෙහි යෙදෙමු.
මෙම ක්‍රියාකාරකමට අනුව ජලයේ පරිමාව වෙනස් වුව ද ස්කන්ධය, පරිමාවට දරන අනුපාතය නියත (එක ම) අගයක් බව පෙනී යයි. එම අගය ජලය සඳහා සුවිශේෂී වූ අගයකි. මෙම අනුපාතය අදාළ ද්‍රව්‍යයේ ඝනත්වය ලෙස හඳුන්වනු ලැබේ.
යම් ද්‍රව්‍යයක ස්කන්ධය එහි පරිමාවට දරන අනුපාතය මගින් එම ද්‍රව්‍යයේ ඝනත්වය සෙවිය හැකි ය.
මේ අනුව යම් ද්‍රව්‍යයක ඝනත්වය පහත පරිදි අර්ථ දැක්විය හැකි ය.
යම් ද්‍රව්‍යයක ඒකක පරිමාවක ස්කන්ධය එම ද්‍රව්‍යයේ ඝනත්වය ලෙස හැඳින්වේ.
