පරිගණකයේ ඉතිහාසය (The History of Computer)

පරිගණකයේ ඉතිහාසය (The History of the Computer)

පරිගණකය යනු මිනිසාගේ ගණිතමය මෙන්ම එදිනෙදා අවශ්‍යතාවයන් සඳහා සැකසූ විද්‍යුත් යාන්ත්‍රික උපකරණයකි. ශිලා යුගයේ විසූ මිනිසුන් ගණිත කටයුතු සඳහා තම දෑතේ ඇඟිලි යොදා ගන්නා ලදී. එපමණක් නොව කෝටු කැබලි, ඇට කැබලි වැනි ස්වාභාවික ද්‍රව්‍ය ද යොදා ගත්හ. කැලයේ තම ජීවිතය ගත කළ මිනිසා ක්‍රමක්‍රමයෙන් සමාජශීලී වීමත් සමගම තම වැඩ කටයුතු පහසුවෙන් සහ ක්‍රමානුකූලව ඉටු කර ගැනීම සඳහා නොයෙක් ආකාරයේ උපකරණ නිර්මාණය කළ බව ඔබ අසා ඇත.

තොරතුරු හා සන්නිවේදන තාක්ෂණ ඉතිහාසය බෙදනු ලබන කාල වකවානු (Timelines)

1. පූර්ව යාන්ත්‍රික යුගය (1450 ට පෙර )
2. යාන්ත්‍රික යුගය (1450 - 1840)
3. විද්‍යුත් යාන්ත්‍රික යුගය (1840 1940)
4. විද්‍යුත් යුගය (1940 සිට අද දක්වා)

ඇබකසය (Abacus)

ඇබකසය යනු මිනිසා තම ගණිත කටයුතු පහසු කර ගැනීම පිණිස ක්‍රි.පූ. 3000 දී පමණ චීන ජාතිකයින් භාවිතා කළ උපකරණයකි. ඇබකසය අද භාවිතා කරනු ලබන පරිගණකය සඳහා මූලික අඩිතාලමයි. මෑත කලීනවද ඇතැම් පාසල්වල ප්‍රාථමික අධ්‍යාපන කටයුතු සිදු කිරීම සඳහා ඇබකසය වැනි ගණිත මූලධර්ම ඇති උපකරණයක් භාවිතා කරයි.

ආකලන යන්ත්‍රය (Adding Machine / Pascaline)

1642 දී බ්ලේස් පැස්කල් විසින් ගණිත කර්ම පහසුවෙන් සිදුකළ හැකි යන්ත්‍රයක් නිපදවීය. මෙය ආකලන යන්ත්‍රය (Adding Machine / Pascaline) ලෙස හැඳින්වේ. මෙමගින් එකතු කිරීම සහ අඩු කිරීම පමණක් සිදුකළ හැකි විය.

Step Reckoner යන්ත්‍රය

1674 දී ජර්මන් ජාතික ගණිතඥයෙකු වූ ගොඩ්ෆ්‍රිඩ් විල්හෙල්ම් විසින් Pascaline යන්ත්‍රය වැඩි දියුණු කර එකතු කිරීම, අඩුකිරීම පමණක් නොව ගුණ කිරීම සහ බෙදීම වැනි ගණිත කර්ම සිදු කළ හැකි Step Reckoner යන්ත්‍රය නිපදවීය. මේ සඳහා සිදුරුපත් (Punch Cards) සංකල්පය යොදාගත්හ.

සිදුරු කාඩ්පත් සංකල්පය (Punch Cards Concept)

ප්‍රංශ ජාතික ජෝෂප් ජැකුවාඩ් විසින් ඔහුගේ රෙදි විවීමේ කාර්යය පහසු කර ගැනීම සඳහා 1801 දී පමණ යාන්ත්‍රික රෙදි වියන යන්ත්‍රය නිර්මාණය කළහ. මෙහි සිදුරු කරන ලද කාඩ්පත් භාවිතා කරන ලදී.


(Image Source : http://www.google.lk/imgres?imgurl=https://www.mimecast.com)

Difference Engine

1822 දී චාල්ස් බැබේජ් විසින් "ලොව ප්‍රථම යාන්ත්‍රික පරිගණකය" සඳහා අවශ්‍ය කරන ආකෘතියක් ඉදිරිපත් කළහ. එය Difference Engine නම් වේ.

