පෘථීවිය මත ජීවයේ සම්භවය පිළිබඳව ද විවිධ වූ මත සහ වාද රැසක් පවතී. මීට වසර බිලියන 3.5කට පමණ පෙර පෘථීවිය මත ජීවය ආරම්භ වූ බව විශ්වාස කෙරේ.

ජීවයේ සම්භවය පිළිබඳව පැවති වාද කිහිපයක් සලකා බලමු.

විශේෂ මැවුම් වාදය

මෙම වාදයෙන් කියැවෙන්නේ පෘථීවිය මත ඇති සියලූ ම ජීවීන් කිසියම් ආකාරයක මැවීමකින් ඇති වූ බව යි. මෙම මතය තහවුරු කිරීමට ප්‍රමාණවත් විද්‍යාත්මක සාක්ෂ්‍ය නොමැති බැවින් මෙය විද්‍යාඥයින්ගේ සැලකිල්ලට භාජනය නො වී ය.

ස්වයංසිද්ධ ජනනවාදය

අජීවී ද්‍රව්‍යවලින් ස්වයංසිද්ධව ජීවීන් නිර්මාණය වූ බව මෙම වාදයෙන් පෙන්වා දෙයි.

නිදසුන් -

• රෙදි කඩමාලූවලින් මීයන් ඇති වීම.
• දිරා ගිය ලීවලින් ගුල්ලන් ඇති වීම.
• නරක් වූ මස්වලින් ඉහඳ පණුවන් ඇති වීම.

ලූවී පාස්චර් නම් විද්‍යාඥයා විසින් කරන ලද පරීක්ෂණ මගින් ස්වයංසිද්ධ ජනනවාදය ද සත්‍ය නො වන බව තහවුරු විය.

කොස්මොසොයික් වාදය (Cosmozoic theory)

පෘථීවිය මත පතිත වූ ජීවීන් සහිත උල්කාවක් හෝ වෙනත් ග්‍රහලෝකයකින් පැමිණි අභ්‍යවකාශ යානා මගින් පෘථීවිය මත ජීවය ආරම්භ වූ බව මෙම වාදයෙන් ප්‍රකාශ කරයි. නමුත් මෙම වාදය විද්‍යාත්මකව තහවුරු කර නැත.

ජෛව රසායනික පරිණාමය පිළිබඳ වාදය

පෘථීවියේ ආරම්භයේ වායුගෝලයේ පැවති වායු රසායනිකව ප්‍රතික්‍රියා කර ජීවය සෑදීමට අවශ්‍ය අමුද්‍රව්‍ය ඇති වූ බව මෙම වාදයෙන් තහවුරු කෙරේ. ඉහත සඳහන් ප්‍රතික්‍රියා සඳහා අවශ්‍ය ශක්තිය, විදුලි කෙටීම් වැනි විද්‍යුත් විසර්ජන මගින් ද, ගිනි කඳු පිපිරීමෙන් සහ සූර්යයාගෙන් පැමිණෙන පාරජම්බුල කිරණ මගින් ද සැපයෙන්නට ඇති බව විශ්වාස කෙරේ. ජීවය සෑදීමට අවශ්‍ය අමුද්‍රව්‍ය වැසි ජලයේ දිය වී සාගරයට එකතු විය. සාගරවලට පැමිණි මෙම මිශ්‍රණය ආදි සූපය (Primordial Soup) ලෙස හැඳින්වේ. එනම් මුල් ම ජීවී සෛල හෙවත් ප්‍රාග් සෛලය ජෛව රසායනික ප්‍රතික්‍රියාවක ප්‍රතිඵලයක් ලෙස ආදි සූපයෙන් ඇති වූ බව සඳහන් වේ. මෙම මුල් ම ජීවියා ඒක සෛලික වූ අතර නිර්වායු, (ශ්වසනය සඳහා ඔක්සිජන් භාවිත නො කරන) විෂමපෝෂී ජීවියකු ලෙස සැලකේ.

විද්‍යාඥයන් විසින් ආදි සූපයෙන් මුල් ම ජීවී සෛලය නිර්මාණය වූ බව පරීක්ෂණාත්මකව පෙන්වා දී ඇත.

පෘථීවියේ මුල් ම ජීවී ආකාරය සරලතම ඒකෙසෙලික බැක්ටීරියාවක් ලෙස සැලකේ. පසුව මුල් ම ප්‍රභාසංශ්ලේෂක ජීවීන් ලෙස ඒකෙසෙලික ඇල්ගි ඇති විය. මෙය වායුමය ඔක්සිජන් සහිත වායුගෝලයක් ඇති වීමේ ආරම්භය විය.

දීර්ඝ කාලයක් තිස්සේ ඒකසෛලිකයන්ගේ දේහ ක්‍රමික විකාශනයට ලක් වීමෙන් බහුසෛලික ජීවීහු බිහි වූහ. එම බහුසෛලික ජීවීන් තුළ පටක, අවයව සහ පද්ධති ක්‍රමිකව ගොඩනැගී ශාක හා සත්ත්ව ලෝකය නිර්මාණය වී ඇත.

ආරම්භක බහුසෛලික ජීවීන් ලෙස නිඩාරියාවන්, ඇතැම් ඇනෙලිඩාවන් සහ මුල් ම ආත්‍රොපෝඩාවන් දැක්විය හැකි ය.

මත්ස්‍යයින් මුල් ම පෘෂ්ඨවංශී ජීවී කාණ්ඩය ලෙස සලකන අතර ඔවුන්ගෙන් උභයජීවීන් සම්භවය විය. ප්‍රථමයෙන් ගොඩබිමට පැමිණි පෘෂ්ඨවංශීන් ලෙස උභයජීවීන් සැලකිය හැකි ය. උභයජීවීන් කාලයත් සමග පරිසරයට අනුකූලව දේහයේ සිදු වන විවිධ වෙනස්වීම් නිසා උරගයින්ගේ සම්භවය සිදු විය. උරගයින් උභයජීවීන්ට වඩා භෞමික පරිසරයට අනුවර්තනය වී ඇත. ජෛව පරිණාමයේ දී පක්ෂීන් සහ ක්ෂීරපායින් උරගයින්ගෙන් සම්භවය වූ බව විශ්වාස කෙරේ.

මානවයාගේ සම්භවය මීට වසර මිලියන 12කට පෙර පමණ සිදු වු බව තහවුරු කරගෙන ඇත. නූතන මානවයාගේ ආරම්භය වසර මිලියන පහකට (5 000 000) පමණ පෙර සිදු වූ ලෙස සැලකේ.

සාගරය මත බිහි වූ ප්‍රභාසංශ්ලේෂී ඇල්ගි ක්‍රමිකව වෙනස්වීමෙන් ශාක ලෝකය නිර්මාණය විය. මුලින් පරිණාමිකව නො දියුණු ශාක ද ඉන් පසුව අපුෂ්ප ශාක ද පසුව සපුෂ්ප ශාක ද ඇති විය.

මේ අනුව ජීවීන් සම්භවය එක් එක් කාලවල දී විවිධ වෙනස්කම් අනුව සිදු වී ඇති අතර ඒ පිළිබඳව අවබෝධය ලබා ගැනීමට 9.3 රූපය අධ්‍යයනය කරන්න.