මිනිසා නසන මත්ද්‍රව්‍ය-02
මත්ද්‍රව්‍ය භාවිතා කිරීමට හේතු
1. වැරදි මත විශ්වාස
මද්‍යසාර ඇතුළු මත්ද්‍රව්‍ය භාවිතා කරන අය එය භාවිතයට හේතු වශයෙන් කරුණු ගණනාවක් ඉදිරිපත් කරයි.
උදා: සතු‍ටක්, විනෝදයක් ලැබීමට
ආත්ම විශ්වාසය වැඩිකර ගැනීමට
ප්‍රශ්න අමතක කිරීමට
මහන්සිය නිවා ගැනීමට
ලිංගික හැකියාව වැඩිකර ගැනීමට
නිර්මාණශීලී හැකියාවන් වැඩි කරගැනීමටඑහෙත් මද්‍යසාර හා මත්ද්‍රව්‍ය පිලිබද ලොව පුරා පවත්වා ඇති පරික්ෂණ වලින් හෙලිවී ඇත්තේ එම රසායන ද්‍රව්‍ය වලට එබදු ගුණාංග කිසිවක් නැති බවයි. එනම් එම හේතු සත්‍යතාවයක් හෝ පදනමක් නොමැති විශ්වාස මත ගොඩනැංවුනු ඒවා බවයි.
2. මත්ද්‍රව්‍යවලට දී ඇති ආකර්ෂණය
ඕනෑම භා‍ණ්ඩයක්, සේවාවක් හෝ පුද්ගලයෙකු කෙ‍ෙරහි කැමැත්තක් ඇති වීමට ඒ වටා ගොඩ නැංවී ඇති ආකර්ෂණය ප්‍රබලව බලපායි. සමාන ගුණාංග වලින් යුතු අඩු මිලැති භා‍ණ්ඩ තිබියදී අපි වඩා ජනප්‍රිය වැඩි ප්‍රචාරණයක් ඇති භා‍ණ්ඩ මිලදී ගැනිමට පෙළඹෙන්නේ එම ආකර්ෂණයේ වෙනස නිසාය.මත්ද්‍රව්‍ය වල භෞතික ගුණාංග මෙන්ම භාවිතා කල විට ලැබෙන අත්දැකීම්ද කිසිසේත් ආකර්ෂණීය නොවන නමුත් ඒ වටා ඇති බාහිර සාධක මගින් මත්ද්‍රව්‍ය හා එය භාවිතය ආකර්ෂණීය දෙයක් බවට පත් කර ඇත. එම ආකර්ෂණය ගොඩ නැංවෙන ආකාර නම්,
- අලංකාර ඇසුරුම් වල/බෝතල්වල බහා තිබීම
- භාවිතා කරන අවස්ථා ආකර්ෂණීය වීම (මිතුරන් සමඟ එක්වී විනෝද වන අවස්ථා, උත්සව, විනෝද ගමන්, සාද ආදිය )
- භාවිතය සමඟ බැඳී ඇති වචන මාලාව (සෙට් වෙනවා, ජොලි කරනවා ආදිය)
- භාවිතය සමඟ බැඳී ඇති හැසිරීම් (සිංදු කීම, නැටීම ආදිය)
- ආකර්ෂණීය චරිත විසින් භාවිතා කිරීම (චිත්‍රපට වල නළු නිලියන්, ගමේ අපි කැමති අය)
- භාවිතා කිරීමෙන් අපේක්ෂා කරන දේ (සතු‍ට, ආත්ම විශ්වාසය ආදිය )
- මත්ද්‍රව්‍ය භාවිතය වැඩිහිටියන් විසින් කරනු ලබන හෝ භයානක මාරාන්තික දෙයක් ලෙස පෙන්වීම
3. මත්ද්‍රව්‍ය භාවිතය තුලින් ලැබෙන වරප්‍රසාද
ප්‍රචණ්ඩකාරී හෝ අපචාර ක්‍රියා වලට සමාජයෙන් ලැබෙන අවසරය හා එම ක්‍රියා මගින් තම ප්‍රතිරූපයට වන හානිය අවම වීම
උදා මද්‍යසාර භාවිතා කල පුද්ගලයින් දක්වන හැසිරීම් කිහිපයක් නම්
- බිරිදට හා දරුවන්‍ට පහර දීම
- මහමග හමුවන අයට ප්‍රසිද්ධියේ බැණවැදීම
- තම මිතුරන්ගේ මුහුණටම දොස්කීම
- කාන්තාවකගේ අතින් ඇදගෙන ගොස් නටන්න‍ට ආරාධනා කිරිම
අනෙක් අය මෙම හැසිරීම් දකින්නේ ඔහුගේ මද්‍යසාර භාවිතය නිසා දක්වන හැසිරීම් ලෙසය. එය එසේ නොවන බව එම සිදුවීම විග්‍රහ කර බැලීමෙන් තේරුම් ගත හැකිය. එලෙසින් තමන්ගේ හැසිරීම් වල වගකීම තමාගෙන් බැහැරට, එනම් මද්‍යසාර වලට යොමුවීම නිසා එම හැසිරීම් තුලින් තම ප්‍රතිරූපයට වන හානිය අඩුවේ.භාවිතා කල විට ලැබෙන එබඳු වරප්‍රසාද පුද්ගලයින් භාවිතයට පොළඹවන එක් සාධකයකි.
