වාක්‍ය රචනා ලිවීම
(සා. පෙළ විෂය නිර්දේශයට අනුව සකස් කර ඇත.)
ලෝකයේ මිනිසා විශේෂිත සත්ත්වයෙක් ලෙස හඳුන්වන්නේ අනෙකුත් සත්ත්වයින්ට වඩා මනසින් උසස් යැයි හඳුන්වන නිසාය. එමෙන්ම මිනිසාට ඇති භාෂණයේ හා ලේඛනයේ හැකියාව ප්‍රමුඛම හැකියාවක් වෙයි. ලේඛනයේදී වාක්‍ය රචනය ඉතා වැදගත් සන්දිස්ථානයකි. යම් කරුණක් අරබයා තම සිත තුළ හටගන්නා අදහස රචනයක් තුළින් ඉස්මතු වෙයි.
රචනයක් යනු කිසියම් මාතෘකාවක් ඔස්සේ අදහස්, කරණු හා හැඟීම් ක්‍රමවත්ව, සංවිධානාත්මකව හා නිර්මාණාත්මකව ලේඛන මාධ්‍යයෙන් ඉදිරිපත් කිරීමයි.
සාර්ථක වාක්‍ය රචනයක් ලිවීමට සැලකිලිමත් වියයුතු කරුණු
- තෝරා ගන්නා ලද මාතෘකාවට අදාළව තර්කානුකූලව හා විශ්ලේෂණාත්මකව කරුණු ඉදිරිපත් කිරීම.
- මාතෘකාවට අදාළව හරවත් කරුණු රසවත් ලෙස ඉදිරිපත් කිරීම.
- රචනාවේ පෙළ ගැස්වීම ක්‍රමානුකූලව සහ නිරවුල් විය යුතුය.
- විචිත්‍ර සහ නිරවද්‍ය කරුණු විය යුතු අතර තමාට අනන්‍ය වූ ශෛලියකට අනුව පෙළ ගැස්විය හැක.
- පද බෙදීම, විරාම ලකුණු හා ව්‍යාකරණ භාවිතය.
- පොත් පත්, ගුවන් විදුලිය, රූපවාහිනිය හා අන්තර් ජාලය පරිශීලනය කිරීම.
- පොත්, පුවත්පත් කියවා ලබා ගත් දැනුම, ආයාසයකින් තොරව රචනා ලිවීමට මහත් පිටුවහලක් වෙයි.
- නිර්මාණශීලි රචනයක් සාහිත්‍යමය ගුණයෙන් යුක්ත වෙයි.
රචනාවක් රසවත්ව ලිවීම සඳහා යොදා ගත හැකි සාම්ප්‍රදායික යෙදුම් හා භාෂා ප්‍රයෝග
- වියත් කියමන්
- ප්‍රස්තාව පිරුළු
- රූඩි
- ආප්තෝපදේශ
- පොත් පත් වලින් උපුටා ගත් උද්ධෘත
වාක්‍ය රචනයක සැකිල්ල
- හැඳින්වීම
- රචනා ශරීරය (එක් කරුණකට එක් ඡේදයක් බැගින් ලිවීම.)
- අවසානය (සමාලෝචනය)
පහත රචනා ප්‍රශ්නය ඉදිරිපත් කර ඇත්තේ මාර්ගෝපදේශිත ක්‍රමයටය.
විද්‍යුත් ජනමාධ්‍ය මිනිසාගේ විනෝදාස්වාදය සඳහා මෙන්ම අධ්‍යාපනය හා සමාජයේ ඉදිරි ගමන සඳහාද උපයෝගී කර ගනු ලබන්නකි. උචිතානුචිතභාවය නොතකා හුදු විනෝදාස්වාදය සඳහා පමණක් එය යොදා ගැනීම සමාජයේ සාරධර්ම පිරිහීමට මෙන්ම බාල පරපුර කෙරෙහි අනිසි බලපෑම් ඇති කිරීමට ද හේතු වී ඇතැයි සමාජ විචාරකයෝ පවසති. මේ තත්ත්වයෙන් බැහැරව සමාජයේ යහපත සඳහා විද්‍යුත් ජනමාධ්‍ය යොදා ගත යුතුය.
එම විස්තරයට අනුව කරුණු ඉදිරිපත් කළ යුතු පියවර පහත අයුරින් පෙලගැස්විය හැක.
- විද්‍යුත් ජනමාධ්‍ය විනෝදාස්වාදය, අධ්‍යාපනය හා සමාජයේ ඉදිරි ගමනට ඉවහල් වන බව.
- විද්‍යුත් ජනමාධ්‍ය වැඩිපුරම විනෝදාස්වාදයට පමණක් භාවිතා කරන බව.
- වර්තමානයේ සාරධර්ම පිරිහීමටත්, අනිසි බලපෑම් ඇති කිරීමටත් විද්‍යුත් ජනමාධ්‍ය හේතුවන බව.
- විද්‍යුත් ජනමාධ්‍ය සමාජයේ යහපත සඳහා යොදාගත යුතු බව.
- සමාලෝචනය.
