16.1 - නැනෝමීටරය
පහත දී ඇති 16.1 රූපය හොඳින් නිරීක්ෂණය කරන්න.
ඔබ නිරීක්ෂණය කරන ලද්දේ ක්ෂුද්‍ර රොබෝ යන්ත්‍රයක් රුධිර සෛලයකට ප්‍රතිකාර කරන අන්දම දැක්වෙන විශාලනය කරන ලද රූප සටහනකි. ඇත්ත වශයෙන්ම මෙවැනි අති සියුම් යන්ත්‍ර තනන්නේ කෙසේ ද? ඒ සඳහා යොදා ගන්නා තාක්ෂණය කුමක් ද?
මෙවැනි ක්ෂුද්‍ර යන්ත්‍ර නිෂ්පාදනය සම්බන්ධයෙන් වර්ෂ 2016 දී රසායන විද්‍යාව සඳහා වූ නොබෙල් ත්‍යාගය ජීන් පියරේ සෝවේජ්, ශ්‍රීමත් ජේ. ස්ටොඩාට් සහ බර්නාඩ් ෆෙරින්ගා (Jean Pierre Sauvage, Sir J. Fraser, Stoddart and Bernard Feringa) යන විද්‍යාඥයින් හට පිරිනැමිනි. එම ක්‍රියාවලිය විද්‍යාව තවත් වැදගත් අදියරකට ළඟා වීමක් ලෙස සැලකේ. එතැන් සිට ක්ෂුද්‍ර රොබෝවන් විද්‍යාවට තව දුරටත් ආගන්තුකයින් නොවී ය.
දැන් අපි, එවන් ආශ්චර්ය සිදු කළ හැකි විද්‍යාවේ අති සියුම් ලෝකය තේරුම් ගැනීමට උත්සාහ කරමු.
16.1 නැනෝමීටරය
"නැනෝ" යනු කුමක් ද?
"Nano" යන ඉංග්‍රීසි වචනය dwarf හෙවත් අගුටුමිටි යන අරුත ඇති ග්‍රීක භාෂාවේ වචනයකින් සම්භවය වී ඇත. එබැවින් නැනෝ යනු අතිශයින් කුඩා දේ ආශ්‍රිත යෙදුමකි. මෙම ඉන්ද්‍රජාලික පරිමාණයේ දී ඔබ සෑම දෙයක්ම තැනී ඇති පරමාණු දකිනු පමණක් නොව ඒවා ඔබ මොබ චලනය කිරීමට ද ඔබට හැකි වනු ඇත.
"නැනෝ" කෙතරම් කුඩා ද?
එය අතිශයින් ම කුඩා ලෝකයකි. දැකීමට හැකි වෙතැයි සිතා ගැනීමට නොහැකි තරම් එය කුඩා ලෝකයකි. අප ජීවත් වන්නේ මීටර සහ කිලෝමීටර පරිමාණ සමග ය. නැනෝ යනු "බිලියනයෙන් පංගුවකි". එබැවින් නැනෝමීටරය යනු මීටරයෙන් බිලියනයෙන් පංගුවකි. එනම් 10-9 m කි.
හයිඩ්රජන් වැනි මූලද්‍රව්‍යයක තනි පරමාණුවක විශ්කම්භය නැනෝමීටරයෙන් දහයෙන් පංගු කිහිපයක් වේ.