වගකීම්වලින් නිදහස්වීම
මද්‍යසාර හෝ වෙනත් මත්ද්‍රව්‍යයකට පුරුදු වූ අයෙකු‍ට තම පවුලේ වගකීම් ආදිය බාරදිම පවුලේ අනෙක් අය සිදුනොකරයි. පොදු කට‍යුතු වලදී ද මත්ද්‍රව්‍ය භාවිතා කරන අය‍ෙග් සහභාගිත්වය බොහෝ විට අපේක්ෂා නොකෙරේ. එලෙස පවුලේ හා සමාජයේ වගකීම් වලින් මග හැරීමට හැකිවීම මත්ද්‍රව්‍ය භාවිතයට කරන අයට ලැබෙන තවත් වරප්‍රසාදයකි.
4. ව්‍යාපාරික උපක්‍රම
මත්ද්‍රව්‍ය හා මද්‍යසාර වෙළඳාම ඉතා ලාභදායී ව්‍යාපාරයකි. තම නිශ්පාදන වැඩි වැඩියෙන් අලෙවි කර ගැනීම සඳහා එම ව්‍යාපාරයන් මගින් ගෙන යන සෘජු හා වක්‍ර ප්‍රචාරණ උපක්‍රම මත්ද්‍රව්‍ය භාවිතය දිරි ගන්වන ප්‍රධානම හේතුවකි.
- සෘජු ප්‍රචාරණය : වෙළඳ දැන්වීම්, තරඟ වලට අනුග්‍රහය
- වක්‍ර ප්‍රචාරණය : චිත්‍රපට, ටෙලිනාට්‍ය වල භාවිතය කෙරෙහි ආකර්ෂණයවැඩි කරන දර්ශන ඇතුලත් කරවීම, සුභසාධන වැඩ වලට අනුග්‍රහ දැක්වීම ප්‍රචාරණයේ මූලික පරමාර්ථය නම් තම නිශ්පාදනය කෙරෙහි ආකර්ෂණය ගොඩනැංවීම හා භාවිතය සම්බන්ධ විශ්වාසයන් /හේතු ප්‍රචලිත කිරීමයි. සෑම වසරකම විශාල පිරිසක් මත් භාවිතය හරහාම මිය යන අතර තවත් විශාල පිරිසක් භාවිතය නවත්වයි. එබැවින් අළුතින් පුද්ගලයින් භාවිතයට යොමු කර ගැනීම ව්‍යාපාර‍යේ පැවැත්මට අත්‍යාවශ්‍ය වන අතර ඔවුන්ගේ ප්‍රධානතම ඉලක්කය වන්නේ ළමයින් වේ.
5. හානිය ගැන ඇති දැනුම අඩු වීම
මත් ද්‍රව්‍ය නිසා වන හානි‍යේ සැබෑ වපසරිය පිළිබඳ ජනතාව තුල අවබෝධය මඳ වීම තවත් හේතුවකි.
6. පරිසරයෙන් ලැබෙන බලපෑම
යම් ප්‍රදේශයක මත්ද්‍රව්‍ය බහුල හා පහසුවෙන් ලබා ගත හැකි නම් එම ප්‍රදේශයේ පුද්ගලයින්ගේ භාවිතය ඉහළ යයි. එ‍ෙස්ම මත්ද්‍රව්‍ය භාවිත වන අවස්ථා ප්‍රමාණය වැඩි වීම; එනම් උත්සව, සාද, විනෝදගමන් ආදී සියල්ල "මත්ද්‍රව්‍යකරණය" වීම භාවිතය වැඩි වීමට හේතු වේ. තමා ඇසුරු කරන පුද්ගලයන්ගෙන්, විශේෂයෙන් මිතුරු කණ්ඩායම් වලින් එල්ලවන බලපෑම්ද පුද්ගලයින් භාවිතයට පෙළඹීමට හා භාවිතය වැඩි වීමට හේතු වේ.
Shasikala Nilmini