දෑතේ කර ගැට සිඹ සනසන්නට පාඩමෙන් ඔබ්බට....

                                                11 ශ්‍රේණියට අදාළව ඇති පාඩමක් වන දෑතේ කරගැට සිඹ සනසන්නට පද්‍ය පන්තිය රචනා කළේ මහගමසේකරයන් බව අප හොඳින් දන්නා කරුණකි. එසේනම් අප හොඳින් දන්නා මහගමසේකර ශුරීන්ගේ අප නොදත් දෑ මොනවාද ? 

                      1929ක් වූ බක් මස 7 වැනි දින ගම්පහ දිස්ත්‍රික්කයේ සියනෑ කෝරලයේ රදාවාන නම් ගම් පියසේ මහවත්තේ විසූ මහගමගේ ජෝන් අප්පුහාමි හා රණවක ආරච්චිගේ රොසලින් නෝනා යුවලට දාව මේ කුමරුන් ජන්මය ලැබීය. මේ කුමරුන්ට මහගමගේ සේකර යන නාමය ලබා දීමට දෙමව්පියන් කටයුතු කළ නමුත් උප්පැන්න සහතික නිකුත් කිරීමේදී සිදුවූ දෝශයක් හේතුවෙන් ඔහුගෙ නම මහගමගේ සේකර වෙනුවට මහගමසේකර නම් විය. කිරිඳිවැල රජයේ මිශ්‍ර පාඨශාලාවෙන් සිප් නැණ ගත් මේ කුමරුන් ක්‍රි.ව.1944 දී ජ්‍යේෂ්ඨ පාඨශාලා සහතික පත්‍ර විභාගය සමත් වී ඇත. ක්‍රි.ව 1945 දී රජයේ ලලිත කලා ආයතනයට බැඳුණු අතර අනතුරුව නිට්ටඹුව ගුරු අභ්‍යාස විද්‍යාලයෙන් ගුරු පුහුණුව ලබා තිබේ.

                      පුහුණුව ලත් ගුරු උතුමෙකු වශයෙන් ක්‍රි.ව 1952 දී රාජකීය හේවාවිතාරණ පාඨශාලාවේ චිත්‍ර කලා ගුරුවරයා ලෙස සිසු නැණ පෑදීය. ඒ එතුමන්ගේ වෘත්තීය දිවියේ සමාරම්භයයි. ඒ අතරතුර දී, මහගමසේකරයන් විසින් ලන්ඩන් විශ්ව විද්‍යාලයෙන් ශ්‍රාස්ත්‍රවේදී උපාධිය ලැබීය. සය වසරක ගුරු දිවියෙන් සමුගෙන රාජ්‍ය භාෂා දෙපාර්තමේන්තුවේ භාෂ පරිවර්ථකයෙකු ලෙස සේවයට බැඳුණේ ක්‍රි.ව.1958 තරග විභාගයකින් සමත් වීමෙන් පසුව ය. 1960 වර්ශය මෙතුමන්ට සුවිශේෂී වසරක් වන්නට ඇත. ඒ එතුමන්ගේ 'චෝර පබ්බත' නාටකයට සංස්කෘතික දෙපාර්තමේන්තුව විසින් 'දහසින් බැඳි පියලි ' ත්‍යාගය හිමි ක‍ර දුන් නිසාවෙනි. එය මහගමසේකරයන් ලැබූ ප්‍රථම රාජ්‍ය සම්මානය බව වාර්තා වේ. හංස ගීතය සහ තවත් නිර්මාණ කෘතියට ඇතුළත් වූයේද , පී.වැලිකල විසින් රචිත කුණ්ඩලකේසී නමින් නිෂ්පාදනය කෙරුණේ ද මෙමෙ නාටකයයි. කේ.ජයතිලකයන් සමඟ 1960 දී එළිදැක්වූ ' ව්‍යංගා ' නම් කෘතිය මෙතුමන්ගේ ප්‍රථම කාව්‍ය නිර්මාණයයි. කෙටි ගද්‍ය රචනා කිහිපයක් ඇතුළත් එහි මහගමසේකරයන්ගේ ප්‍රකට කාව්‍ය රචනා කිහිපයක්ද විය. එනම් සංකල්පනය, මිනීමල්, ධීවර ගීතය, රන් එතනාට කියන කවි ආදී වශයෙනි.ධීවර ගීතය පසු කලෙකදී චිත්‍රසේනයන්ගේ 'කරදිය' නම් මුද්‍රා නාටකයේ ගීතයක් ලෙස පිවිසිණ.

                    එම වසරේදීම, එනම් 1960 දීම මෙතුමන් රාජ්‍ය භාෂා දෙපාර්තමේන්තුවෙන් සමුගෙන ශ්‍රී ලංකා ගුවන්විදුලි සංස්ථාවේ වැඩසටහන් සම්පාදකයෙකු ලෙස සේවයට බැඳී ඇත. 1968 දී ගුවන්විදුලි නිබන්ධක සම්පාදක තනතුරෙන් ඉවත් වී මීරිගම රජයේ ගුරු විද්‍යාලයේ කථිකාචාර්‍යවරයෙකු ලෙස සේවයට බැඳුණි. ඒ අතරතුරම 1969 දී විද්‍යෝදය විශ්ව විද්‍යාලයෙන් ශ්‍රාස්ත්‍රපති (MA) උපාධිය ද ලබා ගත් බව වාර්ථා වේ. 1971 දී රජයේ ලලිත කලායතනයේ විදුහල්පති තනතුරට පත් වී කටයුතු කළ අතර 1973 දී හෘදයාබාදයක් නිසා ගම්පහ රෝහලට ඇතුළත් වී ප්‍රකිකාර ලබන අතරතුර විදුහල්පති තනතුරෙන් ඉවත් වී තිබේ. අනතුරුව අධ්‍යාපන අමාත්‍යංශයේ සෞන්දර්ය අංශයේ අධ්‍යාපන නිලධාරී තනතුරක් ද‍රමින් සේවය කර තිබේ.   

                    1974 දී විද්‍යෝදය විශ්ව විද්‍යාලයේ හෙවත් ශ්‍රී ජයවර්ධනපුර විශ්ව විද්‍යාලයේ දර්ශනසූරී (Ph.D) Doctor of Philosophy උපාධිය සඳහා ලියාපදිංචි වී 'සිංහල ගද්‍ය පද්‍ය නිර්මාණයන්හි රිද්ම ලක්ෂණ' නමැති ශාස්ත්‍රීය පර්යේෂණ කාර්යයෙහි නිරතව සිටියදී හදිසියේම 1976 ජනවාරි මස 14 වැනි දින හෘදයාබාධයකින් මෙලොව හැර ගියේ අවාසනාවන්ත ලෙසින්‍ ය. ඒ වන විට මෙතුමන්ගේ වයස අවුරුදු 47 ක් විය.

                    'සිංහල ගද්‍ය හා පද්‍ය නිර්මාණයන්හි රිද්ම ලක්ෂණ නමැති පර්යේෂණ කෘතිය අවසන් කිරීමට පෙර මහගමසේකරයන් වියෝ වීම නිසා ශ්‍රී ජයවර්ධනපුර විශ්ව විද්‍යාලය විසින් අවසන් නොකළ එම නිබන්ධනය සඳහා ඔහුට ආචාර්ය උපාධිය පිරිනමන ලදී.මිය ගිය අයෙකු උදෙසා ආචාර්ය උපාධිය පිරි නැමූ ප්‍රථම අවස්ථාව මෙය බව හෙළි වේ.

සැකසුම අන්තර්ජාලය හා පොත් පත් ආශ්‍රයෙනි....