වාක්‍ය රචනයට මාතෘකාව යෙදීම
ඔබ තෝරාගත් විස්තරයට අනුව මාතෘකාවක් යෙදීම ඔබ විසින් සිදුකළ යුතු අතර එය ඔබේ නිර්මාණාත්මක හැකියාව පෙන්වන්නකි.මේ නිසා දී ඇති විස්තරය කිහිපවරක් හොදින් කියවා එහි කරුණු නියෝජනය ලෙස මාතෘකාවක් යෙදීම වැදගත් වේ.එමෙන්ම විස්තරයෙන් අපේක්ෂා කළ කරුණු මාතෘකාවෙන් පැහැදිලි විය යුතුය.
ඉහත විස්තරයට අනුව
විද්‍යුත් ජනමාධ්‍ය භාවිතය හා නූතන සමාජය
වර්තමාන ජනමාධ්‍ය භාවිතය හා එහි බලපෑම
වැනි නිර්මාණාත්මක මාතෘකා මෙම වාක්‍ය රචනයේදී යෙදිය හැක.
වාක්‍ය රචනයට ප්‍රවේශ වීම (ආරම්භය)
වාක්‍ය රචනයේ ආරම්භය වාක්‍යයෙන්ම සමස්ත මාතෘකාවට අදාළව කිසියම් උද්ධෘත පාඨයන් හෝ මාතෘකාව පිළිබඳ නිර්වචනයක් ඉදිරිපත් කළ හැක.
- ලෝකයම විශ්ව ගම්මානයකි.
- මේ තොරතුරු ලෝකයයි. තොරතුරු දැනගැනීමට විද්‍යුත් ජනමාධ්‍ය භාවිතය වර්තමාන ජනප්‍රියම සන්නිවේදන මෙවලමයි.
- නූතන සමාජය හා විද්‍යුත් ජනමාධ්‍ය අතර ඇත්තේ අවියෝජනිය සම්බන්ධයකි.
මෙවැනි නිර්මාණාත්මක වැකියකින් ආරම්භ ලියා ඉන් පසුව දෙවන වැකිය මුල් වැකියට ගැළපෙන ලෙස ඉදිරිපත් කළ යුතුය. ආරම්භක ඡේදයේ අනෙකුත් වැකි ද මාතෘකාව හැදින්වීමට ක්‍රමවත්ව යෙදිය යුතුය.
මෙය තවදුරටත් අවබෝධ කර ගැනීමට පහතින් දක්වා ඇති ප්‍රවේශය අධ්‍යයනය කරන්න.
විද්‍යුත් ජනමාධ්‍ය භාවිතය හා නූතන සමාජය.
ලෝකයම විශ්ව ගම්මානයකි. වර්තමානයේ තොරතුරු සන්නිවේදනය කරන ප්‍රධානතම මෙවලම විද්‍යුත් ජනමාධ්‍යයි. ලෝකයේ ඕනෑම ප්‍රදේශයක ඕනෑම තොරතුරක් එසැණින් දැන ගැනීමට හැකි වීම මානව වර්ගයා ලැබූ එක්තරා ජයග්‍රහණයකි. මිනිසා විද්‍යුත් ජනමාධ්‍ය අධ්‍යාපනය, විනෝදය, සහ නොයෙකුත් අවශ්‍යතාවයන් සඳහා භාවිතයට ගනී. විශ්වයට ඇගිලි තුඩින් ලබා ගත හැකි බවට ආතර් සී ක්ලාක් මහතා කියූ අනාවැකියේ ප්‍රතිඵල වර්තමානය වන විට සඵලව ඇත. නමුත් වත්මන් බාල පරපුර මෙම විද්‍යුත් ජනමාධ්‍ය කෙරෙහි ඇබ්බැහි වීමක් දක්නට ලැබේ. එයින් සමාජ සාරධර්මයන් මිහිමත මිහිදන් වෙයිද යන්න සැකයන් උපදියි.
මාතෘකාවට අනුව විෂය කරුණු
වාක්‍ය රචනයේ විස්තරාත්මක කොටස මෙයයි. මෙහිදී මාතෘකාවට අදාළ කරුණු අනුපිළිවෙළින් සහ තර්කානුකූලව ඡේද වශයෙන් ලිවිය යුතුය. එහි ප්‍රමාණවත් බව වැදගත්වේ. වෙනත් ඡේද වල සටහන් කළ කරුණු නැවත නැවත සටහන් නොකළ යුතුය. ඡේද එකිනෙක ගලා යන ආකාරයෙන් කියවන්නාගේ සිත කුල්මත් වන ලෙස නිර්මාණාත්මකව ඉදිරිපත් කළ යුතුය.
සමාලෝචනය
වාක්‍ය රචනයේ අවසාන ඡේදය සමාලෝචනය සඳහා යොදා ගත යුතු වේ. මාතෘකාවට අදාළව තෝරා ගත් කරුණු ක්‍රමවත්ව අවසන් කළ යුතුය. රචනයේ ඉදිරිපත් කළ කරුණු වල සාරාංශයක් ලෙස අදාළ මාතෘකාව පිළිබඳ රචකයාගේ නිගමනය හා වින්ශ්චය, යෝජනා ඉදිරිපත් කිරීම සාර්ථක රචනයක අවසානයයි.