ඇනලිටිකල් යන්ත්‍රය (Analytical Engine)

චාල්ස් බැබේජ් විසින් 1833 දී නිර්මාණය කළ ඇනලිටිකල් යන්ත්‍රය සඳහා මූලික අඩිතාලම වැටුනේ සිදුරුපත් සංකල්පයයි. නමුත් ඔහු සිතූ ආකාරයටම යන්ත්‍රය නිර්මාණය කිරීමට එකළ තාක්ෂණික දැනුම ප්‍රමාණවත් නොවීය. ඇනලිටිකල් යන්ත්‍රයෙහි විශේෂත්වය වනුයේ එහි දත්ත ආදානය (Input), සකස් කිරීම (Process), තැන්පත් කිරීම (Storage) සහ ප්‍රතිදානය (Output) යන කාර්යයන් සිදු කිරීම සඳහා අවශ්‍ය උපාංග එහි තිබීමයි. පසු කාලීනව නිර්මාණය කළ පරිගණක සඳහා මොහුගේ මෙම සංකල්පය භාවිතාවිය. පරිගණකයේ පියා (The father of computer) නමින් කිරුළු පැළඳීය.


(Image Source : http://www.google.lk/imgres?imgurl=http://giantsofscience.weebly.com)

ලොව ප්‍රථම පරිගණක වැඩසටහන් ශිල්පිණිය (1^st Computer Programmer)

චාල්ස් බැබේජ්ගේ මෙම ඇනලිටිකල් යන්ත්‍රය (Analytical machine) සඳහා ඇඩා ඔගස්ටා (Ada Augusta) මැතිණිය විසින් වැඩසටහන් (Programs) සකස් කරන ලදී. ඇඩා ඔගස්ටා මැතිණිය ලොව ප්‍රථම පරිගණක වැඩසටහන සකස්කළ තැනැත්තිය ලෙස විරුදාවලි ලැබූහ. පසු කාලීනව නිර්මාණය වූ Ada පරිගණක භාෂාව ඇයට ගෞරවයක් ලෙස නිර්මාණය විය.

ඉලෙක්ට්‍රොනික වෑල්වය / රික්තක නලය (Vacuum Tube)

1906 දී ෆොරස්ට් විසින් ඉලෙක්ට්‍රොනික වෑල්වය (රික්තක නලය ) සොයාගැනීම නූතන පරිගණක තාක්ෂණය සඳහා මුල්ගල තැබීමක් විය.

Mark 1 යන්ත්‍රය

1937 දී හාර්වර්ඩ් විශ්ව විද්‍යාලයේ හෝවර්ඩ් එයිකන් චාල්ස් බැබේජ්ගේ සංකල්පය වැඩි දියුණු කිරීමට දැඩි ලෙස උත්සහා ගන්නා ලදී.         මෙහි ඇති විශේෂත්වය වනුයේ දත්ත ඇතුළත් කිරීම සඳහා යතුරු ලියනයක් (Type writer) සම්බන්ධ කර තිබුනි. දත්ත ආදානය කිරීම සඳහා සිදුරුපත් (Punch cards) භාවිතා කළහ. මෙම යන්ත්‍රය වසර 15 කට වැඩි කාලයක් පරිගණක ලොව තුළ භාවිතා විය.


(Image Source : http://www.google.lk/imgres?imgurl=http://upload.wikimedia.org/wikipedia)

පළමු පොදු කාර්යය ඉලෙක්ට්‍රොනික අංකිත පරිගණකය (The 1^st General purpose digital computer) - ENIAC

1946 දී නිපදවූ එනියැක් (ENIAC – Electronic Numerical Integrator and Calculator) යන්ත්‍රය පළමු පොදු කාර්යය ඉලෙක්ට්‍රොනික අංකිත පරිගණකය නම් වේ.

ගබඩා කළ ක්‍රමලේඛන යොදාගත් මුල්ම අංකිත පරිගණකය (The 1^st digital computer which used stored programs) – EDVAC

1949 දී නිපදවන ලද එඩ්වැක් (EDVAC – Electronic Discrete Variable Automatic Computer) යන්ත්‍රය, ගබඩා කළ ක්‍රමලේඛන යොදාගත් මුල්ම අංකිත පරිගණකයයි.

ට්‍රාන්සිස්ටරයේ උපත (Transistor)

1947 දී ට්‍රාන්සිස්ටරයේ උපත සමග පරිගණකයේ පළමු පරම්පරාව අවසාන විය (1940- 1956). ට්‍රාන්සිස්ටර යොදාගෙන තැනූ පරිගණක දෙවන පරම්පරාවේ පරිගණක නම් වේ. ට්‍රාන්සිස්ටර සොයා ගැනීමට පෙර පරිගණක නිපදවීමට භාවිත කළේ ඉලෙක්ට්‍රොනික වෑල්වය. මේවා ක්‍රියා කිරීමේදී අධික තාපයක් නිකුත් වූ බැවින් රත්වී පිලිස්සී යාම නිසා බොහෝ ගැටළු ඇතිවිය. ට්‍රාන්සිස්ටර පැමිණීමත් සමගම මෙම කරදරකාරී තත්වය බොහෝදුරට අඩුවිය.

ට්‍රාන්සිස්ටරය යනු අර්ධ සන්නායක උපාංගයක් වන අතර එය වර්ධකයක් ලෙස සහ ස්විචයක් ‍ලෙස භාවිතා කරනු ලැබේ. තවද පරිගණකවල, ජංගම දුරකථන වල සහ අනෙකුත් සියලුම විද්‍යුත් උපකරණ වල භාවිතා වන මූලික විද්‍යුත් පරිපථ උපාංගයක් ලෙසද මෙය සැලකිය හැකිය. ට්‍රාන්සිස්ටරයේ ඇති ඉක්මන් ක්‍රියාකාරිත්වයත්, නිරචද්‍යතාවයත් නිසා විවිධවූ කාර්යයන් සදභා මෙය යොදා ගනු ලබන අතර උදාහරණ ලෙස ධාරා වර්ධනය,වෝල්ටීයතා වෙනස්කිරීම්, සංඥා සැකසීම සහ දෝළක සැලකිය හැකිය. ට්‍රාන්සිස්ටර තනි ඇසුරුමක ආකාරයෙන් සහ සංගෘහිත පරිපථ වල අභ්‍යන්තර කොටසක් ලෙසද නිර්මාණය කර ඇත. සංගෘහිත පරිපථ වල අභ්‍යන්තරයේ මෙවැනි පරිපථ බිලියන ගණනක් පවතී. (Source: http://si.wikipedia.org/wiki/)

අනුකලිත පරිපථ වල පැමිණීම (IC – Integrated Circuits)

1964 දී ට්‍රාන්සිස්ටර (Transistor) වල එකතුවෙන් සැදුම්ලත් අනුකලිත පරිපථ (IC – Integrated Circuits) වල පැමිණීමත් සමගම පරිගණක ප්‍රමාණයෙන් සහ මිලෙන් අඩුවූ අතර ඒවායේ වේගය වැඩිවිය. මෙවා තුන්වන පරම්පරාවේ පරිගණක නම් වේ. කල්යත්ම අනුකලිත පරිපථ දහස් ගණනකින් කෙරෙන කාර්යය ඉටු කිරීමට සමත් සිලිකන් චිප (Silicon Chips) නිපදවීමට ඉලෙක්ට්‍රොනික තාක්ෂණය දියුණු විය. මෙහි ප්‍රතිඵලයක් ලෙස පහත චිප (Chips) බිහිවිය.
LSI – Large Scale Integration
VLSI – Very Large Scale Integration

ක්ෂුද්‍ර සකසනයේ පැමිණීම (Micro Processor)

මෙම කාලවකවානුවේදී දහස් ගණන් අනුකලිත පරිපථ (IC), සිලිකන් චිපයක් (Silicon Chip) තුළ තැන්පත් කිරීමට තරම් තාක්ෂණය දියුණු වීමත් සමගම ක්ෂුද්‍ර සකසනය (Micro Processor) බිහිවිය. මේවා යොදාගෙන නිර්මාණය කළ පරිගණක වල වේගය හා කාර්‍යක්ෂමතාවය ඉතාම ඉහළ වූ අතර මිල හා ප්‍රමාණය ක්‍රමයෙන් අඩුවිය. හතරවන පරම්පරාවට අයිති මෙම පරිගණක භාවිතා කරන්නාට ඉතා සිත් ඇදගන්නා සුළු ආකර්ෂණීය වූ චිත්‍රක අතුරු මුහුණත් (GUI – Graphical User Interfaces) යොදා නිර්මාණය කළ ඒවා විය.

සකසන (Processors) නිෂ්පාදනය කරන ආයතන

Intel, AMD, Cyrix, Motorola, NEC 

ආශ්‍රිත ග්‍රන්ථ : 10 ශ්‍රේණිය - තොරතුරු සන්නිවේදන තාක්ෂණය - පෙළ පොත